shadow
Diocese de Dili > NOTÍCIAS > LETURA DIÁRIA > Quarta-Feira, XIX Semana iha Tempo Comum

Quarta-Feira, XIX Semana iha Tempo Comum

ANO B

 

Primeira Leitura                                                              Ez. 9. 1-7; 10. 18-22

Lia housi Profecia Ezequial nian:

Ha’u rona Na’i ho lian maka’as hakilar: “Hakbesik mai, imi sira nebé haterus cidade, ida-idak mai ho ninia kro’at be hodi harahun iha liman”. Iha oras ne’e, mosu ema na’in neen mai housi odamatan leten cidade nian nebé sée oin ba tasi-feto; Ida-idak lori buat kro’at atu hodi harahun iha liman. Iha sira leet, iha hela ema ida ho hatais hena linho, kesi ho bornal escriba nian ida iha knotak. Sira seluk hakbesik mai hodi hamriik iha altar riti nia oin. Nune’e, glória Maromak Israel nian sa’e ba housi querubim sira nebé Nia tur ba, to’o templo nia oin. Hafoin, bolu ema ida be hatais hena linho nebé tara hela bornal escriba nian iha nia knotak. Na’i dehan ba nia: “Ó la’o ba cidade tomak, liu housi Jerusalém, tau sinal Cruz nian ida iha reentos ba ema sira nebé tanis, terus no laran susar, tan hahalok áat oi-oin nebé hala’o iha neba”. Hafoin ha’u rona Na’i dehan ba sira seluk: “Imi ba cidade tomak housi nia kotuk hodi hakanek sira; keta sadi’a sira ou hatudu laran luak ba sira, katuas, klosan, fetora, labarik ki’ik no feto sira hotu, imi oho hotu tiha sira ba hodi hamohu sira hotu. Maibé, imi la bele kona sira nebé tau ona sinal cruz. Hahu housi Ha’u Nia Santuário”. Sira hahu housi ema katuas sira nebé iha hela templo nia oin. Tuir mai, nia fó ordem ba sira: “Imi halo fo’er templo ba, hakonuk templo nia oin ho mate isin, hafoin, imi sai ba” ! Sira sai ba hodi hakanek iha cidade.

Na’i nia glória husik tiha templo oin hodi ba hatur-an iha querubim sira leten. Querubim sira loke sira liras, husik tiha rai, hodi hasa’e-an iha ha’u oin; wainhira sira sai, roda sira mós ba ho sira. Sira hamriik tiha iha Na’i nia templo nia odamatan, be sée ba loro-sa’e nia oin. Glória Maromak Israel nian, hatodan-an iha sira leten. Sira ne’e mak balada moris nebé ha’u haré iha Maromak Israel nia okos iha mota Quebar no housi ne’e ha’u hatenek katak sira ne’e mak querubim sira. Sira ida-idak iha oin háat no liras háat; iha liras okos, iha hela buat ruma hanesan ema nia liman. Oin sira hanesan duni sira nebé ha’u haré tiha ona iha mota Quebar nia ninin. Sira ida-idak la’o lós nafatin ba oin.

Maromak Futar Lia.

 

Salmo Responsorial                                                                                                                         Sal. 112(113). 1, 2, 3-4, 5,6 (R. 2ª)

Refrão : Na’i Nia glória iha Lalehan leten áas ba!!! Repete-se

Ou            Aleluia!

  • Hahi, Na’i Nia atas sira,

          Hahi Na’i Nia naran ba.

          Rahun di’ak ba Na’i Nia naran,

          Oras ne’e no tinan-ba-tinan. Refrão

 

  • Housi loro matan nakfera to’o loro monu,

          Hahi nafatin Na’i Nia naran.

          Na’i iha povo hotu nia leten,

          Nia glória iha lalehan tutun. Refrão

 

  • Ita Maromak boot liu hotu,

          Nia trono iha leten áas ba.

          Housi leten áas ba

          Na’i tau matan ba lalehan no rai. Refrão

 

Aclamação                                                                                                                                                                                        2Cro. 5. 19

Refrão : Aleluia, Aleluia! Repete-se!

                  Housi Cristo, Maromak ba dame malu ho ita;

                  Nia haruka ita hala’o knaar badame malu nian. Refrão

 

Evangelho                                                                                                                                                                                     Mt. 18. 15-20

Na’i Jesus Cristo nia Evangelho nu’udar São Mateus haktuir:

Iha tempo neba, Jesus dehan ba escolante sira: “Ó nia maun eh alin sala hasouru ó, ba ko’alia ho nia mesa-mesak hodi hatudu nia sala. Nia rona karik ó, ó manan ona ó nia maun eh alin ne’e. Nia la rona karik ó, ba lori tan ema ida ka rua atu lia hotu sai lós hodi sasin na’in rua ka tolu nia liafuan. Nia lakohi rona karik ema sira ne’e, ba fó hatene ba kreda. Maibé nia lakohi rona kreda karik, haré ona nia nu’udar ema gentio no ema publicano ida. Tebes, Ha’u dehan ba imi: Buat hotu nebé imi futu iha rai sei futu metin iha lalehan; buat hotu nebé imi kore iha rai sei kore mós iha lalehan.”

Ha’u dehan tan ba imi: “Imi na’in rua iha rai ne’e lia tuir malu karik atu husu buat ida, Ha’u Aman iha lalehan sei fó duni ba imi. Basá iha fatin nebé ema na’in rua ka tolu halibur hamutuk hodi Ha’u nia naran, Ha’u mós iha sira nia leet.”

Lia Maksoyn.

Leave a Reply

Your email address will not be published. Required fields are marked *