shadow
Diocese de Dili > NOTÍCIAS > LETURA DIÁRIA > Sábado, XIX Semana Tempo Comun

Sábado, XIX Semana Tempo Comun

ANO B

 

Primeira Leitura                                                              Ez. 18. 1-10, 13b, 30-32

Lia housi Profecia Ezequiel nian

Na’i lia tun mai ha’u nune’e: “Tan sá imi temi beibeik tan ai-knanoik ne’e iha Israel nia rain: ‘Aman sira han uvas matak, nehan oan sira nian sai siin?’

‘Tan Ha’u moris – Na’i dehan – imi keta temi tan ai-knanoik  ne’e iha Israel. Imi bele hatene katak buat hotu nebe moris, Ha’u Nian; aman nia moris eh oan nia moris, hotu  Ha’u Nian. Ema nebe halo sala, nia mak sei mate.’

‘Ema ida laran mós karik, nia moris tuir direito no justiça, nia sei la hola parte iha festa iha foho leten, iha aihan lulik nian, no mós la foti matan ba maromak falso sira uma kain Israel nian; la halo fóer maluk nia féen nia naran, no mós la hakbesik ba feto seluk iha tempo folin laek; la hanehan naran ema ida; selu lolos tusan no la na’uk; fó aihan ba ema nebe hamlaha no fó hatais ba ema nebe la’o isin tanan; la fó osan hodi kaan osan boot no mós la simu osan funan; hadook liman housi áat hodi moris tuir lolós justiça iha ema hotu nia leet; buka moris tuir Ha’u Nia lei no halo tuir Ha’u Nia hanourin atu moris nu’udar fiar na’in. Ema nebe laran mós hanesan ne’e, nia sei moris – Na’i Maromak dehan.’

‘Maibe, nia iha karik oan mane ida biit maka’as no oho-dor ema nebe hala’o hahalok sira ne’e ida, oan ne’e bele moris? Lae, nia sei la moris! Nia halo karik buat áat hirak ne’e ida, nia sei mate, nia ran sei monu ba nia leten.’

‘Tan ne’e, uma kain Israel nian, Ha’u sei tesi lia ba imi tuir imi ida-idak  nia hahalok – Na’i Maromak dehan.

Nakfilak imi-an ba hodi hakribi imi hahalok áat hotu atu imi la monu fali ba sala. Soe tiha ba dook imi nia hahalok áat sira hotu nebe imi halo tiha ona hodi hakiak fuan foun ida no klamar foun ida. Tan sá imi sei mate, uma kain Israel nian? basá, Ha’u lakohi ema nebe monu ba sala atu mate – Na’i Maromak dehan. Tan ne’e, hakribi imi salan ba, imi sei hetan moris.”’

Maromak Futar Lia.

 

Salmo Responsorial                                                                                                                            Sal. 50(51). 12-15, 18-19 (R. 12ª)

Refrão : Na’i, haraik mai ha’u fuan mós ida!!! Repete-se

  •  Maromak, hakiak iha ha’u, fuan mós ida,

          Hafoun iha ha’u biit klamar nian.

          Keta soe ha’u ba dook housi Ita futar oin,

          Keta hadook Ita espírito santidade housi ha’u. Refrão

 

  • Haraik fali mai ha’u, ksolok maksoin nian,

          Hametin iha ha’u, laran di’ak.

          Ha’u sei hanourin sala na’in sira Ita dalan,

          No halo maksalak sira  sei fila ba Ita. Refrão

 

  • La’os sacrificio mak haksolok Ita,

          No ha’u hasae buat karan ahi nian, Ita la simu;’

          Sacrificio be Maromak simu mak espirito hakribi salan,

          Ita la hakribi espírito haraik-an no laran moras. Refrão

 

Aclamação                                                                                                                                                                                           Mt. 11. 25

Refrão : Aleluia, Aleluia! Repete-se

                  Rahun di’ak ba Ita, Aman, Na’i lalehan no rai nian, tan

                  Ita hatudu mistério reino lalehan nian ba kiik sira. Refrão

 

Evangelho                                                                                                                                                                                     Mt. 19. 13-15

Na’i Jesus Cristo nia Evangelho nu’udar São Mateus haktuir:

Iha tempo neba, ema lori labarik sira atu Jesus tau liman hodi harohan ba sira. Escolante sira haksi’ak sira. Maibe Jesus dehan: “Husik labarik oan sira hakbesik Ha’u, keta teri netik sira, basá reino lalehan sira nian.” Hafoin, tau tiha liman ba sira, Nia la’o tuir nia dalan.

Lia Maksoyn.

Leave a Reply

Your email address will not be published. Required fields are marked *