shadow
Diocese de Dili > NOTÍCIAS > LETURA DIÁRIA > Quarta-Feira, XX Semana Tempo Comum

Quarta-Feira, XX Semana Tempo Comum

ANO B

 

Primeira Leitura                                                                     Ez. 34. 1-11

Lia housi Profecia Ezequiel nian

Na’i lia tun mai ha’u nune’e: “Emar nia oan, ó si’ik hasouro bibi-atan sira Israel nian. Ó si’ik hodi dehan ba bibi-atan sira ne’e: ‘Na’i Maromak dehan nune’e: Aat tebes ba bibi-atan sira Israel nian nebe tau matan ba sira-an rasik. La’os ba bibi sira mak bibi-atan sira sei tau matan? Imi hasai susu-uen ba imi nia aihan, bibi malae fulun ba imi nia hatais, imi oho balada  sira be bokur tebes hodi hasa’e sacrifício, maibe, imi la lori sira ba du’ut matak. Imi la fó han balada sira be biit laek; la tau matan ba sira be moras, la tau ai-moruk ba sira nebe kanek. Imi la lori hikas mai luhan bibi nebe la’o dook housi luhan no mós la buka tuir bibi nebe la’o dook housi luhan no mós la buka tuir bibi sira nebe lakon. Imi haré sira ho lia maka’as no todan. Sira la’o namkari tiha. Tan bibi-atan la iha, sira sai aihan balada fuik sira nian; tan sira la’o namkari dook. Ha’u nia bibi sira la’o hela iha foho sira leten, la’o namkari hela iha rai tomak; ema ida la  hanoin atu tau matan ba sira, ema ida la buka atu halibur sira”.

Tan ne’e, bibi-atan sira, imi rona Na’i Nia liafuan ba: Tebes duni, nu’udar Ha’u moris – Na’i Maromak dehan- nune’e Ha’u sei hhusu konta ba imi, tan Ha’u Nia bibi sira la iha bibi-atan, husik hela iha na’uk ten sira liman hodi sai tiha nu’udar aihan ba balada  fuik sira nian. Basá, Ha’u Nia bibi-atan sira la kohi tau matan ba Ha’u Nia bibi sira. Sira tau matan de’it ba sira-an rasik; la lori Ha’u nia bibi sira ba du’ut matak.” Tan ne’e, bibi-atan sira, rona Na’i nia lia ba. Na’i Maromak ko’alia nune’e: “Ha’u sei ba husu konta ba bibi-atan sira, Ha’u sei ba husu sira atu haraik hikas mai HA’u, Ha’u Nia bibi sira. Ha’u sei la hhusik sira tau matan ba bibi sira, bibi-atan sira sei la tau tan matan ba sira-an rasik. Ha’u sei soi Ha’u Nia bibi sira housi sira ibun; sira sei la han tan Ha’u Nia bibi sira”.

Basá, Na’i Maromak ko’alia nune’e: “Ha’u rasik mak sei tau matan ba Ha’u Nia bibi sira; Ha’u sei haré didi’ak sira”.

Maromak Futar Lia.

 

Salmo Responsorial                                                                                                                          Sal. 22(23). 1-3ª, 3b-4, 5, 6 (R. 1)

Refrão : Na’i ha’u Mahein, ha’u la kuran buat ida!!! Repete-se

 

  • Na’i, ha’u nia mahein, ha’u la kuran buat ida;

          Lori ha’u ba hakmatek iha du’ut matak,

          Lori ha’u ba ué malirin

          Hodi haksolok ha’u klamar. Refrão

 

  • Na’i lori ha’u kona dalan lós tan hadomi Nia naran.

          Maski ha’u la’o housi rai-kle’an nakukun

          Ha’u sei la ta’uk buat áat ida, tan Ita hamutuk ho ha’u.

          Ita Nia ai-tonka no ai-tato’an

          Fó laran metin mai ha’u. Refrão

 

  • Ita hadi’a aihan mai ha’u

          Iha ha’u funu baluk sira oin.

          Ho mina, Ita hamorin ha’u ulun;

          Ha’u cálice nakonu resin. Refrão

 

  • Laran di’ak no graça sei la’o tuir ha’u,

          Lor-loron iha ha’u nia moris;

          Ha’u sei hela iha Na’i nia uma

          Tinan-ba-tinan–nafatin. Refrão

 

Aclamação                                                                                                                                                                                         Heb. 4. 12

Refrão : Aleluia, Aleluia! Repete-se

                  Maromak Nia liafuan moris no book maka’as,

                  bele hatene lolós buat nebe ema hanoin no hakarak iha nia fuan. Refrão

 

Evangelho                                                                                                                                                                                     Mt. 20. 1-16ª

Na’i Jesus Cristo nia Evangelho nu’udar São Mateus haktuir:

Iha tempo neba, Jesus haktuir aiknanoik ida ne’e ba escolante sira: “Reinolalehan nian hanesan uma na’in ida nebe sai iha dadersan atu halo contrato ho ema serbisu na’in sira ba nia to’os uvas nian. halo tiha contrato ho sira loron ida denariu ida, nia haruka sira ba nia to’os. Tuku sia, nia sai fali hodi haré ema sira seluk iha dalan la halo buat ida. Nia dehan ba sira: ‘Imi mós ba ha’u nia to’os, ha’u sei fó buat nebe lós ba imi.’ Sira ba. Nia sai iha loron fahe rua, no mós tuku tolu loraik hodi halo nune’e nafatin. Tuku lima loraik, nia hetan tan ema seluk iha neba. Nia husu ba sira: ‘Tan sá imi hamriik loron tomak iha ne’e la halo serbisu ruma?’ Sira hatan, ‘Ema la bolu ami.’ Nia dehan ba sira: ‘Imi mós ba ha’u nia to’os.’ Iha loraik, to’os na’in dehan ba mandor: ‘Bolu serbisu na’in sira hodi selu sira nia kolen, hahu housi sira ikus to’o sira uluk.’ Serbisu na’in sira nebe mai tuku lima loraik hakbesik hodi simu ida-idak denariu ida. Uainhira sira nebe uluk mai, sira hanoin atu simu liu maibe sira mós simu ida-idak denariu ida. Simu tiha osan, sira hamuu hasouru uma na’in hodi dehan: ‘Sira nebe ikus ne’e serbisu oras ida de’it, ó selu sira hanesan ami, nebe terus kole ho manas loron tomak.’ Nia hatan ba sira: ‘Ha’u belun, ha’u la hasouru ha’u lia ba ó: ita la halo contrato denariu ida ba loron ida? Ne’e duni, simu buat nebe ó nian hodi ba ona. Ha’u hakarak fó ba ida ikus ne’e hanesan ha’u fó ba ó. Ha’u la bele halo nu’udar ha’u hakarak ho ha’u nia rikusoi? Ka ó laran moras tanba ha’u laran di’ak?’

Nune’e sira nebe ikus sei sai uluk, sira nebe uluk sei sai ikus.”

Lia Maksoyn.

Leave a Reply

Your email address will not be published. Required fields are marked *