shadow
Diocese de Dili > NOTÍCIAS > REFLEXÃO > MAROMAK MAK AUTOR BA PAZ

MAROMAK MAK AUTOR BA PAZ

Maromak mak autor ba PAZ NO LARAN LUAK ne’e, ita ema sira mesak ninia colaborador sira deit, ita ema sira mesak ninia criatura sira nebe wainhira moris nafatin iha Maromak ninia hakarak ne’e paz sei la lakon no laran luak sei hela metin nafatin iha ita nia moris.

Jer. 23, 1-6; Efo 2, 13-18; Mc 6, 30-34

 

Maun alin sarani doben sira, iha domingo ida ne’e Maromak koalia mai ita buat rua nebe ohin loron ita ema sira percisa teb tebes tamba buat rua ne’e lakon husi ita barak ninia le’et. PAZ no LARAN LUAK-LARAN DIAK-LARAN MAUS. Wainhira ita hare ba ita nia mundo ohin loron nian aparentemente ita hare katak mundo ida ne’e percisa tebes paz no laran luak iha ema moris sira nia leet. Nune’e duni tamba realmente ita hare iha rai barak ema sei funu no oho malu, iha familia barak ema sei fahe malu no hirus malu, ema sei odio malu no la fo laran ba malu. Ita mos hare katak iha ema barak tebes mak serviço makas atu estabelece paz, atu halo ema sira comprende malu, simu malu no moris iha domin nia laran maibe la facil atu to’o iha neba.

Maluk doben sira paz no laran luak buat rua nebe Maromak kuda kedas ona iha ita ema ida idak nia-an wainhira nia halo ita ema sira nundar ninia imagem. Nia halo mos ida ne’e iha ita ninia relação ho criatura sira seluk, natureza no universo tomak. Nune’e hodi koalia mai ita ohin kona ba paz no laran luak ne’e halo ita hanoin no buka reflete hodi descobre hamutuk tamba sa mak Paz ho laran luak ne’e ohin loron bele menus ou lakon fali iha ita nia leet ou iha ita nia maun alin sira balun ninia le’et? tamba sira nia salan? Tamba hau nia salan mos, ou tamba ita hotu nia salan?

Husi roman Maromak ninia futar liafuan ohin nian halo ita bele descobre uluk kedas ona katak ohin loron ita ema sira no rai barak la hetan paz tamba ita la sai ema nebe hatene LARAN LUAK BA MALU ou fo laran ba malu hodi laran to’os ba malu, la simu malu, fahe malu, hodi hakiak inimigo ba malu iha ita le’et. Husi ne’e ita comprende katak paz lakon iha ita le’et tamba ita ema sira rasik, abut laiha paz ne’e mai husi ita ema nia laran toos no laran odio. Ne’e duni se laiha paz iha ita le’et sala ne’e ita ema sira nian laos PAZ NE’E MAK LAIHA ITA LE’ET. Ita ema sira mak lakohi simu hodi hadook duni paz ne’e iha ita leet wainhira ita la hatudu LARAN LUAK BA MALU iha ita nia moris hamutuk nundar maun alin no familia ida deit iha Maromak nebe ita nia CRIADOR. Maromak mak kuda paz no laran luak ne’e iha ita leet no hakarak atu ita moris iha neba nafatin, hakarak atu ita kuidadu sira no la estraga sira iha ita nia leet.

Maun alin doben sira, situação paz no laran luak ne’e buat rua nebe ida depende ba ida seluk, labele haketak ida husi fali ida seluk. Katak atu bele hetan paz precisa iha laran luak, se laiha laran luak paz ita nunca bele hetan ou paz sei lakon husi ita le’et. Wainhira iha paz automaticamente iha laran luak.

