shadow
Diocese de Dili > NOTÍCIAS > REFLEXÃO > DOMINGO XIX TEMPO COMUM

DOMINGO XIX TEMPO COMUM

HAU MAK AIHAN MORIS LOLOS NIAN BE TUN MAI HUSI LALEHAN, EMA NEBE HAN AIHAN NE’E NIA SEI LA HAMLAHA TAN, LA HAMROK TAN, NIA SEI LA MATE TAN MAIBE SEI MORIS BA NAFATIN.

 

Maun alin sarani doben sira entre aspeto natural sira be halo ema moris bele moris ida mak HAHAN. Maibe tuir Maromak koalia lialos mai ita kona ba moris ne’e nia dehan katak los duni tuir ita nia natureza ita ema percisa aihan atu moris maibe laos aihan deit, ema percisa mos Maromak ninia futar liafuan be iha kbiit hamoris nia no tahan ninia moris ne’e to’o moris rohan laek. Nune’e mak Jesus dehan “ema la moris deit ho aihan maibe mos ho Maromak ninia futar liafuan”.

 

Maromak ninia futar liafuan domingo ohin nian hatudu mai ita lialos ida ne’e.

Primeira leitura iha Elias nia experiência hatudu mai ita katak ita ema sira necessidade aihan atu suporta ita nia isin be na realidade materia ida. Quando hahan laiha isin sai fraco, isin laiha kbiit atu moris ou atu halao buat sira nebe ita temque halao iha ita nia moris ne’e. Wainhira Elias halao ninia missão tuir Maromak husu atu lao ba foho Horeb Maromak ninia foho nia foti lia ba Maromak atu hakotu lalais deit ona ninia moris ne’e basa nia senter fraco liu laiha kbiit atu halao missão be nia simu. Elias sente fraco tamba lao dook aihan laiha no dificuldade distâcia be dook. Maibe Maromak la husik nia mate hamlaha, Maromak fo han nia ho aihan moris nian no ho Ninia futar liafuan be koalia nafatin ba nia. Ho ne’e mak Maromak hakbiit Elias, hamoris Elias nafatin hodi Elias continua ninia missão.

 

Ita nain Jesus Cristo iha evangelho halo ita comprende klean liu tan LIALOS kona ba ita ema nia moris nebe fundamentalmente la moris deit ho aihan maibe mos moris tamba Maromak ninia futar liafuan ne’e.  Nia dehan “Hau mak aihan moris be tun husi Lalehan ema se han aiha ne’e sei la hamlaha tan, sei la hamrok tan, sei la mate tan, sei hetan moris rohan laek”. Uluk imi nia beiala sira han mana iha raifuik maran no sira mate hotu ona, maibe ema nebe han aihan be hau fo, Hau nia isin rasik, nia sei la mate tan maibe sei moris ba nafatin.

 

Maun alin sira ohin Maromak hatudu rasik mai ita MORIS NIA HUN. MORIS NIA HUN ne’e MAK JESUS CRISTO DUNI. JESUS CRISTO ida nebe liatun dehan “HAU MAK AIHAN LOLOS NEBE TUN HUSI LALEHAN, EMA SE HAN AIHAN NE’E NEBE HAU FO, HAU NIA ISIN RASIK, BE KATAK HAU NIA-AN RASIK, EMA NE’E SEI LA HAMLAHA TAN, SE LA HAMROK TAN, EMA NE’E SE LA MATE TAN,MAIBE SEI HETAN MORIS ROHAN LAEK”. Nai Jesus ninia futar liafun ne’e confirma buat nebe nia dehan antes katak “EMA LA MORIS DEIT HODI AIHAN MAIBE MOS MORIS TAMBA MAROMAK NINIA FUTAR LIAFUAN BE MAI HUSI MAROMAK”. Iha Jesus Cristo nia-An ita hetan aihan lolos be ninia futar isin rasik fo mai ita hodi terus to’o mate iha Cruz no ita hetan Maromak ninia Futar liafuan moris be hori uluk kedas horik ho Maromak, hodi Liafuan ne’e mak Maromak hamoris buat hotu, Liafuan ne’e halo tiha-an ba mane oras ne’e horik iha ita le’et. Evangelista São João hahu ninia evangelho revela mai ita lia kmanek ida ne’e haktuir dehan “HORI ULUK KEDAS LIAFUAN IHA NANIS, LIAFUAN HORIK NANIS HO MAROMAK, LIAFUAN MAK MAROMAK,…MAROMAK HALO BUAT HOTU HODI NIA … IHA NIA MAK MORIS … LIAFUAN NE’E HALO-AN TIHA BA EMA NO HORIK IHA ITA LEET.

