shadow
Diocese de Dili > NOTÍCIAS > LETURA DIÁRIA > Terça-Feira, XVIII Semana Tempo Comun

Terça-Feira, XVIII Semana Tempo Comun

ANO B

 

Primeira Leitura                                                           Jer. 30. 1-2, 12-15, 18-22

Lia housi Livro Jeremias nian:

Liafuan hirak nebe Na’i hato’o ba profeta Jeremias; buat nebe Na’i, Israel nia Maromak dehan: “Hakerek iha livro ida liafuan sira hotu nebe Ha’u dehan ba ó. Na’i hateten nune’e: ‘Kanek be ó iha, la bele cura; ó nia kanek todan tebes. Ema ida la tau matan ba ó atu cura ó kanek; ba ó la iha ai-moruk. Ó nia belun sira hotu haluha tiha ona ó, sira la husu tuir ó! Ha’u mak hakanek ó hanesan hakanek funu baluk ida, ho castigo todan ida, tan ó nia hahalok áat be todan tebes, tan ó nia salan be sura la bele. Tansá ó ko’alia kona ba ó nia kanek, ó nia hahalok áat, nebe la bele cura? Tan ó nia hahalok áat todan tebes, tan ó nia salan sura la bele, mak Ha’u halo buat hirak ne’e hotu ba ó’.

Na’i dehan teni: ‘Ha’u ba troca Jacob nia tenda sira; Ha’u sei sadi’a sira hôrik fatin. Cidade sei harí fila fali iha fatin nebe sira harahun; kota áas sei hari fila fali iha nia fatin rasik. Housi sira sei, sai knananuk hahi nian no hakilar ksolok nian. Ha’u sei haua’in sira, sira sei la mohu; Ha’u sei hakonu sira ho naran boot; ema ida sei la hakribi tan sira. Nia oan sira sei sai hanesan houri uluk;  povo sei hela metin iha Ha’u oin, Ha’u sei fó castigo ba ema sira nebe hanehan sira. Sira sei iha ulun ida, no liurai ida nebe sei mosu housi sira leet. Ha’u sei haruka bolu nia; nia sei mai iha Ha’u oin, basá, sé mak barani hakbesik mai Ha’u? Na’i dehan. Nune’e, Imi sei sai Ha’u Nia povo, Ha’u sei sai imi nia Maromak”.

Maromak Futar Lia.

 

Salmo Responsorial                                                                                                                 Sal. 101(102). 16-21, 29, 22-23 (R. 17)

Refrão : Uainhira Na’i hafoun fali Sião,

                  Na’i  sei hatudu Nia glória. Repete-se

 

Na’i, nação sira sei hamta’uk Ita naran,

No liurai sira iha rai tomak Ita glória.

Uainhira Na’i hafoun Sião,

Nia sei mosu ho Nia glória,

Sei simu ema kiak sira nia hamulak,

Sei la heuuai sira be harohan. Refrão

 

Ne’e sei hakerek iha libro ba otas aban-bainrua nian,

Povo nebe sei atu moris, sei hahi Na’i.

Na’i hakru’uk housi áas liu, housi Nia hôrik fatin,

Housi lalehan Na’i hamatan ba rai tomak,

Atu rona ema sira iha dadur nia halerik,

Atu soi sira nebe ema tesi lia atu mate. Refrão

 

Ita atan sira nia oan sei moris hakmatek,

Sira nia bei-oan sira sei hela metin iha Ita futar oin,

Atu hauélok Na’i nia naran iha Sião,

No sei hahi Nia iha Jerusalem,

Uainhira povo hotu libur hamutuk atu serbi Na’i. Refrão

 

Aclamação

Refrão : Aleluia, Aleluia! Repete-se

                 Na’i, Ita mak Maromak nia Oan Mane,

                  Ita mak Israel nia Liurai. Refrão

 

Evangelho                                                                                                                                                                                    Mt. 14. 22-36

Na’i Jesus Cristo nia Evangelho nu’udar São Mateus haktuir:

 Iha tempo neba, Jesus haruka escolante sira sa’e ró hodi ba uluk tasi sorin ba; Nia fali haruka ema lubun fila ba uma. Haruka tiha sira ba uma, Nia sa’e ba foho atu harohan mes-mesak. To’o kalan, Nia mesak de’it iha neba. Ro fali kilometro ruma ona iha tasi klaran, laloran baku maka’as, basá anin huu hasouru. To’o kalan fahe ba há’at, Nia hakbesik ba sira hodi la’o iha tasi leten. Haré tiha Nia la’o iha tasi leten, escolante sira ta’uk hodi dehan; “Rai na’in ida!” Sira hakilar ho ta’uk. Jesus ko’alia kedas ba sira dehan: “Hakmatek ba! Ha’u mak ne’e: keta ta’uk!” Ne’e duni Pedro hatan dehan: “Na’i, Itaboot mak neba karik, haruka ha’u ba to’o Itaboot housi laloran leten.” Ne’e duni, Jesus simu: “Mai!” Pedro tun housi ró hodi la’o iha laloran leten atu ba to’o Jesus. Maibe, haré anin huu maka’as, nia ta’uk hodi hahu mouut. Nia hakilar. “Na’i, soi ha’u!” Jesus lolo liman kedas ba nia hodi káer nia dehan: “Ema fiar kiik, tansá ó laran namlele?” Sira tama tiha ba ro laran, anin maus tiha. Sira nebe iha ro laran monu iha Jesus nia ain hodi dehan: “Tebes duni, Itaboot Maromak nia Oan Mane.”

Hakur tiha tasi, sira tun ba rai Genesaré. Hatene tiha Nia, ema sira rai neba nian ba fó hatene ba maluk sira iha fatin hotu. Sira lori ba Nia moras sira hotu, hodi husu ba Nia atu husik netik sira kon nia tais ninin. No sira nebe kona, hetan isin di’ak.

Lia Maksoyn.

Leave a Reply

Your email address will not be published. Required fields are marked *