shadow
Diocese de Dili > NOTÍCIAS > REFLEXÃO > REFLEXÃO & LEITURAS DOMINGO COMUM XVII/Ano B/2018

REFLEXÃO & LEITURAS DOMINGO COMUM XVII/Ano B/2018

ANO B

 

Primeira Leitura                                                                   2 RS. 4, 42-44

Lia housi Livro Liurai sira nian:

Iha loron hirak nebá, ema ida mai housi knua Baal-Saliza lori, mai fo Maromak emar Eliseu, pão nebé sira halo ho ai-fuan foun nian. Nia lori pão cevada fuan ruanulu, ho trigo foun ka’ut ida. Eliseu dehan ba nia atan: “Fo han ema sira ne’e hotu”. Maibé, nia atan hateten ba nia: “Oin sá mak ha’u bele fo han ema atus ida, ho de’it buat witoan ne’e?” Eliseu dehan teni: “Fo han ba ema sira ne’e hotu, basá, Maromak dehan: ‘Sira sei han to’o bosu, to’o resin’”. Nune’e, nia atan fo han duni sira. Ema sira ne’e han duni to’o bosu, nu’udar Maromak lia tun nanis.

Maromak Futar Lia.

 

Salmo Responsorial                                                                                                                            Sal. 144(145), 10-11. 15-16. 17-18

Refrão : Na’i, Ita loke Ita liman, Ita Boot fo han ami!!! Repete-se

 

Na’i, ema sei fo agradece Ita Boot;

Ita emar sei hahí Ita Boot.

Sira sei haklaken Ita Reino nia glória,

sira sei haktuir buat foun hirak Ita halo. Refrão

 

Ho fiar metin, sira foti matan ba Ita;

to’o loron, Ita haraik ai-han ba sira hotu.

Na’i, Ita loke liman hodi fo han halo bosu

buat moris tomak. Refrão

 

Na’i, halo buat tomak tuir lialós,

halo buat hotu ho laran luak;

besik ba ema be harohan,

besik ba ema sira hotu be harohan tebes. Refrão

 

Segunda Leitura                                                                                                                                                                                 Ef. 4, 1-6

Lia housi São Paulo nia surat ba sarani sira iha Êfeso:

Maun alin sira: Ha’u dadur hela, tamba Maromak; ha’u dehan hela ba imi atu moris tuir lolós dalan nebé Maromak hatudu imi atu la’o tuir. Imi sei moris hodi hatene haraik-an; imi sei moris ho laran maus, imi sei buka hatene terus ba malu. Imi sei hatene terus malu ho laran luak. Imi sei haka’as-an atu moris ho laran ho neon ida de’it, hodi hamutuk iha dame laran. Imi isin lolon ida de’it, Espirito ida de’it, nu’udar ho laran metin imi hein moris foun ida de’it. Na’i ida de’it, fiar ida de’it, Baptismo ida de’it. Maromak ida de’it, nebé ema hotu-hotu nia Aman, boot liu hotu, horik iha ema tomak, serviço iha ema hotu no iha ema hotu hetan Nia.

Maromak Futar Lia.

 

Aclamação

Refrão : Aleluia, Aleluia! Repete-se

                  Profeta boot ida mosu iha ita leet;

                  Maromak mai haré nia povo. Refrão

 

Evangelho                                                                                                                                                                                           Jo. 6, 1-15

Na’i Jesus Cristo nia Evangelho nu’udar São João haktuir:

Iha tempo nebá, Jesus liu tiha ba tasi Galileia, katak tasi Tiberíades nia sorin balu ba. Ema lubun boot tuir Nia, tan sira haré milagre hirak Jesus halo ba ema moras. Jesus sa’e tiha ba foho leten, hodi tur hamutuk ho nia Escolante sira iha nebá. Páscoa, katak judeu sira nia festa, besik daudaun ona. Jesus haré katak, ema lubun boot mai hasouru Nia, Nia lia tun ba Filipe, hodi dehan: “Ita sei sosa lós pão iha nebé, hodi fo han ema sira ne’e?” Jesus ko’alia nune’e atu koko nia, basá, Nia hatene tiha ona atu halo sá. Filipe hatán, dehan: “Pão osan atus rua nian mos sei la to’o, atu bele ida-idak simu baluk oan ida”. André, Simão Pedro nia alin, hateten ba Jesus: “Iha ne’e, labarik oan ida iha pão cevada fuan lima ho ikan kiik-oan rua. Maibé, ne’e to’o oin sá ba ema sira ne’e hotu?” Jesus lia tun, dehan: “Haruka ema sira ne’e tur tiha hotu”. Iha fatin nebá, du’ut barak. Ema sira tur tiha hotu. Mane de’it, sura to’o besik rihun lima. Jesus kaer tiha pão hirak ne’e, fo agradece Maromak, hodi fahe ba ema sira. Ikan sira mos Jesus halo hanesan ne’e. Ema sira hotu han to’o bosu. Hafoin, Jesus lia tun ba Escolante sira: “Imi ba halibur baluk oan sira hotu be han la hotu, atu keta lakon rohan oak ida”. Escolante sira halibur duni pão cevada fuan lima nia rohan-rohan sira be ema han la hotu, hodi tau hamutuk ba luhu sanulu resin rua. Haré milagre nebé Jesus halo, ema sira hateten ba malu: “Tebes, Ida ne’e mak Profeta nebé atu mai iha mundo”. Maibé, Jesus hatene katak, sira atu mai hola Nia hodi foti ba Liurai, Nia hadok-an mesa-mesak fali ba foho.

