shadow
Diocese de Dili > NOTÍCIAS > LETURA DIÁRIA > Terça-Feira, XVI Semana iha Tempo Comum

Terça-Feira, XVI Semana iha Tempo Comum

ANO B

 

Primeira Leitura                                                              Miq. 7. 14-15, 18-20

Lia housi Profecia Miqueias nian:

Na’i, ho wé, Ita lori Ita povo, bibi luhan be Ita lima-rohan, nebé moris mesak iha ai-laran, ba rai tetuk be buras nia klaran atu nia bele han du’ut iha Basã no Galaad hanesan iha tempo uluk nian. Halo kmanek oi-oin hanesan iha loron nebé imi sai housi Egipto. Maromak ida nebé mak hanesan Itaboot, nebé hamos salan no perdua hahalok áat povo resto ne’e nian nebé Ita liman-rohan? Maromak nebé la rai hirus tan hakarak tebes laran-luak. Nia sei fila oin mai ami no sadi’a ami, rai iha Ita ain okos ami nia hahalok áat, soe ba ba tasi kle’an ami salan hotu. Ita hatudu Ita laran metin ba Jacob, Ita laran di’ak ba Abraão tuir Ita hakotu lia ho ami nia bei-ala sira, housi tempo uluk nian.

Maromak Futar Lia.

 

Salmo Resposorial                                                                                                            Sal. 84(85). 2-4, 5-6, 7-8, 21-23 (R. 8ª)

Refrão : Na’i, hatudu mai ami Ita laran di’ak!!! Repete-se

 

Na’i, Ita haraik bensa ba Itaboot rain,

Ita haraik hikas sorti ba Jacob,

Ita perdua Ita povo nia hahalo áat,

Ita hamos nia salan hotu;

Ita hatun Ita laran nakali,

Ita la tuir Ita laran hirus. Refrão

 

Maromak, ami Maksoyn, hafoun fali ami,

Halakon tiha Ita laran hirus be hasouru ami.

Ita laran hirus sei rohan laek karik,

Ita sei rai hirus housi otas ba otas? Refrão

 

Ita sei la fó hikas fali moris mai ami atu

Ita povo haksolok iha Ita?

Na’i, hatudu Ita laran-luak mai ami,

No haraik Ita salvação mai ami. Refrão

 

Aklamação                                                                                                                                                                                  Jo. 14. 23

Refrão : Aleluia, Aleluia! Repete-se

                  Ema nebé hadomi Ha’u, sei halo tuir Ha’u nia liafuan;

                  Ha’u Aman sei hadomi nia, Ami sei mai hela ho nia. Refrão

 

Evangelho                                                                                                                                                                            Mt. 12. 46-50

Na’i Jesus Cristo nia Evangelho nu’udar São Mateus haktuir :

Iha tempo neba, wainhira Jesus sei ko’alia daudaun ba ema lubun boot, Nia inan ho Nia mau alin sira to’o mai iha liur hodi buka atu ko’alia ho Nia. Ema ida dehan ba Nia: “Ita nia inan no Ita nia mau alin sira hakarak ko’alia ho Ita”. Jesus hatan ba ida nebé ko’alia ba Nia: “Sé mak Ha’u nia inan, se mak Ha’u nia maun alin sira?”

Hafoin Nia lolo liman ba nia escolante sira hodi dehan: “Sira ne’e mak Ha’u nia inan no Ha’u maun alin sira. Basá ema hotu nebé halo tuir Ha’u Aman Lalehan nia hakaran, ema ne’e mak Ha’u nia maun, Ha’u nia feton no Ha’u nia inan.”

Lia Maksoyn.

Leave a Reply

Your email address will not be published. Required fields are marked *