shadow
Diocese de Dili > NOTÍCIAS > HOMILIA DO BISPO > ‘Fahe Buat Ne’ebe Ó Iha ba Ema Ne’ebe Laiha’

‘Fahe Buat Ne’ebe Ó Iha ba Ema Ne’ebe Laiha’

Wainhira ó fo ó mos sei simu, hodi fo mak ita bele simu, fo barak ó simu barak ó fo ituan ó mos sei simu ituan. Ohin ita tuir didiak mensagem liu husi primeira leitura no Evangelho ne’e fo liu énfase ka encoraza katak Maromak halo milagre tanba iha ema diak nebe laran diak no laran luak ba ninia maluk sira. No iha segunda leitura São Paulo dehan; laran luak mak sai base, laran luak mak sai fundamento ka ai-rin ba sarani ida nia vida. Drama nebe haktuir mai ita iha primeira leitura ohin dezemvolve kona ba caristia ida terível, ko’alia kona ba rai hamlaha. Hamlaha bo’ot situação ida nebe susar tebes atu bele moris. Iha tempo ne’ebe ita bolu caristia ka hamlaha hirak ne’e mak ita rona iha primeira leitura atan ne’ebe apresentea ba Eliseu trigo kaut ida no pão cevada fuan ruanulu tanba nia hakarak atu partilha ho ema ne’ebe hamlaha. Wainhira nia apresenta ba profeta no profeta dehan; fo ba ema ne’ebe hamlaha. Pão katak don ida ne’ebe Maromak tau iha ema nia liman. Hanesan iha livro Probérvio dehan; ema ne’ebe laran luak Maromak sei haraik bensa tanba nia fahe ninia pão ho ema kiak sira “Homem de olhar generoso será abençoado purque da a sua pão ao pobre”. Eliseu iha situação ne’e nia hakarak convence duni atan ida ne’ebe mai husi Baal-Saliza ne’e atu fo nia pão ba kiak sira. Maibe atan ne’e hatan; oinsa mak ho pão uituan ha’u bele fo han ema ida barak hanesan ne’e? Profeta dehan ba kiak nune’e; ó lalika preucupa pão ne’e barak la oituan, ó precisa de’it mak buat ida; ‘confiança’. Wainhira confia iha Maromak imi sei han to’o bosu no sei resin tan. Ida ne’ebe la tau confiança iha providência Maromak ninian nia sei la koko, sei la hare Maromak ninia diak. Iha ita ema ida-iak nia moris mos ita bele dehan; ema ne’ebe generoso nia sei hetan nafatin maibe ema ne’ebe karak sei la hetan. Maromak hatudu ninia diak hirak nee liu husi ema hirak ne’ebe confia iha ninia liafuan. Ne’e duni milagre ida ne’e mosu tanba iha atan oan ida nebe hatudu ninia gesto de generosidade. Tanba nia mos halo tuir profeta nia hanourin; ‘fahe ba buat ne’ebe ó iha ba ema ne’ebe laiha’. Ohin loron mos possível wainhira ita mos iha coragem atu confia. Tau ba kotuk buat ne’ebe ita nia lógico ema nian dalabarak teoria no hanoin ita ema ninian dalabarak ita hanoin buat ida fo ne’e ita sempre iha razão atu justifica. Maibe Evangelho Jesus hanourin pronto ida ne’e laos atu usa teoria barak maibe fuan, ita nia laran luak, ita nia compaixão.

Evangelho ita foin rona mos kona ba milagre ida ne’ebe ita dehan hanesan teb-tebes ho buat ne’ebe ita rona iha primeira leitura. Evangelho manifesta escolante sira nia fiar. Escolante sira mos fiar ki’ik. Uluk atan oan ne’e sidauk hare hetan Maromak, rona de’it profeta nia mos la brani atu halo. Agora ita hare escolante sira agora moris ka lao hamutuk ho Jesus sei iha dúvida, fiar mos sei ki’ik. Wainhira Jesus haruka sira atu fo han ema wain ne’e sira hatan; oinsa mak ha’u bele fo han ba ema wa’in ne’ebe ho ai-han oituan ida ne’e ‘como posso com isto dar a comer a tanta gente’. Dala barak atitude ida ne’e ita iha; se ha’u fo tiha ba ó hau fali! Ha’u halo tiha ba nia oinsa ho ha’u nian fali! Karik ita mos hanesan ho atan ne’ebe iha tempo eliseu ninian, apóstolo Filipe ne’ebe ita rona iha evangelho, iha ita nia tempo karik reagem iha situação sira ne’e ita sempre halo buat ne’ebe fácil sai ita nia ibun mak ida ne’e; ‘Ha’u Fali, be ha’u nian fali se mak sei tau matan’.