Lia Maksoyn.

 

HANOIN KONA BA Ó RASIK NIA FIAR:

Iha Evangelho nia leitura ohin nian, ita iha ezemplu ida hosi Eukaristia. Eukaristia signifika agradesimentu. Mai ita haree ba liafuan ne’e nia signifikadu. Obrigadu – Agradese Maromak ba buat nebé Nia fó mai ita. Fó – Fó tutan buat nebé Maromak fó mai ita. Ezemplu iha Evangelho ne’e dehan katak saida mak bele mosu bainhira ita fó ba malu buat nebé ita iha. Milagre sei bele mosu. Sei iha barak, to’o ba ema tomak no sei resin tan.  Jesus hatene tiha ona resposta maibé Nia husu nafatin ba nia disípulu sira, “Halo nusá mak ita atu bá fó han ema sira ne’e tomak?’ Filipe hatán, ‘Ho osan nebé ita iha, ita la bele satisfás ema lubun ne’e tomak.’ André dehan, ‘Iha labarik mane oan ida fó paun fuan lima no ikan rua maibé halo nusá mak ho ninia buka’e/aihán uitoan de’it ne’e ita bele fó han no habosu ema lubun boot ne’e.’ Haree hanesan André halo hela kasuada ho labarik mane oan nia aihán uitoan ne’e. Maibé Jesus simu no agradese labarik mane oan nia oferta/sasolok. Maromak fahe duni aihán labarik mane oan fó ba ema lubun boot nebé hakarak han. Ema tomak han to’o bosu no sei resin barak tan.   Evangelho ne’e nia lala’ok hatudu ita kona ba Maromak nian domin rohan laek ba ita tomak. Dala barak ita hanoin buat nebé Na’i Maromak fó mai ita la to’o ba ita atu fahe ba ema seluk. Dala barak ita la fahe sasán ita iha, ita ta’uk atu ema nebé iha liu hamoe ita ka ita lakohi duni atu fahe. Ita karak fó tutan buat nebé ema fó mai ita eh rai tomak buat nebé ita simu. Ita bele sai hanesan labarik mane oan fó buat nebé nia iha no husik mak Jesus hamosu buat seluk. Ho oferta uitoan ita fó, Jesus bele hamosu milagre, hodi halo ema tomak bele iha natón.

 

Evangelho – Jo 6,1-5

Liturgia propoin mai  ita ohin (no durante domingu ruma tan) leitura kpítulu 6 Evanjellu nu’udar João haktuir – katekeze kona-ba Jesus, Paun moris nian. Iha parte dahuluk Evangelho nian (kf. Jo 4,1-19,42), João aprezenta Jesus nia atividade atu bele kria no fó moris ba ema nune’e, sai Ema Foun, livre husi egoísmu no salan, ho Espíritu nia kbiit, bele tuir Jesus no moris dinámika Jesus nian – katak iha domin ba Aman no maun-alin sira. Parte dahuluk ida-ne’e fahe ba “livru” rua– “Livru Sinál sira nian” (kf. Jo 4,1-11,56) no “Livru Oras nian” (kf. Jo 12,1-19,42). Iha “Livru Sinál sira nian” (kf. Jo 4,1-11,56), autór Evangelho da-4 nian, hodi foti símbolu signifikativu sira ( “bee” – kf. Jo 4,1-5,47; “paun” – kf. Jo 6,1-7,53; “naroman” – kf. Jo 8,129,41; “bibi-atan” – kf. Jo 10,1-42; “moris-hi’as” – kf. Jo 11,1-56), espoin ninia katekeze kona ba Jesus nia asaun ba ema sira. Nia aprezenta Jesus nu’udar proposta moris loos nian ba ema no konvite atu simu no asimila moris ne’e.  Iha kapítulu 6 – ne’ebé ohin ita hahú lee – João aprezenta Jesus nu’udar Paun ne’ebé habosu ema nia hamlaha ba moris. Epizódiu ne’ebé ohin haktuir mai ita akontese jeografikamente iha Bee-lihun Tiberíades nia sorin bá (iha kapítulu molok Jesus iha Jerusalém, iha sentru instituisaun judaika; oras-ne’e, lahó tranzisaun, nia mosu iha Galileia, hakur liu “tasi” Galileia nian ba sorin seluk). Husi parte kronolójika, João nota katak besik festa Páskua, festa importante liu kalendáriu relijiozu judaiku, ne’ebé selebra Maromak nia Povu nia libertasaun husi opresaun Ejitu nian.

