shadow
Diocese de Dili > NOTÍCIAS > REFLEXÃO > IMI FO HAN SIRA BA

IMI FO HAN SIRA BA

2 RS. 4, 42-44; Ef. 4, 1-6; JO 6, 1-15

 

Maun alin doben sira hahalok natural ida nebe basica tebes mai ita mak HAN. HAN hodi hetan energia atu bele moris nafatin. Nune’e naturalmente entre ita nia preocupação boot no basica sira be ita ema sira iha ida mak “preocupa atu hetan hahan naton ba moris ne’e. Loro-loron ita hotu serviço atu garante ita nia necessidade ida ne’e ka atu hakonu ita nia necessidade ida ne’e. Husi ita nia esforço ne’e balun hetan barak, balun hetan naton, balun hetan naresin no balun susar tebes atu hetan, balun la hetan liu kedas buat ruma atu han netik”.

Maromak ninia futar liafuan domingo ida ne’e nian hatudu lori ita ba reflete kona ba realidade ne’e. Hahu kedas ho Maromak nebe hatudu mo ninia preocupação be hanesan ho ita ema sira, liu liu Maromak preocupa ba ita hotu, preocupa ba ita nia diak. Na’i Maromak preocupa atu ita ema sira bele iha buat ruma hodi han. Ida ne’e laos preocupação baibain ida maibe preocupação ida kona ba moris, Maromak hakarak atu ita hakonu ita nia necessidade han nian hodi ita bele moris ba nafatin. Ne’e katak Maromak preocupa ho ita nia moris, Maromak hakarak atu ita moris nafatin ba nafatin. Maromak hakarak ema sira moris, laos mate. Maromak hakarak ema sira labele hamlaha, maibe iha netik buat ruma atu han loron ba loron hodi halao ninia moris.

Iha primeira leitura iha situação ema sira tempo neba nian be hasoru realidade terus hamlaha Na’i Maromak liu husi ninia profeta Eliseu dehan ba ema nebe lori hahan ka iha hahan “Fo han sira”. Buat saida deit mak imi iha ou halo oinsa deit ba mos imi buka fo han sira. Nune’e mos mak ita rona iha Evangelho ohin nian. Nai Jesus dehan ba ninia apostolo sira wainhira hare katak ema sira be lao tuir nia ne hamlaha ona ou laiha buat ruma atu han netik, “Imi fo han sira”! Maromak preocupa ho ita nia situação terus hamlaha nian hodi fo han ita tamba Maromak hadomi ita. Buat nebe halo Maromak haruka sira nebe iha aihan ou ninia ema sira be lao hamutuk ho nia atu fo han maluk sira nebe hamlaha ne’e mak Maromak ninia laran be nakonu ho misericordia, nakonu ho domin. Maromak la fo han ita atu ita bele lao tuir nia deit, maibe Maromak fo han ita uluk nanain tamba deit Maromak hanoin ita, hadomi ita.

São Paulo iha segunda leitura husu mai ita atu ita buka haburas hahalok Maromak ninian ne’e iha ita le’et. Nia dehan “Imi buka tulun malu lolos ho Domin”. Katak nudar sarani ita buka tulun malu no halo buat hotu uluk nanain tamba domin laos tamba buat seluk. Domin mak tem que sai motivo no we matan mai ita iha ita nia moris hamutuk. Domin mak tem que dudu ita atu ita hanoin ema seluk, liu liu sira be kiak, kiik no hahan laiha hodi buka atu lolo liman ba sira no tulun nafatin sira.

