shadow
Diocese de Dili > NOTÍCIAS > LETURA DIÁRIA > Segunda-Feira, XVI Semana iha Tempo Comum

Segunda-Feira, XVI Semana iha Tempo Comum

ANO B

 

Primeira Leitura                                                                  Miq. 6. 1-4, 6-8

Lia housi Profecia Miqueias nian:

Imi rona ba, buat nebé Na’i dehan: “Ó hamriik ba hodi hahu processo ida iha foho sira oin; foho oan sira sei rona buat nebé ó dehan”. Foho sira, imi rona ba Na’i Nia processo; sée tilun didiak ba, hun sira rai nian, basá, Na’i iha ona processo ida hasouru Nia povo, Nia laran hirus hodi ko’alia hasouru Israel: “Ha’u povo, Ha’u halo sá ba ó? Iha buat sá mak Ha’u haterus ó? Hatán mai Ha’u ba! Ha’u mak hasai ó housi rai Egipto, hasai ó housi uma atan nian hodi tau iha ó oin Moisés, Aarão no Maria.

– Sá mak ha’u sei lori ba Na’i Nia futar oin, atu ha’u hakru’uk iha Maromak be áas liu ba Nia futar oin? – Ha’u sei lori buat karan tunu nian ho karau baka oan tinan ida nian? Bibi sira be rihun ba rihun, mina sira be iha botir rihun ba rihun sei fó ksolok ba Na’i? Tan ha’u salan ha’u sei hasa’e ha’u oan kaua’ik, ha’u oan mane, atu hamos ha’u rasik nia salan?

– Ema dehan tiha ona ó, buat di’ak nebé ó atu halo, buat ne’e mak Na’i husu ba ó: halo tuir justiça, hadomi ho laran mamar, moris hodi haraik-an iha ó nia Maromak Nia oin.

Maromak Futar Lia.

 

Salmo Resposorial                                                                                                     Sal. 49(50). 5-6, 8-9, 16bc-17, 21-23 (R. 1b)

Refrão : Ba ida nebé moris tuir dalan lós,

                  Ha’u sei fó ba nia maksoyn Maromak nian!!! Repete-se

 

Na’i dehan: “Halibur Ha’u nia emar sira hotu,

Sira nebé halo moruk ho Ha’u ho sacrifício”!

Lalehan haklaken Nia justiça;

Maromak rasik mak tesi lia. Refrão

 

La’os tan ó nia sacrifício mak Ha’u si’ak ó;

Ó nia buat-karan sira iha nafatin Ha’u oin.

Ha’u la simu karau baka oan housi ó ruma,

La simu mós bibi oan sira housi ó nia luhan. Refrão

 

“Tan sá ó ko’alia resin ba Ha’u ukunfuan

No lori Ha’u aliança iha ó ibun;

Ó nebé la simu Ha’u lia hanourin

No hewai Ha’u nia liafuan sira? Refrão

 

Ó halo tiha buat ne’e, Ha’u nonok lerek;

Ó hanoin katak Ha’u hanesan ó,

Ema nebé hasa’e sacrifício hahi nian mak hana’i Ha’u.

Ba ema nebé tuir dalan lós,

Ha’u sei fó Maromak nia maksoyn. Refrão

 

Aklamação                                                                                                                                                                      Sal. 94(95). 8ab

Refrão : Aleluia, Aleluia! Repete-se

                  Ohin imi rona karik Na’i Nia lian,

                  Keta taka imi nia fuan. Refrão

 

Evangelho                                                                                                                                                                            Mt. 12. 38-42

Na’i Jesus Cristo nia Evangelho nu’udar São Mateus haktuir :

Iha tempo neba, escriba no fariseu balun dehan ba Nia: “Mestre, ami hakarak haré sinal ida housi Ita.” Nia hatan ba sira: “Ema laran áat no sala fo’er na’in husu sinal ida; maibé sei la fó sinal ida ba nia; sei fó de’it sinal profeta Jonas nian. Hanesan Jonas hela iha ikan boot nia kabun laran ba loron tolu no kalan tolu, nune’e mós Oan Mane sei hela iha rai laran ba loron tolu no kalan tolu. Iha loron justiça nian, ema Ninive sira sei hamriik hasouru derasaan ne’e hodi tesi lia todan ba nia, basá sira halo penitência wainhira sira rona Jonas nia liafuan; maibéiha ne’e iha Ida nebé boot liu fali Jonas. Iha loron justiça nian, liurai feto reino tasi mane nian sei hamriik hasouru derasaan ne’e hodi tesi lia todan ba nia, basá nia mai housi rai ikun atu rona Solomão nia matenek; maibé iha ne’e iha Ida nebé boot liu fali Solomão!”

Lia Maksoyn.

Leave a Reply

Your email address will not be published. Required fields are marked *