 

Mensagen

Leitura ida maski superfisiál de’it ba testu, bele hatudu paralelu interesante ruma entre lala’ok sira multiplikasaun paun nian no libertasaun Maromak nia Povu nian husi eskravidaun Ejitu nian, ho Jesus nia papél nu’udar Moisés, libertadór povu nian. Iha kedas nia hahú maka hatudu faktu ida-ne’e, xave leitura ida atu komprende katekeze ida-ne’e: João hakarak aprezenta Jesus nia asaun nu’udar asaun libertadora ida; halo Povu sai husi rai atan nian hodi bá rai liberdade nian. Katekeze ne’e dezenvolve liuhusi pasu oioin:

  1. Hahú referénsia ida ba “pasajen tasi nian” (ne’ebé iha realidade bee-lihun ida); referénsia ida ne’e bele alude ba pasajen Tasi Mean nian ne’ebé Moisés ho Povu livre husi Ejitu halo (kf. Ex 14,15-31). Objetivu finál Jesus nian maka, loos duni, halo Povu ne’ebé akompaña nia hakat husi rai atan nian bá rai liberdade nian.
  2. Hanesan akontese ho Moisés, hamutuk ho Jesus bá ema lubun-boot ida. Ema lubun-boot ne’ebé akompaña Jesus pretende “haree milagre sira ne’ebé Nia halo ho moras sira” (vers. 2). Liafuan gregu ne’ebé uza iha-ne’e (“asthenês” – “ema-moras”) atu dehan, enjerál, ema ruma ne’ebé iha situasaun kamerik/frakeza boot nia laran. Ema lubun-boot tuir Jesus, atu haree sinál sira ne’ebé nia halo no reprezenta ema nia libertasaun husi ninia frakeja no frajilidade. Ne’e maka Povu ida marka ho opresaun, ne’ebé hakarak koko libertasaun. Sira komprende tiha ona katak Jesus mesak, nu’udar libertadór, sei konsege tulun sira supera sira-nia kondisaun mamukit no eskravidaun nian.
  3. Jesus – ita-nia testu dehan – sae ba “foho ida” (vers. 3). Referénsia ba “foho” lori ita ba kontestu Aliansa Sinai nian no ba foho ne’ebé Maromak oferese ba Povu, liuhusi Moisés, ukun-fuan sira. Hateten katak Jesus sae ba “foho” signifika hateten katak liuhusi Jesus maka sei realiza Aliansa foun entre Maromak no Povu ema livre nian ne’ebé, ho Jesus, “hakat tasi” iha diresaun bá rai liberdade nian.
  4. Referénsia ba Páskua ne’ebé besik daudaun (vers. 4) sai referénsia folin-laek, se sira la hela iha kontestu libertasaun Povu nian husi moris-atan. Iha Jesus nia époka, Páskua maka festa libertasaun no konstituisaun Povu Maromak nian; maibé mós festa ne’ebé haklaken tempu futuru ida iha-ne’ebé Mesias sei liberta ho modu definitivu Maromak nia Povu. Iha tempu ne’e, Povu tenke sae ba Jerusalém atu iha “foho” uma-orasaun nian, selebra libertasaun; iha kontrapartida, ema lubun-boot tuir Jesus ba “foho” seluk, iha tasi sorin seluk…. Povu hahú liberta an husi naha-todan instituisaun judaika no komprende katak ho Jesus maka sei inaugura tempu foun liberdade no dame nian.
  5. Ema lubun-boot ne’ebé tuir Jesus hamlaha no la soi ai-han ruma (vers. 5-6). Referénsia ne’e lori ita, dala ida tan, ba Êzodu, ba rai-fuik maran, bainhira Povu ne’ebé la’o bá rai liberdade nian sente hamlaha. Entaun, Maromak mak hatán ba Povu nia nesesidade no fó ai-han ba nia ho abundánsia; iha ne’e, Jesus ne’ebé nota ema lubun-boot nia nesesidadede buka atu fó solusaun. Halo nune’e, Nia hatudu Maromak nia domin no laran-sadia, nafatin matan-moris ba nia Povu nia nesesidade sira.