Maun alin sira ohin loron iha realidade ita nia mundo nian ita hare katak iha companhia bobot mak produz hahan no sira produz hahan sira nebe iha mos ninia prazo atu han nian, iha ita barak mak halo to’os hodi mos produz hahan iha quantidade boot, ita balun fali fa’an hahan atu bele mos hetan netik buat seluk balun nundar troka hodi bele uza ba ita nia moris. Geralmente ita hotu liga ho hahan, hahu kedas husi ita ninia necessidade atu han ne’e ba to’o produção no preparação hahan ho quantidade nebe boot. Quase loro-loron ita iha ligação ho hahan, quer iha hahalok HAN no mos iha prepara hahan, iha hare ema seluk nebe hahan naresin to’o ba sira be iha hahan naton los deit atu han loron ida dala ida no sira nebe laiha liu kedas atu han netik.  Nudar ema ita hotu hasoru no moris iha realidade ida ne’e. Hasoru realidade moris ida hanesan ne’e Maromak ninia futar liafuan ohin nian nebe ita hotu foin mak rona dadaun hanorin ita atu moris ho dalan ka Maneira ida especial laos nundar ema comum deit nune’e maibe tem que hasoru ka moris iha realidade ne’e nundar sarani ou ho maneira ka carater ema sarani sira nian be hatudu iha halo tuir Maromak ninia hahalok no hakarak sira, katak HAN HEMU SUKAT, LA ESTRAGA NO HATENE FAHE BA MALU, LIU LIU FAHE BA MALU NAFATIN HO MALUK SIRA SELUK NEBE SUSAR TEBES ATU HETAN AIHAN BA SIRA NIA MORIS, LAIHA LIU BUAT HAN NO HEMU RUMA ATU HAN HODI MORIS.

Ita halo tok reflexão concreta balun tuir roman Maromak ninia futar liafuan be ohin ita rona ne’e hodi husu ba ita ida idak ninia an. Durante ne’e Hau han hemu sukat ka hau han hemu estraga deit?; hau han hemu hanoin hodi fo tulun ka fahe ho ema seluk nebe precisa hahan atu han ka hau han kaan ten? Hau preocupa deit ho hahan ba hau nia an mesak ka hau preocupa mos atu ema seluk be kiak ba hahan bele hetan netik aihan ba sira moris? Hodi reflete nune’e ita bele descobre ita ninia-an nudar sarani duni ka seidauk sarani lolos? Moris tuir ona Maromak ninia Futar Liafuan ohin nian ka sedauk, hodi reflete nune’e hafoun no hamosu duni hakarak moris lolos nundar sarani ida ne’e iha ita-an kona ba ita nia relação ho maun alin sira no ho hahan be ita buka, ita han no ita halibur ba ita nia moris. Hodi reflete nune’e halo ita descobre ita nia-an laos deit hanesan ema ida nebe hatene han no hemu, hatene realidade ema barak kuran ba hahan ne’e. maibe liu liu descobre an hanesan ema sarani ida nebe iha ninia moris halo tuir Maromak nia hakarak hodi tulun malu no fahe ba malu ho ema sira nebe susar ba hahan iha sira nia moris.

Hare fali ba realidade moris social nian buat nebe mosu uluk liu iha hau nia hanoin hodi tuir hau ita tem que hanoin kedas mak pergunta ida ne’e, tamba sa ohin loron ita hahu ona descobre fali maluk balun ba buka hahan iha lixeiro atu han, uluk laiha? Tamba sa hahan barak soe deit ba lixo? Realidade ida ne’e tamba sira nia salan ka keta tamba ita hotu nia salan karik. Nundar ema sarani hau hanoin inutil ita buka salan ne’e hodi fo salan ba malu, util liu mai ita hau hanoin mak katak ita percisa reconhece katak ne’e ita hotu ninia salan, nee pecado social ida tamba ida ne’e mosu husi ita ema sira nia karak ba malu, la hanoin malu, egoista, falta de caridade, falta de misericordia, falta de atenção no seluk seluk tan.

Maromak ohin iha ninia laran luak fanu fali ita no husu fali ita atu fila ba dalan los moris sarani nian be hatudu moris Maromak oan sira nian iha ita nia; han hemu fahe ba malu, tau atenção ba sira nebe kiak liu, kuran liu no percisa liu, habot iha ita leet laran luak, caridade no domin no tulun ba malu nafatin ba nafatin. Amen.

Bidau, DCAB, 29.07.18, Pb.

Leave a Reply

Your email address will not be published. Required fields are marked *