shadow
Diocese de Dili > NOTÍCIAS > LETURA DIÁRIA > Domingo, XXI Tempo Comum (ANO B)

Domingo, XXI Tempo Comum (ANO B)

Primeira Leitura                                             1 Rs. 19, 4-8

Lia housi Livro Liurai sira nian:

Iha loron hirak nebá, Josué halibur uma-fukun hotu-hotu Israel nian, iha Siquém, hodi bolu hamutuk ema katuas sira, ulun sira, juíz sira no boboot sira. Sira hotu mai hamriik iha Maromak futar oin. Josué hato’o lian ba povo, hodi dehan: “Imi la kohi karik serbí Maromak, ohin, imi bele fihir ida nebé imi hakarak serbí: serbí ba maromak nebé imi aman sira hana’i iha mota sorin balu ba, eh maromak ema Amorreu sira nian be imi horik daudaun iha sira rain. Ha’u ho ha’u nia uma laran, ami serbí Maromak”. Maibé, povo hatán, hodi dehan: “Ami la hanoin kona, husik Na’i, hodi serbí fali maromak fariseu. Na’i de’it mak ami nia Maromak. Nia mak hasai ami housi rai Egipto, hasai housi atan, hodi hatudu buat foun oin-oin mai ami. Maromak de’it mak tulun ami iha dalan naruk nebé ami la’o tuir, iha povo sira seluk leet. Ami mos sei hana’i de’it Maromak, basá, Nia de’it mak ami nia Maromak”.

Maromak Futar Lia.

 

Salmo Responsorial                                                                                                        Sal. 33(34), 2-3. 16-17. 18-19. 20-21. 22-23

Refrão : Imi koko ba hodi haré, Na’i nia di’ak oin sá!!! Repete-se

 

  • Hahí Maromak loron kalan;

          ha’u ibun hahí nafatin Nia.

          Maromak mak ha’u nia glória.

          Ema kiik sira rona Nia ho ksolok. Refrão

 

  • Maromak haré nafatin ema nebé laran di’ak,

          rona nia halerik.

          Na’i rona nia hakilar,

          hasai nia housi susar laran. Refrão

 

  • Na’i, Maromak nebé besik ba sira be laran susar,

          hodi fo kmaan ba sira nebé neon nakraik.

          Maski terus oin-oin,

          ema laran mós sei simu tulun housi Maromak. Refrão

 

  • Nia ruin sira hotu di’ak nafatin,

          ida de’it mos la tohar.

          ema laran aat, nia hahalok rasik lori Nia ba mate;

          sei simu castigo

          ema nebé rai odi hasouru ema laran mos. Refrão

 

  • Na’i sadia nia atan sira.

          Ema nebé buka mahan iha Nia, sei la hetan susar.

          Maibé, Nia sei hamriik hasouru ema aat

          hodi halakon nia hodi oin housi rai. Refrão

 

Segunda Leitura                                                                                                                                                                            Ef. 5, 21-33

Lia housi São Paulo nia surat ba sarani sira iha Êfeso:

Maun alin sira: Imi buka haraik-an ba malu tan Cristo. Feto sira sei hamta’uk sira nia la’en, nu’udar hamta’uk Cristo; basá, la’en mak feto nia ulun, nu’udar Cristo mak Kreda nia ulun; Kreda mak Cristo nia isin lolon, Cristo mak Kreda nia Maksoyn. Hanesan Kreda hamta’uk Cristo, nune’e mos feto sira sei hamta’uk sira nia la’en, kona ba buat hotu. La’en sira, hadomi imi nia káben, nu’udar Cristo hadomi Kreda, hodi saran-An ba mate tamba nia, atu halo sira sai kmanek, atu hamós nia hodi wé baptismo no lia foun moris nian, atu hatudu Kreda ba nia-An rasik, nu’udar Kreda ida nabilan boot, fo’er laek, la namkurut, la ho buat seluk ruma hanesan fo’er; maibé, Kreda ida santa, salan laek tebes. Nune’e mak la’en sira sei hadomi sira nia fe’en nu’udar sira isin lolon rasik. Sée hadomi nia fe’en, hadomi nia an rasik. Basá, ema ida sei dauk hakribit nia isin lolon rasik; maibé, hotu-hotu fo han, hadi’a didi’ak nia isin, nu’udar Cristo halo mos ba nia Kreda, basá, ita, Cristo nia liman-ain. Tan ba ne’e, mane sei husik aman-inan, atu hamutuk ho nia fe’en: sira na’in rua sai duni isin lolon ida de’it. Mistério ida ne’e boot duni, nebé ha’u hateten ba imi kona ba Cristo no kona ba Kreda. Kona ba imi, ida-idak sei hadomi nia fe’en, nu’udar hadomi nia an rasik. Fe’en sei hamta’uk nia la’en.

Maromak Futar Lia.

 

Aclamação                                                                                                                                                                                 Jo. 6, 64b. 69b

Refrão : Aleluia, Aleluia! Repete-se

                  Na’i, Ita futar lia-fuan mak Espírito no moris;

                  Ita Boot iha lia-fuan moris rohan laek. Refrão

 

Evangelho                                                                                                                                                              Jo. 6, (55) 60-71 (60-69)

† Na’i Jesus Cristo nia Evangelho nu’udar São João haktuir:

Iha tempo nebá, rona tiha Jesus hateten: “Ha’u nia Isin ai-han tebes, Ha’u nia Ran buat hemu tebes”, Escolante barak dehan: “Lia-fuan hirak ne’e to’os teb-tebes. Sée lós mak bele rona?” Jesus hatene tiha iha nia laran, katak nia Escolante sira hamúu kona ba ne’e, Nia lia tun ba sira: “Lia-fuan hirak ne’e la monu ba imi laran? Imi haré karik Mane Maksoyn sa’e ba fatin nebé uluk Nia horik ba, sei nusá lós? Espírito mak halo moris; isin la vale buat ida. Lia-fuan hirak nebé Ha’u dehan ba imi ne’e, lia-fuan klamar no moris nian. Maibé, iha imi leet, iha imi balun la fiar”. Tebes, houri uluk kedas Jesus hatene hela ema se-se mak la fiar, mos ema nebé mak atu saran Nia ba mate. Hafoin, Jesus hateten tan: “Tan ba ne’e mak Ha’u dehan: Ema ida la bele mai Ha’u, Ha’u Aman la dada karik nia”. Iha oras ne’e kedas Jesus nia Escolante barak hadook-an tiha, la kohi la’o tan ona ho Nia. Tan ne’e, Jesus lia tun ba sira na’in sanulu resin rua: “Imi mos hakarak ba ona?” Simão Pedro hatán ba Nia: “Na’i, ami atu ba lós sée. Ita mak iha lia-fuan moris rohan laek nian! Ami fiar, ami hatene katak Ita mak Maromak nia Santo”. Jesus lia tun ba sira: “Laós Ha’u rasik mak fihir imi sanulu resin rua? Maibé, imi ida diabo”. Jesus ko’alia nune’e kona ba Judas, Simão Iscariotes nia oan. Basá, Judas, sira na’in sanulu resin rua ne’e ida, nia mak sei saran Jesus ba mate.

Lia Maksoyn.

Leave a Reply

Your email address will not be published. Required fields are marked *