Hamlaha fenómeno ida ne’ebe mundo continua enfrenta maske ema koko ho matenek, ho estrategia oi-oin maibe laiha solução parte hotu hanesan ema dehan; ibun ne’ebe atu han ne’e barak mas precurço insufuciente. Tan ne’e ita nia teoria hirak ne’e dala barak aumenta ita nia dúvida. Karik buat ne’ebe ita bele hanoin dalaruma ita hanoin precisa iha organização ne’ebe diak bele fo assistência social maibe mos wainhira ita hakasan iha parte seluk miséria mos aumenta ba nafatin. Ida ne’e ita nunca bele resolve, buat ne’e lao ba oin nafatin. Iha mundo ita hare iha média. Jornal ita hare ita nia rain mos ema ne’ebe halerik ba hamlaha continua iha.

Ohin Jesus kaer iha pão fuan 5 no ikan pedasuk hirak ne’e Jesus la fahe direitamente ba ema sira maibe Nia hasae ba Aman hodi harohan hafoin mak Nia fahe ba sira ida-idak. Ida ne’e sinal ida hatudu liu husi Nia fiar atu nune’e ita bele hamutuk ho Na’i Maromak. Ida ne’e mak dehan dalan ba milagre. Dalabarak ita hein milagre oin-sa Jesus hanourin ita atu tau iha ita ida-idak nia neon wainhira ha’u hakasan atu hadia ha’u nia condição moris ho buat ne’ebe ha’u bele. No buat nebe ha’u labele Maromak sei completa. Dalabarak ita hanoin katak ha’u tem que halo buat hotu-hotu, serviço kalan loron atu bele transforma ita nia vida, ita nia sociadade no rain ho ita nia força de’it. Se la ho Maromak nia força dalabarak ita estres. Ohin Jesus dehan; inportante ó fo ó nia melhor buat ne’ebe ó bele fo ó fo sem reserva no buat ne’ebe ó labele halo Maromak sei halo. Maibe se ó mak halo buat hotu tuir ó na hakarak ó sei estres iha fatin de’it. Ne’e duni ita precisa aprende atu colabora ho Na’i Maromak, colabora ho ita nia maluk sira. Wainhira ema hotu husik sira nia hakarak hanoin-an nian, egoismo nian, interesse nia-an de’it bele mana hakarak sira kanten nian mak sira dehan; buat ne’ebe hanoin-an ka karakten nian mak ita hanaran ‘Raís dos males’ domin ba osan mak buat hotu nia hun. Tan ne’e mak São Paulo husik hela mai ita recomendação ruma ne’ebe ohin ita rona iha segunda leitura.

Sarani ida laos hatudu de’it atitude ida ne’ebe quando hatene de’it atu discute, impõe de’it maibe sarani diak ida nia mos aprende atu simu ema seluk nia hanoin, aprende atu simu ema seluk nia opinião, nia tem que hatene katak ema ida-idak iha ninia força nune’e mos ema ida-idak iha nia vida. Sarani ida tem que ba nati tuir Cristo. Iha semana rua tutuir malu ne’e Jesus continua apresenta Nia-An mai ita exemplo de generosidade, renuncia qualquer forma de agressividade e violência procura todos os modos unidade, reconciliação e paz. Ai-han ka pão ne’e bele sai sinal unidade ninian. Wainhira iha meza mak domin sei sai bo’ot, iha mesa mak família bele partilha, iha mesa mak unidade ne’e iha tanba bele ko’alia ba malu ita nia experiência ita nia susar no ita nia ksolok sira. Tan ne’e ai-han sinal de unidade. Maibe ema balu mos dehan ai-han mos dala barak sai sinal de violência, sinal de conflito wainhira ai-han la to’o, wainhira hadau malu ba ai-han, wanhira ai-han ba ema balu de’it. Tan ne’e ba ita sarani Jesus ohin convida ita atu promove ai-han unidade ninian. Generosidade mak ai-han unidade ninian. Ba ita São Paulo mos ohin dehan; tanba sa mak unidade ne’e tem que ssai abut ba ita sarani sira. Ohin Nia fo razão tanba ita hotu pertense ba isin ida de’it (Um so corpo, um so espírito uma so esperança, uma so fé, um so batismo, um so Deus e pae de todos). Nida ne’e mak Jesus hatudu mai ita haleu Altar ida ne’e Pão ne’ebe habosu ita, maibe pão ne’ebe ohin ita hotu precisa mak pão generosidade nian. Ita harohan atu sarani hotu iha ita nia rain atu iata mos bele sente duni necessidade ba ai-han ida ne’e; hamlaha ba ai-han harmonia ninian, ai-han unidade ninian laos ai-han conflito. Ai-han ida ne’e mak ai-han generosidade ne’ebe Jesus fo mai ita liu husi Nia Futar Liafuan no Nia Futar Isin ne’ebe ita continua habosu-an iha Eucaristia.    

Leave a Reply

Your email address will not be published. Required fields are marked *