shadow
Diocese de Dili > NOTÍCIAS > REFLEXÃO > CRISTO: AI-HAN MORIS ROHAN LAEK

CRISTO: AI-HAN MORIS ROHAN LAEK

LEITURA & REFLEXÃO DOMINGO COMUM XX /Ano B/2018

  Prov 9,1-6   Ef 5,15-20   Jo 6,51-58

 

Primeira Leitura                                                                                                                                                                           Prov. 9, 1-6

Lia housi livro Provérbio:

Matenek halo ona nia uman, harí ona rin hitu ba nia uman. Nia óho ona nia balada sira prepara ona tua; tau ona iha mesa. Nia haruka nia atan feto sira, ba fatin áas sira iha cidade, atu dehan ba ema sira: “Sée mak neon mós bele mai!” ba ema beik-ten sira,  matenek dehan: “Mai han pão, mai hemu tua, nebé ha’u sosa ona ba imi. Imi husik tiha imi nia beik atu bele moris, hodi la’o tuir Maromak dalan”.

Maromak Futar Lia

 

Salmo Responsorial                                                                                                                       Sal. 33(34), 2-3. 10-11. 12-13. 14-15

Refrão : Imi koko ba, hodi haré Na’i di’ak oin sá!!! Repete-se

 

  • Hahí Maromak loron kalan;

          Ha’u hahí nafatin Nia.

          Maromak mak ha’u nia glória.

          Ema kiik sira rona Nia ho ksolok. Refrão

 

  • Na’i nia Santo sira, hana’i Maromak ba,

          Buat ida la kuran ba ema sira nebé hana’i Maromak.

          Ema sira be riku sei sai ki’ak;

          Buat di’ak ida la kuran ba sira be buka Maromak. Refrão

 

  • Ha’u oan sira, hakbesik mai, hodi rona Ha’u;

          Ha’u hanorin imi hamta’uk Maromak.

          Imi sée mak  hakarak moris?

          Sée mak hakarak hatene loron ksolok? Refrão

 

  • Haré ó nanal keta sala,

          Haré ó ibun keta dehan lia bosok.

          Halo buat di’ak, sóe buat aat;

          Buka nafatin dame to’o hetan. Refrão

 

Segunda Leitura                                                                                                                                                                            Ef. 5, 15-20

Lia housi São Paulo nia surat ba sarani sira iha Êfeso:

Maun alin sira: Loke matan hodi haré imi nia moris. Keta moris nu’udar ema beik, maibé, moris nu’udar ema matenek. Keta lakon lerek tempo hirak ne’e, basá, ita moris iha susar laran. Ne’e duni keta beik, maibé buka hatene lolós Maromak nia hakaran. Keta hemu tua to’o lanu, basá, hemu resin fó bíban ba sala fo’er. Buka hakonu-an ho Espírito Santo. Iha imi leet, buka hamulak ho hananu salmo ho knananuk seluk di’ak nian tan, buka hahí Maromak iha imi laran. Fo agradece nafatin Aman Maromak, tan buat hotu, hodi Na’i Jesus Cristo nia naran.

Maromak Futar Lia.

 

Aclamação                                                                                                                                                                                             Jo. 6, 56

Refrão : Aleluia! Repete-se

                  Ema sée han Ha’u Isin, no hemu Ha’u Ran,

                  Nia horik iha Ha’u, Ha’u horik iha nia,

                  Na’i futar lia. Refrão

 

Evangelho                                                                                                                                                                                        Jo. 6, 51-59

Na’i Jesus Cristo nia Evangelho nu’udar São João haktuir:

Iha tempo nebá, Jesus lia tun ba ema lubun boot sira: “Ha’u ai-han moris tun housi lalehan. Ema nebé han ai-han ne’e, nia sei hetan moris rohan laek. Ai-han Ha’u atu fo mak Ha’u nia isin nebé Ha’u sei fo, atu mundo hetan moris. Ema judeu sira haksesuk malu, dehan: “Ha’u dehan tebes ba imi: Imi la han karik Mane Maksoyn nia isin, imi la hemu kaik Nia ran, imi sei la hetan moris. Ema nebé han Ha’u nia isin hemu Ha’u nia ran, nia hetan moris rohan laek. Ha’u sei halo nia moris hias duni iha loron ikus. Basá, HA’u nia isin ai-han tebes ida, Ha’u nia Ran buat hemu tebes ida. Sée han Ha’u Isin, no hemu Ha’u Ran, nia horik iha Ha’u, no Ha’u horik iha nia. Nu’udar Ha’u Aman, moris hun, haruka Ha’u mai, Ha’u moris tamba Ha’u Aman, nune’e mós, ema nebé haan Ha’u isin, nia moris tamba Ha’u. Ida ne’e mak ai-han tun housi lalehan. Ai-han ne’e la hanesan ida nebé imi nia Aman sira han, hafoin mate hotu. Ema nebé han ai-han ne’e, nia sei moris nafatin. Lia hirak ne’e Jesus fo hatene sai ba sira, wainhira Nia hanourin hela sira, iha Sinagoga, Cafarnaun nian.

Lia Maksoyn.