 

Maun alin doben sira, dala wain tebes ita experimenta ona katak ita hanoin no moris kona ba LIALOS ida ne’e husi ita ema nia comprensão deit, ita la moris los iha LIALOS BE JESUS revela mai ita ne’e completamente. Katak ita

Hanoin lolos deit dehan ita ema sira moris tamba ita han nafatin, ou moris tamba iha hahan ba ita hodi han loro-loron, mas que ohin loron ita mos hatene katak hahan mos bele estraga ita ema sira, hamosu moras sira, hamosu rai odio malu entre ita, hamosu laran moras entre ita, halo ita la hadomi malu lolos nundar Maromak nia oan. Ita haluha tiha moris nia essencia seluk nebe Jesus dehan mai ita kona ba ita ema moris mos ho Maromak nia Futar Liafuan be koalia mai ita loro loron.  Ita ema moris laos tamba aihan deit maibe mos tamba Maromak ninia futar liafuan. Ita labele hetan moris lolos se ita fo ita nia moris ba deit aihan no la fo mos ba Maromak ninia futar liafuan be fo moris ba buat hotu ne’e.

 

Wainhira halao moris ne’e mak ita fo ita nia moris ba aihan deit ne’e katak ita dedica ita nia an hodi luta ba moris ne’e atu hetan deit aihan loro loron nian, atu han deit, la fo importância mos ba valor sira ema moris nian be mai husi Maromak nebe koalia mai ita loron ba loron. Ita nia preocupação boot liu fo ba buat sira nebe bele hakbiit ka haksolok ita nia isin lolon be nundar materia ida ne’e. Maibe wainhira halao moris ne’e ita moris mos tamba Maromak ninia futar liafuan ne’e katak ita rona Maromak, ita halo tuir buat sira be Maromak husu mai ita, ita moris hamutuk ho Maromak. Ita nia moris ida hanesan ne’e hatudu concreto los iha tau iha moris ne’e Maromak ninia futar liafuan nebe loro-loron koalia mai ita atu moris tuir hanesan  ohin São Paulo haktuir mai ita iha segunda leitura dehan “halakon tiha husi imi leet imi nia hirus, imi nia laran nakali, imi nia lian makas, imi nia hotar malu, imi nia laran at tomak; iha imi leet imi buka deit atu sai laran diak ba malu, sadia malu, perdua malu … imi buka hadomi malu lolos hanesan Na’i Jesus hadomi ita ema sira hodi saran Nia-an ba Maromak hodi ita bele moris”. Maromak husu mos mai ita atu moris hanesan ne’e, laos moris deit tamba aihan.

 

Ohin loron fenómeno foun ida mosu iha ita le’et mak katak hahan laos ona deit hakbiit ema atu moris maibe hahan bele mos halo ema moras fali, halo ema terus, halo ema la moris iha domin no dame nia laran ka halo ema la moris tuir hanesan Maromak husu mai ita atu moris nundar São Paulo haktuir mai ita ne’e. Realidade ne’e mosu tamba ita ema sira nia karak ba malu, han hemu la sukat, no la fahe ba malu, la hanoin malu, hakarak buat hotu ba ita an deit, fo ita nia moris ba deit hahan laos ba Maromak ninia futar liafuan mos. Realidade ne’e mosu mos tamba ita la buka aihan lolos nian iha ita nia moris. Aihan lolos iha ita nia moris ne’e mai husi Jesus Cristo. Hahan nebe Jesus Cristo fo laos hanesan hahan baibain nebe bele mos fo fali terus no moras oioin mai ita hanesan ohin loron ita koko. Hahan lolos nebe Jesus fo maun alin doben sira la fo moras, la fo terus, la halo ita kan ten, maibe fo moris lolos. Fo moris ida be nakonu ita ho saude diak iha ita nia isin no ita nia klamar, hatudu iha moris ida be nakonu ho domin lolos, hakmatek lolos no ksolok lolos nian. Domin, hakmatek no ksolok ida nebe rohan laek ba ita ida idak no ba ema hotu.

Maun alin doben sira aihan lolos ida ne’e mak Jesus ninia futar isin no ran nebe haraik mai ita nafatin fatin iha Eucaristia ka Missa. Iha neba Jesus haraik nia futar Isin no futar Ran nundar aiha lolos nian ba ita ema sira. Ema se mak fiar hodi simu aihan ne’e sei hetan duni moris, moris rohan laek nian. Na’i Jesus lia tun rasik.

Tan ne’e maun alin sira mai ita buka hadomi eucaristia iha ita nia moris loro-loron atu ita keta kuran ba aihan moris nian nebe bele haraik moris lolos no moris rohan laek mai ita ne’e. Amen.

 

Casa de Dom. Jaime Garcia Goulart, Dili

Domingo XIX Ano B, 12 de Agosto de 2018, Por: Pb.

Leave a Reply

Your email address will not be published. Required fields are marked *