Primeira no segunda leitura haktuir mai ita katak situação nebe oras ne’e ita hasoru no mundo hasoru kona ba crise ba paz no ema nia laran luak ne’e mosu tamba ita ema sira  la hatudu laran luak ba malu iha ita nia moris ne’e maibe liu liu mosu tamba ita ema sira lakohi rona ba Maromak nebe paz no laran luak ne’e ninia nain no ninia hun, tamba ita haluhan Maromak nundar paz no laran luak nia hun. Nune’e wainhira ita lao dook husi Maromak paz no laran luak ita sei la hetan, sira sei lao dook liu tan husi ita. Paz ho laran luak so bele hetan deit iha Maromak no ho Maromak nia tulun deit mak ita ema sira nia esforço atu hari paz no atu sai ema laran luak ne’e bele to’o rohan no bele mosu duni iha ita leet.

Maun alin sira dala wain tebes no to’o ohin loron ita quando buka moris iha paz no buka sai ema laran luak ita tau confiança liu fali iha deit ita ema nia esforço, ita ema nia matenek, no ita ema ninia kbiit sira. Ida ne’e mos sai hanesan obstaculo boot ida mai ita atu hetan paz no sai ema diak nundar ema laran luak. Lolos iha ita nia hakasan atu estabelece paz no moris iha paz hodi mos sai ema diak no laran luak ne’e ita hakasan maibe ita nia confiança atu hetan ne’e tem que tau iha Maromak basa Maromak mak hori uluk kedas wainhira halo ita ema sira no halo rai klaran ne’e kuda paz no laran luak iha ita ida idak ninia an. La ho Maromak ita sei labele hetan paz no labele sai ema diak be laran luak tebes, ho Maromak paz no moris nundar ema laran luak ida ne’e bele horik duni iha ita le’et no horik tinan ba tinan. Maromak mak autor ba PAZ NO LARAN LUAK ne’e, ita ema sira mesak ninia colaborador sira deit, ita ema sira mesak ninia criatura sira nebe wainhira moris nafatin iha Maromak ninia hakarak ne’e paz sei la lakon no laran luak sei hela metin nafatin iha ita nia moris. São Paulo iha segunda leitura hateten hodi afirma lialos kona ba Maromak mak autor paz ne’e hodi dehan “CRISTO MAK ITA NIA PAZ”, CRISTO MAK IDA NEBE HARAHUN MORU FAHE MALU NIAN, HALAKON REALIDADE INIMIGO BA MALU NIAN, CRISTO MAK HADAME FALI ITA EMA SALA NAIN SIRA HO MAROMAK NO HO ITA NIA MAUN ALIN SIRA LIU HUSI NINIA TERUS, MATE IHA CRUZ NO MORIS HIAS FALI. CRISTO MAK PRINCIPE PAZ NIAN, CRISTO MAK DEHAN PAZ HELA HO IMI. Nia hatutan tan katak CRISTO IDA NE’E NAFATIN MAK OHIN LORON HAKARAK NAFATIN ATU ITA HOTU MORIS IHA PAZ NIA LARAN, CRISTO NEE MAK LORI NAFATIN PAZ NE’E MAI ITA HOTU NO BA MUNDO TOMAK. NUNE’E LAIHA DALAN SELUK ATU MORIS PAZ NO SAI EMA DIAK NUNDAR LARAN LUAK NO LARAN DIAK NE’E BELE HELA METIN IHA ITA LE’ET SE LAOS MAK CRISTO DEIT. DALAN UNICO MAK CRISTO. NUNE’E MAUN ALIN SIRA SE HAKARAK SAI EMA DIAK NO HAKARAK HETAN PAZ IDA ROHAN LAEK IHA ITA NIA MORIS, IHA ITA NIA FAMILIA, IHA ITA NIA GRUPO, IHA ITA NIA RAIN DOBEN TIMOR LESTE NO IHA MUNDO TOMAK MAI ITA HOTU FILA BA CRISTO. MAI ITA HAKAS-AN HARI SAI EMA LARAN LUAK NO HARI PAZ IDA NE’E IHA ITA LE’ET HAMUTUK HO CRISTO. HO CRISTO PAZ NO LARAN LUAK SEI HELA METIN NAFATIN BA NAFATIN IHA ITA LEET, LA HO CRISTO SEI LA SAI NUNE’E. AMEN.       

Bidau, DC XVI, AB, 22.07.18, Pb.

Leave a Reply

Your email address will not be published. Required fields are marked *