 

Reflexão:

CRISTO: AI-HAN MORIS ROHAN LAEK
Semana hirak tutuir malu nee, Evangelista João relata fila fila lalaok milagrosa no doutrina balu nebe Jesus hatoo, liliu koalia kona ba pão (ai-han) nebe ita ema precisa hodi hetan moris. Domingo semana nee,  São João Evangelista dala ida tan relata katak Jesus laos halo milagre sira hodi atrai ema barak maibé, milagre hirak nee halo ema hatene lolos katak Jesus saran duni Ninia isin no ran (Eucaristia/Missa) nudar ai-han espiritual nebe extra-ordinário  (luar biasa). Ai-han nee fo kbiit mai ita mea nudar criatura hodi halao viagem moris iha mundo nee ba moris rohan laek iha mundo seluk. Nunee, Domingo semana nee, ita hetan convite hodi  haklean sentido husi Cristo nia Futar Isin no Ran nudar ai-han espiritual be fo kbiit ba ita nia moris.

Maske ho maneira no imagem nebe diferente, cada religião sempre expressa saudades ema nian hodi ba hasoru malu ho Maromak. Santo Agostinho iha ninia quota ida dehan: Hau klamar la hakmatek wainhira seidauk horik iha Maromak nia kadunan. Ita rasik sente hakmatek, seguro, acerta, wainhira ita sente hamutuk ho Maromak. Maibé, dalaruma mos iha ita nia viagem moris, ita sente Maromak dook tebes husi ita. Ita sente moris nee maran liu. Moris nee mak nee mak nee deit, moris nee nakonu ho susar.           

Lalaok ida nee mak acontece ba povo Israel sira nudar povo escolhido (povo nebe Maromak hili) iha Antigo Testamento, liliu wainhira sira halao viagem liu husi rai fuik maran (deserto). Iha neba, sira sente hamlaha no hamrook, maibé, Maromak sempre hakonu sira nia necessidade hodi haraik manna tuun husi lalehan, atu sustenta sira continua viagem naruk ida nee.

Ida nee mos mak acontece iha Novo Testamento, wainhira Jesus hasoru malu ho ema hirak be hamlaha ba kbun, hamlaha mos ba klamar. Hanesan São João Evangelista relata Domingo hirak tutuir malu ba kotuk nee katak Jesus fo han sira iha sira nia viagem tuir Jesus nee. Husi nee, Jesus hakarak hatudu ba sira be tuir Nia (inclui mos ita nobun ohin loron nian) katak; laos deit ai han ba isin mak ita precisa maibé, ita mos precisa ai-han especial espiritual nudar we matan moris nebe la nahas.

Hodi halakon ita nia hamrook rohan laek iha ita-an nee duni mak, Jesus apresenta-An (hatudu-An) nudar Pão Moris husi Lalehan. Amana Maromak mak haruka Nia mai hodi horik hamutuk ho ita (Emanuel) iha moris agora nian. Maske nunee, Jesus nia presença mos atu fo kbiit isin nian (físico) nebe temporário (sementara) ao mesmo tempo fo kbiit ba ita hodi hetan we matan moris nebe sei la maran.
Concretamente, lalaok hirak nee hotu acontece mai ita iha Sacramento Eucaristia. Sacramento nee nudar fundamento husi realização knaar sarani nian nebe Jesus hahu kuda iha tempo uluk too oras nee. Eucaristia laos simbologia hanesan ita nia irmão separado sira fiar maibé, ba Cristão Católico, Eucaristia mak sinal realidade/concreto Jesus nian nudar we matan moris rohan laek. Tanba nee mak Jesus dehan; Hau mak Pão Moris tun husi Lalehan. Sinal concreto Jesus nian nee mak ita simu iha Eucaristia. Ita cumpri knaar iha Eucaristia hodi simu Jesus nia isin no ran directamente. Jesus mak convida ita. Jesus tenik iha Evangelho katak; hakbesik mai Hau, imi sira be kolen no susar. Jesus presente iha ita leet liu husi Eucaristia. Jesus dehan; iha nebe mak ema ida rua halibur mutuk iha Hau nia naran, Hau sei horik iha neba.

Iha missa Eucarisita, liu husi amu lulik sira, Jesus rasik presente hodi hasae karan ba Maromak, no karan nee rasik mak Jesus Cristo nebe partilha eh fahe ba povo Maromak nian. Cristo nia isin no ran nee mak halo ita hamutuk ho Maromak.

Consequência saida mak ita hetan wainhira ita simu Eucaristia? Se ita fiar metin duni saida amk ita haré no simu, nee significa ita simu duni Cristo nia Fuatr Isin no Ran. Tan Jesus sai duni we matan moris ba ita nobun. Cristo nia moris hanesan ita, ita nia moris sai hanesan Cristo. Moris tuir saida mak Cristo haruka no hanorin. Hamutuk ho Cristo significa hatudu hamutuk nee ho ema seluk nebe ita horis hamutuk iha sociedade ida.  

Nunee, ita fiar no entende katak; simu Cristo iha Euaristia kmanek tebes ba ita nebe sei halao viagem naruk iha mundo nee tan ita simu Cristo, halo ita hetan rahun diak eh laran metin ba ema ida nebe fo-An ba ita nia moris aban bain rua nee. Ai-han espiritual (hostia consagrada) nebe ita simu laos ba ita mesak deit maibé, ba mos ema seluk liu husi fahe eh halo buat diak ruma ba ema seluk. Qualquer lalaok nebe ita halo ba ema seluk ho fuan mos, nee ita halo ba Cristo. What so ever you do to the least of my people, that’s you do unto Me (saida deit mak o halo bah au nia ema nebe kiik liu, nee o halo mai Hau). Assim Seja e Bem Haja (ignaslopes)

Leave a Reply

Your email address will not be published. Required fields are marked *