shadow
Diocese de Dili > NOTÍCIAS > HOMILIA DO BISPO > DOMINGO COMUM XVIII, ANO B

DOMINGO COMUM XVIII, ANO B

Dala ruma ita rona ema dehan; wainhira ó halo pergunta ne’ebe los, ó bele hein mos resposta ne’ebe los. Maibe wainhira ó halo pergunta ne’ebe sabraut, lalika hein resposta ne’ebe los. Se ita rona didiak Evangelho loron ohin ninian iha ne’ebe sira hasae pergunta ba Jesus; Hadi bainhira mak ita bo’ot to’o iha ne’e? Jesus hatan nune’e ba sira; imi buka Ha’u laos tanba milagre ne’ebe Ha’u halo maibe tanba pão ne’ebe imi han to’o bosu.

Maluk doben sira, Leitura dahuluk to’o Evangelho Na’i Maromak hatudu nia compaixão ba ita ema hodi tau atensão ba ema nia necessidade isin ninian no mos buat ne’ebe Espiritual ninian. Jesus ko’alia tiha ona; imi buka Ha’u tanba pão ne’ebe imi han to’o bosu. Hafoin Nia dehan tan liafuan ida; Imi serviço laos tanba de’it ai-han ne’ebe sei la mohu, maibe sei hela ba nafatin. Laos serviço de’it ba aihan ne’ebe sei mohu maibe serviço ba aihan ne’ebe sei la mohu. Fila ituan ba Leitura sira ne’ebe foin ita rona; povo ida ne’ebe wainhira sai husi Egipto, tinan barak sira sai escravo iha Egipto. Wainhira sira sai husi neba nakonu ho entuciasmo tanba sira bele experiência libertação ida ne’e. Maibe sira liu iha tempo ruma sira mos começa sente kole, kosar, hamlaha hodi hahu mur-mura hasoru Moises, hahu mosu sinal nostalgia ho experiência escravidão nian maske serviço iha neba nu’udar serviço obrigatório, Egipto sira trata sira ladiak, pelo menos iha neba han netik pão, han netik na’an duque lao iha rai fuik maran laiha pão no na’an. Ida ne’e sira nia nostalgia. Sena ida ne’e, hakarak transmite mai ita katak, sira foin mak husik hela condição ida sala nian sei sai atan ba vicios rasik ba sira nia paixão hahu koko aprende atu lao iha dalan liberdade ninian. Liu de’it momento oan ruma iha paz no serenidade nia laran, sira fila fali hahu sente kona ba experiência diak ne’ebe sira hetan.

Saida mak nota wainhira povo ne’e hahu mur-mura hasoru Maromak! Wainhira povo ne’e hahu ko’alia hasoru Maromak tanba; sira iha rai fuik maran ai-han laiha. Maromak lahasai hirus hasoru povo ne’e, maibe Nia haraik ai-han ba povo ida ne’e. Iha momento sira desencorajamento wainhira iha tentação atu ita monu fali ba sala ka fila ba moris ida uluk nian, precisa duni atu keta haluha katak Maromak ne’e la hirus haoru ita ema nia fraqueza, maibe nia oferece sinal foun ida, sinal domin ninian, sinal foun Maromak nia presença constante ho povo ida ne’e. Povo Israel maná ne’e parte ida ne’ebe considera hanesan tulun ida ba povo ne’e. No parte seluk ai-han ne’ebe Maromak haruka ba sira hanesan mos prova ida ba povo momento ida atu provoca povo ne’e atu sira nia fiar sai buras liu tan. Povo ne’e nia Caminho iha deserto atu fila fali ba sira nia rain atu descobre fila fali sira nia liberdade. Ida ne’e hanesan periódo ida apendizagem ninian ida ne’e lolos sai hanesan escola ida ba povo ida ne’e atu controla sira nia ambição nian, sira tem que aprende atu iha confiança ida ba Maromak laos hare de’it ba buat ne’ebe diak ho sasan sira ne’ebe sira hetan.

