shadow
Diocese de Dili > NOTÍCIAS > LETURA DIÁRIA > Terça–Feira, XV Semana iha Tempo Comum

Terça–Feira, XV Semana iha Tempo Comum

Ano B

 

Primeira Leitura                                                                         Is. 7. 1-9

Lia housi Livro Isaías nian

Iha tempo neba, Acaz, Jotão nia oan, Ozias nia oan, mak liurai Judá nian; Rason, liurai arameu sira nian, Pecá, Romélia nia oan, liurai Israel nian, la’o ba hafunu hasouru Jerusalém, maibé, la manan nia.

Sira fó hatene ba uma-kain David nian nune’e: “Ema arameu sira mai hamahan-an ona iha Efraim”. Liurai nia fuan no povo nia fuan nakdedar hanesan aihun sira be iha ailaran nakdedar tan anin fuik. Nune’e, Na’i dehan ba Isaías: “Ó ba buka Acaz, hamutuk ho ó nia oan Sear-Jasub, iha wé-lihun leten nia wé  dalan nia rohan, nebé hela iha luron Campo Pisoeiro nian. Ó sei ko’alia nune’e ba nia: ‘Neon moris, keta ta’uk, no keta hakfodak. Ó keta neon susar, tan laran áat baluk rua ne’e, tan laran nakali Rason nian, tan liurai arameu nian, ho tan Romélia nia oan nian. Ema arameu sira hamutuk ho Efraim no Romélia nia oan, sira hakarak halo áat ba ó hodi dehan: ‘Ita la’o hamutuk hasouru Judá, hata’uk nia hodi kair ribit nia to’o nia rende. Hafoin ita foti nia nu’udar liurai Tabell nia oan’. Maibé, Na’i Maromak lia tun dehan: “Buat ne’e sei la mosu, sei la sai nune’e. Capital arameu sira nian mak Damasco no Damasco nia ulun mak Rason; capital Efraim nian mak Samaria no Samaria nia ulun mak Romélia nia oan. Maibé, iha tinan lima eh nen nial aran, ema sei hanehan mohu Efraim, povo sei lakon. Imi mós, la iha fiar karik, sei lakon mohu”.

Maromak Futar Lia.

 

Salmo Responsorial                                                                                    Sal. 47(48). 2-8 (R. 9d)

Refrão : Na’i, hametin ba nafatin Ita cidade!!! Repete-se

 

Na’i boot tebes, so’i simu hahi

Iha ita Maromak Nia cidade,

Iha Nia foho santo be kmook liu foho oan sira,

nu’udar ksolok rai hotu nian. Refrão

 

Foho Sião nu’udar rohan iha tasi-feto,

Cidade Liurai Boot nian.

Iha neba Maromak hatudu-An

Hanesan kota metin tebes ida. Refrão

 

Liurai sira fó liman ba malu,

Hamutuk hafunu hasouru Nia.

Wainhira haré Nia, sira laran ta’uk tebes,

No hakfodak halai hotu. Refrão

 

Laran ta’uk kair ribit sira;

Laran ta’uk hanesan feto be tur-ahi kona sira;

Hanesan anin boot loro-sa’e nian

Halakon ró sira Társis nian. Refrão

 

Aclamação                                                                                                                                                                     Sal. 94(95). 8ab

Refrão  : Aleluia, Aleluia! Repete-se

                   Ohin imi rona karik Na’i nia lian,

                    Keta taka imi nia fuan. Refrão

 

Evangelho                                                                                                                                                                             Mt. 11. 20-24

Na’i Jesus Cristo nia Evangelho nu’udar São Mateus haktuir :

Iha tempo neba Jesus haksiak maka’as cidade sira iha nebé halo nia Milagre barak liu tan sira la laran moras ba sira salan.

“Susar ba ó, Corazim! Susar ba ó, Betsaida! Basá milagre sira nebé halo ona iha imi leet, halo tiha karik iha Tiro no Sidónia, kleur tiha ona, sira hakribi sala hodi hatais karon no ho ahikdesan. Tan ne’e, Ha’u dehan ba imi katak iha loron justiça nian castigo ba Tiro no Sidónia sei kmaan liu fali imi nian. Ó fali, Cafarnaum, ó hakarak foti an to’o lalehan? Ó sei monu to’o inferno! Basá milagre sira nebé halo ona iha ó halo tiha karik iha Sodoma, to’o ohin Sodoma sei hamriik hela. Tan ne’e, Ha’u dehan ba imi katak iha loron justiça nian castigo ba Sodoma sei kmaan liu fali ó nian.

Lia Maksoyn.

Leave a Reply

Your email address will not be published. Required fields are marked *