shadow
Diocese de Dili > NOTÍCIAS > LETURA DIÁRIA > Terça-Feira, XVII Semana Tempo Comun

Terça-Feira, XVII Semana Tempo Comun

Ano B

 

Primeira Leitura                                                                    Jer. 14. 17–22

Lia housi Livro Jeremias nian:

Na’i lia tun mai ha’u nune’e: “Hateten ba povo nune’e: ‘Ha’u tanis kalan loron; Ha’u matauen suli nafatin, basá, áat ua’in no kanek todan haterus feto sala laek, Ha’u povo nian oan feto. Ha’u sai ba rai luan karik, Ha’u haré sira nebe mate ho surik; Ha’u sai ba rai luan karik, Ha’u haré sira nebe mate ho surik; Ha’u tama karik ba cidade, haré ema terus hamlaha nian. Profeta no sacerdote sira la’o iha rai tomak; la hatene atu halo sá lós.” “Ita fila kotuk tebes ona ba Judá? Ita hakribi tebes ona Sião? Tan sá Ita hakanek ami hodi la sadi’a falia ami? Ami hein hela dame di’ak ida mós la mai; ida be hafoun-an nian, maibe mosu tiha susar! Na’i, ami hatene ami nia laran áat no hatene mós hahalok áat ami bei- alaaa sira nian. Ami halo sala duni hasouro Itaboot. Tan domin Ita naran nian, keta hakribi ami; keta husik ami hateten áat Ita trono glória nian. Ita hanoin hikas fali moruk be halo ho ami. Keta halakon nia. Nação  sira nia maromak falso bele halo udan monu rai? Lalehan  sira mak haruka udan mai? Na’i, ami Maromak, la’os iha Itaboot mak ami hein? Tebes, Ita mak halo buat hirak ne’e hotu!”

Maromak Futar Lia.

 

Salmo Responsorial                                                                                                                              Sal. 78(79). 8, 9, 11, 13 (R. 9bc)

Refrão : Na’i, soi ami ba tan glória Ita naran nian!!! Repete-se

 

Na’i, keta hanoin hasouru ami,

Tan ami bei – ala sira salan.

Haraik Ita laran – luak mai, soi lalais ami,

Basá, ami biit laek. Refrão

 

Maromak, ami Maksoin, tulun ami ba,

Tan Ita naran nia glória.

Soi ami no perdua ami salan,

Tan glória Ita naran nian. Refrão

 

To’o iha Itaboot Nia oin, Na’i,

Sira be moris dadur nia lian;

Ho Ita liman nia biit

Soi sira be ema tesi lia atu mate. Refrão

 

Ami, Ita povo, bibi – malae housi Ita luhan,

Sei hahi Ita ba nafatin

Housi otas ba otas sei hananu Ita glória. Refrão

 

Aclamação

Refrão : Aleluia, Aleluia! Repete-se

                  Fini mak Maromak futar-liafuan sira, Cristo mak kari fini.

                  Sé mak buka hetan fini ne’e sei hela tinan-ba-tinan. Refrão

 

Evangelho                                                                                                                                                                                    Mt. 13. 36-43

Na’i Jesus Cristo nia Evangelho nu’udar São Mateus haktuir:

Iha tempo neba, husik tiha ema lubun boot ne’e, Jesus ba fali uma. Nia escolante hakbesik ba Nia hodi dehan: “Hanourin mai ami aiknanoik kona ba du’ut áat iha to’os.” Nia hatan ba sira: “Ida nebe kuda fini di’ak mak Oan Mane. To’os mak mundo. Fini di’ak mak reino nia oan sira. Funu baluk nebe kuda fini áat mak diabo. Loron ko’a nian mak loron ikus mundo ne’e nian. Sira nebe ko’a mak anjo sira. Ne’e duni, hanesan sira futu du’ut áat hodi sunu iha ahi, nune’e mós sei mosu uainhira mundo sei to’o nia rohan. Oan mane sei haruka nia anjo sira atu hasa’e tiha housi nia reino sira hotu nebe fó exemplo áat no sira hotu nebe halo áat, hodi soe sira ba ahi lakan; iha neba sira sei tanis no ruun nehan. Ema di’ak sira sei nabilan hanesan loron iha sira Aman nia reino. Ema nebe iha tilun, rona ba!”

Lia Maksoyn.

Leave a Reply

Your email address will not be published. Required fields are marked *