Lição ida povo Israel aprende no ohin loron vale mos ita hotu mak ida ne’e; Maromak presente nafatin iha tempo hotu-hotu. Maromak mak lao ho ninia povo iha rai fuik maran iha tempo uluk ninian. Jesus mos hakarak liu husi experência ne’ebe hanesan, hakarak atu dehan mai ita buat ne’ebe inportante, buat ne’ebe nobre liu tan. Imi buka Ha’u laos tanba hare milagre sira, maibe tanba imi han pão to’o bosu. Imi serviço tanba de’it aihan ne’ebe sei mohu, maibe sei hela ba nafatin. Evangelho wainhira ita tuir no rona hare ba ema lubun nia preucupação Jesus mos koko atu verifica razão saida mak obriga sira buka Jesus? Tanba sa mak sira buka Jesus?

Ohin loron dalabarak Ema hakiak esperança ida ne’e iha Jesus; buka Nia tanba ai-han ne’ebe sei lakon, ai-han ne’ebe sei mohu, tanba graça especial ida dalaruma ita ba missa, ita reza. Ita halo devoção tanba ita hein hela graça ida husi Na’i Maromak, karik saúde, sucesso, bem estar ka atu hetan proteção hasoru buat at ruma. Maibe Jesus ohin hakarak bolu ita nia atenção ituan tanba ita dala barak iha tentação ida ne’e. Ita ida-idak dala hira mak ita tama iha grupo ida ba grupo seluk reza atu hetan milagre, dala hira iha tendência, tentação atu abandona ha’u nia fiar, husik ha’u nia religião sarani ninian tanba hakarak koko experiência sira, dala hira mos mak ha’u iha tendência halerik tanba Maromak la simu ha’u nia harohan, la preenche ha’u nia necessidade. Nu’udar ema dala barak ita mos iha tendência monu iha situação ida hanesan ne’e, maibe Jesus liu husi liturgia semana ida ne’e nian hakarak eleva ituan ita nia fair sarani ninian ne’e la to’o de’it iha nível han hemu nian, nível ida ne’ebe preucupa de’it ho ita nia necessidade isin nian.

Maluk doben sira, sarani nia esperança as liu buat ne’ebe isin ninian; imi serviço laos tanba de’it aihan ne’ebe sei mohu, maibe sei hela ba nafatin. Iha Livro Deutoronómio Moises dehan; ema la moris de’it ho pão, maibe nia sei moris husi buat ne’ebe sai husi Na’i Maromak nia Futar ibun. Povo Israel ne’ebe lao hamutuk ho Maromak, maibe povo ne’e nafatin halerik ba aihan. Iha momento ida ne’e Moises koko atu confirma povo ida dehan; ita ema la moris de’it ho pão, maibe ita sei moris husi buat hotu ne’ebe sai husi Na’i Maromak nia futar ibun. Profeta Isaias hametin tan mos buat ne’ebe Moises koalia; tanba sa mak imi gasta imi nia isin ba buat ne’ebe laos aihan no gasta imi nia kolen ba buat sira ne’ebe sei la habosu imi. Aihan ne’ebe mai husi Nia mak ida ne’e; Maromak nia futar Liafuan, Maromak nia hanourin. Oinsa mak ita bele habosu an ho aihan ida ne’e; saida mak ita tem que halo? Laos atu preucupa ho buat oi-oin, maibe buat ida mak precisa ohin São João dehan mai ita iha Evangelho; fiar iha ida ne’ebe Aman haruka mai. Maibe São João mos hakarak esplica ituan mai ita kona ba fiar. Fiar hatudu acto vital ida ne’ebe confia nian. Confiança ida ne’ebe sem condição iha Na’i Maromak nia Futar liafuan.

Aihan ne’ebe ita hotu precisa ne’e laos ona maná ka kiukai, maibe pão ne’ebe verdadeiro mak ida ne’ebe tun husi lalehan mai atu fo moris mai ita ema. Ita hotu hodi ita nia batismo ita acesso ona ba aihan lalehan ida ne’e, maibe São Paulo husu ita hotu atu halo nafatin esforço ida nebe constante, la para atu hola conciência ida kona ba prática de conversão. Tan ne’e São Paulo dehan; ha’u husu barak hodi Na’i nia naran atu imi labele moris tan hanesan ema gentio sira, maibe hakasan sai criatura foun, hakasan atu husik nia viços sira uluk ninian, husik moris sira ne’ebe luxo no hakarak ne’ebe buka de’t buat ne’ebe mundo ninian.

Leave a Reply

Your email address will not be published. Required fields are marked *