  6. Solusaun ida-ne’ebé maka Jesus sei fó ba ema lubun-boot nia “hamlaha”? Bainhira buka solusaun, Jesus envolve komunidade eskolante/dixípulu sira-nian (“Ita bele sosa paun iha ne’ebé loos atu fó han ema sira ne’e?” – vers. 5). Jesus nia komunidade (dixípulu sira no konserteza inklui Nia) tenke sente responsavel ba ema sira nia “hamlaha” no tenke sente katak ninia responsabilidade no misaun maka habosu “hamlaha” ne’e. João nota katak Jesus tau kestaun ne’e ba eskolante sira (Filipe maka reprezentante) atu “koko” sira (vers. 6). Bele mós hatuur kestaun ho forma tuimai ne’e: oinsá maka komunidade dixípulu siranian – forma an iha Jesus nia eskola no valór sira – hakarak hatán ba mundu nia hamlaha? Hodi uza sistema ekonómuki agora nian, ne’ebé bazeia ba egoízmu no kbiit osan nian no tau soin sira iha ema balun de’it nia liman, hodi hamosu lójika ida opresaun nian, dependénsia no nesesidade nian? Karik ida-ne’e maka sistema mundu foun no livre ne’ebé Jesus hakarak harii? Jesus nia eskolante sira halo tuir liña sistema opresór ida-ne’e, bazeia ba sasosak (hahalok sosa nian), fafa’an 9hahalok fa;an nian) no lukru, ka sira komprende ona katak Jesus iha proposta foun atu halo, ne’ebé sai bee-matan libertasaun no vida abundánsia nian ba ema hotu?
  7. Filipe konstata imposibilidade atu rezolve problema, iha kuadru ekonómiku ne’ebé vigora hela. “Osan atus rua mos sei la to’o atu ema ida-ida simu paun baluk oan ida” (vers. 7). Osan/denáriu ida vale saláriu baze loron ida serbisu nian; nune’e, osan serbisu liu tinan sorin nian la to’o atu rezolve problema. Ho liafuan seluk: hodi konfia iha sistema ne’ebé vigora hela (sosa, fa’an, katak sistema ekonómiku lukru egoísta nian) imposivel rezolve problema kona-ba ema-hamlaha sira nia nesesidade. Nune’e, Jesus nia komunidade hetan konvite, atu abandona sistema ida-ne’e no buka seluk…
  8. André fali, haree solusaun diferente ida (vers. 8-9). Apóstolu ida-ne’e reprezenta, iha Jesus nia komunidade, kategoria ema sira nian ne’ebé adere ba Jesus ho konvikasaun, iha intimidade ho Jesus no nune’e’, konxiente liután ho Jesus nia proposta sira. Maski nune’e, André ladún konvensidu ho rezultadu sira (“ne’e to’o oinsá loos ba ema barak ne’e?”). Ba André, di’ak tebes bele hetan sistema seluk diferente husi sistema esploradór; maibé buat ne’e la rezulta… Jesus sei fó prova katak posivel hetan sistema seluk ne’ebé fahe moris no halakon lójika esplorasaun nian.
  9. “Labarik” nia figura ne’ebé mosu de’it iha sena multiplikasaun paun sira nian iha João nia versaun maka figura ida presiza-laek husi pontudevista narrasaun nian: ba rezultadu finál, hanesan de’it se maka maksoik paun no ikan nian: labarik ida ka adultu ida. Entaun, tanba sá mak João insiste atu ko’alia kona-ba labarik ida? Tanba figura “labarik nian” signifikativa liu: ba ninia idade no ba ninia kondisaun, nia ema fraku ida, husi aspetu fíziku no sosiál. Nia reprezenta Jesus nia komunidade nia kamerik/frakeja hasoru mundu nia nesesidade boboot sira. Liafuan gregu ne’ebé João uza atu ko’alia kona-ba labarik signifika “labarik” no “atan”: komunidade ne’ebé “labarik” ne’e reprezenta, iha mundu nia oin nia maka grupu sosiál haraik-an ida, lahó pretensaun ruma ba podér no ukun, dedika an atu serví ema sira. Komunidade simples no haraik-an, simu bolun ba servisu, bolun atu rezolve ema kiak sira nia nesesidade no harii sistema foun, sistema libertadór. Sá looos sistema idane’e?
