shadow
Diocese de Dili > NOTÍCIAS > LETURA DIÁRIA > Quinta-Feira, XIX Semana iha Tempo Comum

Quinta-Feira, XIX Semana iha Tempo Comum

ANO B

 

Primeira Leitura                                                                    Ez. 12. 1-12

Lia housi Profecia Ezequial nian:

Na’i nia lia tun mai ha’u nune’e: “Emar nia oan, ó hôrik iha ema laran áat sira nia leet. Sira iha matan atu haré, maibe la haré, iha tilun atu rona, maibe la rona, darasaan ida nebe tuir de’it dalan áat. Ó, emar nia oan, hadi’a sasan ruma hodi la’o ba rai seluk, iha loron atu sira bele haré. Ó sei sai housi sira oin hodi ba fatin seluk. Nune’e karik, sira bele hatene tuir katak sira tuir duni dalan áat. Hadi’a ó nia sasan hanesan ema la’o rai ida iha loron atu sira bele haré ó; ó sei sai housi sira oin iha loro-kraik hanesan ema la’o rai. Uanhira sira haré hela, ó halo ku’ak ida iha didin atu sira bele haré, no ó sai housi ku’ak ne’e iha sira oin, tau sasan iha ó nia kbás hodi sai iha nakukun. Ó sei taka oin atu ó la bele haré rai neba, basá, housi ó Ha’u sei halo sinal ida ba uma-kain Israel nian”.

Ha’u halo tuir lolós ordem nebe ha’u simu. Ha’u hadi’a ha’u nia sasan iha loron, hanesan sasan ema la’o rai nian. Iha loro-kraik ha’u halo ku’ak iha didin ho liman hodi sai iha nakukun, tau sasan iha kbás atu sira bele haré.

Iha dadersan tuir mai, Na’i lia tun mai ha’u nune’e: “Emar nia oan, uma-kain Israel nian, ema hirak nebe tuir dalan áat, la husu ba ó: ‘Sá mak ó halo?’ Ó sei dehan ba sira: ‘Na’i Maromak ko’alia nune’e: Lia todan ida ne’e hato’o ba ema nebe ukun iha Jerusalém no iha uma-kain tomak Israel nian.’ Ó ko’alia ba sira nune’e: ‘Ha’u mak nu’udar sinal ida ba imi. Hanesan ha’u halo, nune’e ema sei halo mós ba imi; ema sei lori sai imi moris dadur iha rai seluk. Ema be ukun sira, sei tau nia sasan ba kbás iha nakukun laran atu lori hodi liu housi didin ku’ak nebe halo tiha ona; nia sei taka metin nia oin, atu la bele haré rain ho nia matan rasik.”’

 Maromak Futar Lia.

 

Salmo Responsorial                                                                                                           Sal. 77(78). 56-57, 58-59, 61-62(R. cf. 7c)

Refrão : Keta haluhan Na’i Nia hahalok sira!!! Repete-se

  • Sira koko Maromak be leten áas ba,

          Sira la halo tuir Nia ukunfuan;

          Sira fila kotuk hanesan sira aman sira,

          Hanesan rama oan ida, lakon sira dalan. Refrão

 

  • Sira hamoris Nia hirus

          Ho sira nia maromak falso, sunu Na’i nia laran.

          Maromak haré sira, Nia laran nakali tebes,

          Hodi hakribi tebes Israel. Refrão

 

  • Nia husik sira nia asua’in sira ba dadur,

          No Nia glória iha funu baluk sira liman;

          Nia saran Nia povo ba mate ho surik,

          Laran nakali hasouru Nia liman-rohan. Refrão.

 

Aclamação                                                                                                                                                                                        2Cro. 5. 19

Refrão : Aleluia, Aleluia! Repete-se

                  Hatudu Ita futar oin ba Ita atan,

                  hanourin  ha’u Ita ukunfuan. Refrão

 

Evangelho                                                                                                                                                                                 Mt. 18. 21-19. 1

Na’i Jesus Cristo nia Evangelho nu’udar São Mateus haktuir:

 Iha tempo neba, Pedro hakbesik ba Nia hodi dehan: “Na’i, ha’u nia maun eh alin sala hasouru ha’u karik, ha’u sei perdua nia dala hira? To’o dala hitu?” Jesus hau hatan ba nia: “Hau dehan ba ó: la’os to’o dala hitu, maibe to’o hitu nulu dala hitu.

“Tan ne’e, reino lalehan nian hanesan liurai ida nebe hakarak sisi tusan ba nia atan sira. Uanhira nia hahu sisi, sira lori mai ema ida nebe iha tusan osan rihun sanulu. Tan nia laiha buat ida hofi selu, liurai haruka fa’an tiha nia ho nia féen, nia oan sira ho nia rikusoi sira hotu atu selu nia tusan. Atan ne’e monu ain ba nia hodi dehan: ‘Paciencia uitoan ho ha’u, ha’u sei fó fali tusan hotu ba ó.’ Tan hanoin nia, atan ne’e nia nai husik nia ba hodi kasu nia tusan. Uainhira atan ne’e sai housi neba, nia hetan nia maluk ida nebe debe nia osan oan atus ida. Kaer tiha maluk nia, nia buti metin nia kakorok dehan: selu ó nia tusan ba!’ Nia maluk monu ain ba nia hodi harohan: ‘Paciencia uitoan ho ha’u, ha’u sei fó fali tusan hotu ba ó.’ Maibe nia lakoi sadi’a nia hodi haruka maluk ne’e ba dadur laran to’o nia selu nia tusan hotu. Nia maluk atan sira seluk haré tiha buat ne’e, ho neon susar ba haktuir ba sira na’i buat hotu nebe mosu. Tuir mai, sira nia na’i haruka bolu nia hodi dehan ba nia:’ Atan áat, ha’u kasu tiha ó tusan tomak tan ó husu ha’u; ó labele hanoin ó nia maluk atan hanesan ha’u hanoin ó?” Hafoin, hodi hirus, na’i fó nia ba dadur na’in sira to’o nia selu nia tusan hotu. Imi ida-idak la perdua ho laran imi nia maun alin karik, Ha’u Aman iha lalehan sei halo mós nune’e ba imi.”

Koalia hotu tiha, Jesus husik Galileia hodi la’o ba rai Judeia, iha Jordão nia sorin balun ba.

Lia Maksoyn.

Leave a Reply

Your email address will not be published. Required fields are marked *