shadow
Diocese de Dili > NOTÍCIAS > LETURA DIÁRIA > Sexta-Feira, XIX Semana Tempo Comun

Sexta-Feira, XIX Semana Tempo Comun

Ano B

 

Primeira Leitura                                                                Ez. 16. 1-15, 60, 63

Lia housi Profecia Ezequiel nian.

Na’i lia tun mai ha’u nune’e: “Emar nia oan, hatudu ba Jerusalém ninia hahalok áat sira hodi dehan ba Nia: ‘Na’i Maromak ko’alia nune’e ba Jerusalém: Housi hun no moris, ó rai Canaã nian. Ó nia aman, ema amorreu no ó nia inan, ema hitita. Iha loron nebe ó moris iha mundo, ema la tesi ó husar talin no mós la fó haris ó atu ó bele sai mós. Sira la kumu ó ho masin, no mós la haneras ó. Ema ida la lidu matan ba ó hodi hanoin netik ó atu fó buat nebe ó precisa. Maibe, iha loron nebe ó moris, ó inan husik hela ó iha rai luan; ema ida la hadomi ó houri loron nebe ó moris.’

‘Uanhira ha’u liu housi ó sorin hodi haré ó toba hela iha ó nia ran nia leet, Ha’u dehan ba ó: Moris ba iha ó ran nia leet hodi buras hanesan du’ut sira iha rai luan. Ó boot ba daudaun hodi hetan isin  di’ak to’o tinan klosan nian. Ó hirus matan sai kmanek, ó fúuk sai ua’in. Maibe, ó la hatais buat ida. Ha’u liu besik tan iha ó sorin, Ha’u haré katak ó tinan to’o ona kona ba hanoin domin nian. Ha’u taka tiha ó ho Ha’u nia hatais rohan hodi subar tiha ó isin molik. Nune’e, Ha’u halo juramento ida hodi hametin tiha lia moruk ida ho ó – Na’i Maromak dehan – Ó hela tiha mai Ha’u. Ho ué, Ha’u fase tiha ó, hamos tiha ó housi ran nebe taka hela ó, hodi kose mina reino ba ó; Ha’u fó hatais tiha ó ho hatais borda nian; Ha’u fó hatais sandálias di’ak nian ba ó, Ha’u fó futu kabun hena linho nian ida atu kesi ó knotak ho tan kapa ida hena seda nian hodi taka ó. Ha’u hafutar ó ho murak oi-oin, tau iha ó liman kelu ho korenti iha ó kakorok. Ha’u tau kadeli ida iha ó inus, brinku sira iha ó tilun, no kaibau murak nian iha ó ulun. Ó hafutar-an ho osan mean no osan mutin, ó hatais hena mesak linho, seda no borda nian; Ó nia aihan mak trigo nia funan, uani-uen no mina reino. Ó sai kmo’ok tebes to’o sai nu’udar ukun-na’in nação nian. Ó nia naran boot halekar tiha iha nação sira hotu leet, tan ó nia kmo’ok, basá, Ha’u hafutar ó ho Ha’u nia kmanek  rasik – Na’i Maromak dehan.

Maibe, ó laran metin iha ó nia kmo’ok, laran metin iha ó naran boot; ó halo-an nu’udar ema áat hodi fó ó an ba moris áat ba ema nebe liu atu hela ho sira. Maibe, Ha’u sei hanoin hikas fali Ha’u nia lia moruk nebe halo ho ó, uanhira ó sei foin sa’e no hametin ho ó lia moruk rohan laek ida. Nune’e, ó sei hanoin hetan fali ó nia hahalok uluk nian hodi sente moe, atu hodi ó nia laran rua-rua, ó sei la loke ibun uanhira Ha’u perdua buat nebe ó halo, Na’i dehan.

Maromak Futar Lia.

 

Salmo Responsorial                                                                                                                                      Is. 12. 2-3, 4bcd, 5-6 (R.1c)

Refrão : Na’i, Ita laran nakali tun tiha, Ita haksolok ha’u!!! Repete-se

  • Maromak mak ha’u maksoi,

          Ha’u laran metin, ha’u la tauk.

          Na’i mak ha’u biit, ha’u ksolok.

          Na’i mak ha’u maksoin! Refrão

 

  • Ho ksolok imi kuru ué iha ué matan maksoin.

          Fó agradece ba Maromak, harohan ba Nia naran,

          Tatoli ba povo sira, Nia hahalok kmanek,

          Haklaken ba  hotu katak Nia naran Santo. Refrão

 

  • Hananu ba Na’i, basá Nia hahalok kmanek ua’in,

          Haklaken iha rai tomak.

          Hananu no haksolok ba, sira be hôrik iha Sião,

          Tan iha ona iha imi leet, Israel nia Santo. Refrão

 

Aclamação                                                                                                                                                                                          1Tes. 2:13

Refrão : Aleluia, Aleluia! Repete-se

                  Simu ba ho laran tomak lia menon nebe Na’i hato’o ba imi;

                  laos hanesan ema nia liafuan,

                  maibe, nu’udar Maromak futar liafuan. Refrão

 

Evangelho                                                                                                                                                                                        Mt. 19:3-12

Na’i Jesus Cristo nia Evangelho nu’udar São Mateus haktuir:

 Iha tempo neba, ema fariseu balu hakbesik ba Jesus atu koko Nia. Sira dehan ba Nia: “Ema ida bele husik nia féen tan buat nar-naran ida?” Jesus hatan ba sira: “Imi la lé katak houri uluk, Ida be halo ema, halo mane no feto, Nia dehan: ‘Tan ida ne’e, mane sei husik nia aman no inan, ba hamutuk ho nia féen, sira rua sai isin ida de’it?’ Nune’e, sira la’os ona na’in rua, maibe ida de’it. Ne’e duni, buat nebe Maromak tau hamutuk ona, ema ida la bele haketak”.

Sira dehan hikas ba Nia: “Nune’e karik, tan sá Moisés haruka fó surat fahe-malu atu ema id abele husik nia féen?” Jesus hatan ba sira: “Tan imi nia fuan tós mak Moisés haruka imi atu fó surat molok husik imi nia féen. Maibe, houri uluk, la hanesan ne’e. Ha’u dehan ba imi: Sé mak husik nia féen, la’os tan hahalok sala foer hodi káben feto seluk, nia halo sala adultério”.

Escolante sira dehan ba Nia: “Mane nia situação iha nia relação  ho nia féen nune’e karik, di’ak liu lalika káben!”

Jesus hatan ba sira: “La’os ema hotu hatene tuir hanourin ida ne’e, maibe, ba de’it sira nebe Na’i hakotu ona lia. Lós duni, iha nalin sira nebe ema sira mak halo, no iha mós ema sira nebe halo-an nalin ba an rasik tan reino Lalehan. Sé mak bele rona, rona ba!”.

Lia Maksoyn.

Leave a Reply

Your email address will not be published. Required fields are marked *