  10. Númeru “lima” (paun) no “rua” (ikan), la mosu de’it nune’e: ninia tatusik/adisaun fó “hitu” – númeru ne’ebé signifika tatomak/totalidade… Katak: iha partilla totalidade nian ne’ebé komunidade soi maka bele hatán ba ema sira nia nesesidade. Ne’e maka totalidade baluk nian no ho tipu lahanesan maibé, se tau ba maun-alin sira nia servisu, bele habosu mundu nia hamlaha.
  11. Kona-ba hahán ne’ebé komunidade hasae, Jesus “fó agradese” (vers. 11). “Fó agradese” signifika rekoñese katak soin sira maka prezente mai husi Maromak. Ora, rekoñese katak sira maka don Maromak nian signifika maksoik emak tenke husik nia, atu bele rekoñese katak sira maka don gratuitu ne’ebé Maromak oferese ba ema; no Maromak la oferese ba balun no lae ba seluk… “Fó agradese” signifika rekoñese katak soin ne’ebé simu pertense ba ema hotu no sira ne’ebé soi maka adiministradór de’it ho knaar atu tau ba maun-alin hotu nia dispozisaun, ho gratuidade hanesan oinsá nia simu soin sira ne’e. Nune’e, soin sira livre husi ema eskluzivu de’it nia posesu, bele sai Maromak nia don ba ema hotu. Ida-ne’e maka sistema ne’ebé Maromak hakarak harii iha mundu; no komunidade sarani simu bolun atu fó sasin kona-ba lójika ida-ne’e. 12. Habosu tiha mundu nia hamlaha, liuhusi soin sira ne’ebé komunidade simu husi Maromak no tau atu serví ema hotu, eskolante sira simu bolun ba knaar seluk. Iha baluk resin sira ne’ebé labele lakon, maibé tenke sai hun ba abundánsia seluk. Presiza nafatin hakbarak domin no paun… No komunidade, hatene tiha Jesus nia projetu, tenke uza buat ne’ebé soi atu kontinua oferese moris ba ema sira. Referénsia ba luhu.
  12. Ne’ebé eskolante sira halibur bele sai aluzaun ida ba Israel (tribu 12): se komunidade dixípulu sira-nian hatene partilla buat ne’ebé simu husi Maromak nia bele habosu Povu tomak nia hamlaha (vers. 12-13). 13. Sira balu ne’ebé testemuña multiplikasuan paun no ikan nian konxiente katak Jesus maka Mesias ne’ebé tenke mai atu fó moris iha abundánsia ba nia Povu no hakarak halo nia sai liurai (vers. 14-15). Jesus la aseita… Nia la mai atu rezolve mundu nia problema hodi harii sistema ida autoridade no podér nian; maibé nia mai konvida ema sira atu moris iha lójika ida partilla no solidariedade nian, ne’ebé sai don no servisu iha haraik-an ba maun-alin sira. Ho forma ida-ne’e maka Nia propoin – ho eskolante sira nia kolaborasaun – atu elimina sistema opresór, responsavel ba hamlaha no mamukit. Mundu foun ne’ebé Jesus mai propoin la hatuur iha lójika ida podér no autoridade nian, maibé iha servisu simples ne’ebé lori atu partilla moris ho maun-alin sira.

Pasajen ne’ebé ohin propoin mai ita hakarak apresenta Maromak nia projetu ne’ebé Jesus realiza nu’udar projetu libertasaun nian, ne’ebé sei elimina opresaun no harii mundu foun ema livre sira nian, salva husi egoízmu no ho kbiit atu hadomi no fahe. Hasoru sistema bazeia ba lukru no esplorasaun, Jesus propoin atitude foun ida. Presiza troka egoízmu ho domin no partilla. Jesus nia komunidade iha funsaun atu deskobre lójika ne’e, simu no propoin ba mundu. Nia tenke aprende katak soin sira maka Maromak nia don, ba ema hotu. Halo nune’e, nia harii daudaun sistema foun no liberta ema husi kondisionamentu egoísta sira ne’ebé hamosu injustisa, nesesidade, falta, frakeza, taterus. Sé hakarak akompaña Jesus iha dalan ne’e, sei hakat husi moris-atan lukru nian bá liberdade partilla nian, servisu nian, domin nian ba maun-alin sira. (Pe. Ruben)

Leave a Reply

Your email address will not be published. Required fields are marked *