shadow
Diocese de Dili > NOTÍCIAS > LETURA DIÁRIA > Sexta-Feira, XVII Semana Tempo Comun

Sexta-Feira, XVII Semana Tempo Comun

Ano B

Primeira Leitura                                                                      Jer. 26. 1-9

Lia housi livro Jeremias nian:

Uanhira Joaquim, Josias nia oan, hahu ukun Judá nu’udar liurai, Na’i lia tun ba Jeremias nunen’e: “Na’i ko’alia nune’e: ‘Ó ba, hamriik iha Na’i nia templo oin, hodi ko’alia ba Judá nia emar sira nebe mai iha Na’i nia templo hodi takrabat ba rai, hateten liafuan hotu nebe Ha’u haruka atu dehan ba sira, la bele mós halakon liafuan ida. Sira hakarak rona karik no ida-idak hakribi nia hahalok áat, nune’e, Ha’u sei la haruka todan nebe Ha’u hanoin hamonu iha sira leten tan sira nia hahalok áat sira. Ne’e duni, ó dehan ba sira katak Na’i ko’alia nune’e: Imi lakohi rona karik Ha’u, tuir lei nebe Ha’u haruka ona ba imi, imi lakohi tuir karik profeta sira nia liafuan, sira be serbi Ha’u, nebe Ha’u haruka ona ba imi, maibe imi lakohi rona, Ha’u sei halo templo ne’e hanesan Ha’u halo ba Silo, no Ha’u halo cidade ne’e nu’udar hun malisan nian ida ba povo tomak mundo rai-klaran nian.”’

Na’ilulik sira, profeta sira no povo tomak rona Jeremias ko’alia liafuan hirak ne’e iha Na’i nia templo. Uanhira Jeremias haklaken hotu tiha buat hotu nebe Na’i haruka nia atu hato’o ba povo tomak, nai’lulik sira no profeta sira tau liman ba nia hodi dehan: “Ó tenki mate; tan sá hodi Na’i nia naran ó hanourin katak templo ne’e sei sai hanesan Silo, cidade ne’e sei sai rahun, no povo mós sei mohu?” Povo tomak halibur hale’u Jeremias iha Na’i nia templo.

Maromak Futar Lia.

 

Salmo Responsorial                                                                                                                               Sal. 68(69). 5, 8-10, 14 (R.14c)

Refrão : Na’i, tan Ita laran-luak tebes, rona ha’u!!! Repete-se

Barak liu fali ha’u nia fúuk,

Sira be rai kunan folin laek hasouru ha’u;

Tós liu fali ha’u ruin sira,

Sira be duni ha’u la tuir justiça. Refrão

 

Na’i, tan Ita, ha’u terus liafuan áat sira,

No nakukun taka ha’u oin.

Badinas ba Ita uma tolan tiha ha’u,

Monu mai ha’u leten,

Liafuan áat hasouru Ita boot. Refrão

 

Na’i, ha’u harohan ba Ita boot,

Tan Ita domin mak tulun ha’u.

Na’i rona ha’u, iha oras Ita graça nian,

Tan Ita laran di’ak, mai tulun  ha’u. Refrão

 

Aclamação

Refrão : Aleluia, Aleluia! Repete-se

                  Maromak Nia liafuan hela ba nafatin.

                  Ne’e mak liafuan di’ak nebe haklaken tiha ba imi. Refrão

 

Evangelho                                                                                                                                                                                    Mt. 13. 54-58

Na’i Jesus Cristo nia Evangelho nu’udar São Mateus haktuir:

Iha tempo neba, Jesus fila ba nia rain. Nia hanourin iha sinagoga, halo ema hotu hakfodak hodi dehan: “Nia matenek ho nia biit hodi halo milagre hirak ne’e mai lós housi nebe? Nia laos badaen ai nia oan? Nia inan nia naran la’os Maria, no mós nia maun alin nia naran la’os Tiago, José, Simão ho Judas? Nia feton la hela hamutuk ho ita? Ne’e duni, buat hirak ne’e hotu, Nia hetan lós housi nebe?” No sira lakohi simu Nia. Maibe Jesus dehan ba sira: “Iha ita nia rai de’it no iha nia uma rasik mak ema heuuai profeta ida.” Nia la halo milagre barak iha neba, tan ema sira la fiar.

Lia Maksoyn.

Leave a Reply

Your email address will not be published. Required fields are marked *