shadow
Diocese de Dili > NOTÍCIAS > LETURA DIÁRIA > Segunda-Feira, XVII Semana Tempo Comun

Segunda-Feira, XVII Semana Tempo Comun

ANO B

 

Primeira Leitura                                                                    Jer. 13.  1- 11

Lia housi Livro Jeremias nian:

Na’i lia tun mai ha’u nune’e: “ó ba sosa ba ó an hena baluk linho nian ida hodi kesi iha ó knotak, maibe, ó keta habokon nia.” Ha’u sosa duni hena baluk ne’e hodi kesi iha ha’u knotak nu’udar Na’i hateten mai ha’u. dala ida tan Na’i lia tun mai ha’u: “Kaer iha hena baluk nebe ó sosa, be ó kesi iha ó knotak hodi la’o tuir dalan atu ó ba mota Eufrates. Iha neba, ó sei subar hena baluk ne’e iha fatuk kuak ida.” Ha’u ba subar tiha hena ne’e iha Eufrates nia hun nu’udar Na’i hateten tiha ona mai ha’u. liu tiha loron ua’in, Na’i dehan mai ha’u: “ó la’o ba mota Eufrates hodi hola hena baluk nebe ha’u haruka ó subar iha neba.” Ha’u ba duni Eufrates buka hena ne’e hodi hasai tiha nia housi fatin nebe ha’u subar nia. Maibe hena baluk ne’e sai dodok tiha ona, la di’ak ona ba buat ida. Nune’e, Na’i lia tun mai ha’u: “Na’i dehan nune’e; hanesan ne’e mak Ha’u sei harahun Judá be loko-an, Jerusalem be foti-an liu. Povo laran áat ne’e nebe la kohi rona Ha’u liafuan, nebe tuir de’it nia fuan tós hodi halai tuir maromak sira seluk hodi serbi no adora sira, nia sei sai hanesan hena baluk ne’e nebe la di’ak ona ba buat ida. Nune’e mós, hanesan  hena baluk be kesi belit hela iha ema nia knotak, nune’e Ha’u halibur mai Ha’u-an uma kain tomak Israel nian no  uma kain tomak Judá nian – Na’i dehan – atu sira sai Ha’u Nia povo hodi haklaken Ha’u naran, Ha’u rahun di’ak no ha’u glória. Maibe, sira la kohi.”

Maromak Futar Lia.

 

Salmo Responsorial                                                                                                                        Deut. 32. 18-19, 20, 21 (R. cf. 18ª)

Refrão : Ó fila kotuk ba Maromak be halo ó moris!!! Repete-se

 

Ó hakribi fatuk inan be halo ó moris,

Ó haluha Maromak be fó moris ba ó;

Na’I haré no Nia laran nakali,

No hakribi ó nia oan mane no oan feto sira. Refrão

 

Na’i dehan: “Ha’u sei subar Ha’u oin ba sira

No Ha’u sei haré oinsá sira nia loron aban-bainrua,

Basá, sira otas laran áat nian ida,

Oan sira be la hatene neon lós. Refrão

 

Sira halo Ha’uhirus ho maromak falso,

Halo ha’u laran nakali ho ilas folin laek.

Ha’u halo sira laran susar hodi sai povo falso,

Halo sira sai povo ida beik.” Refrão

 

Aclamação                                                                                                                                                                                             Tg. 1. 18

Refrão : Aleluia, Aleluia! Repete-se

                  Aman Maromak halo ita sai oan hakiak housi lialós,

                  atu ita bele sai oan fudin iha Nia criatura hotu nia leet. Refrão

 

Evangelho                                                                                                                                                                                     Mt. 13. 31-35

Na’i Jesus Cristo nia Evangelho nu’udar São Mateus haktuir:

Iha tempo neba, Jesus haktuir tan aiknanoik ida ba sira: “Reino lalehan nian hanesan mustarda musan ida nebe ema kuda iha nia to’os. Musan ne’e kiik liu musan sira hotu; maibe boot mai, nia moris boot liu hotu, to’o sai aihun nebe manu sira lalehan nian mai hamahan an iha nia sanak sira.”

Nia dehan tan aiknanoik seluk ba sira: “Reino lalehan nian hanesan ferment nebe feto ida kahur ho farina sasukat tolu, to’o nia sa’e didiak.”

Buat ne’e hotu Jesus dehan ba ema lubun boot ho aiknanoik sira; la ho aiknanoik mak Nia la ko’alia ba sira. Nune’e buat nebe  uluk profeta dehan sai tuir lolos duni: “Ha’u sei loke Ha’u ibun ho ainknanoik, Ha’u sei haklaken buat  sira nebe subar houri mundo hahu.”

Lia Maksoyn.

Leave a Reply

Your email address will not be published. Required fields are marked *