shadow
Diocese de Dili > NOTÍCIAS > LETURA DIÁRIA > Sábado, XX Semana Tempo Comum

Sábado, XX Semana Tempo Comum

ANO B

 

Primeira Leitura                                                                      Ez. 43. 1-7ª

Lia housi Profecia Ezequiel nian

Iha loron hirak neba, Anjo lori ha’u ba to’o templo nia odamatan nebe fila ba Loro-Sa’e. Glória Maromak Israel nian mai housi Loro-Sa’e ho tarutu boot ida hanesan ué boot nian, no rai sai naroman ho Nia glória. Mehi ida ne’e, hanesan ida be ha’u hetan ona uanhira ha’u mai atu harahun cidade, no hanesan ida be ha’u hetan ona iha mota Quebar nia ninin. Nune’e, ha’u monu taka oin ba rai.

Na’i Nia glória tama iha templo housi odamatan nebe fila ba Loro-Sa’e. Espírito foti ha’u hodi tau ha’u iha templo laran; glória Na’i Nian hakonu tiha templo. Tuir mai, ha’u rona ema ida ko’alia mai ha’u housi templo laran, uanhira ha’u nia maluk hamriik hela iha ha’u sorin. Nia ko’alia mai ha’u nune’e: “Emar nia oan, iha ne’e mak fatin Ha’u trono nian, fatin nebe Ha’u ain hamriik ba: iha ne’e mak Ha’u sei hôrik nafatin iha Israel oan sira nia leet”.

Maromak Futar Lia.

 

Salmo Responsorial                                                                                                      Sal. 84(85). 9ab-10, 11-12, 13-14 (R. cf. 10b)

Refrão : Na’i Nia glória sei hôrik nafatin iha ita rain!!! Repete-se

 

  • Ha’u rona buat be Na’i dehan:

          Maromak fó hatene dame ba Nia povo no Nia sarani.

          Nia maksoin besik ba ema be hamta’uk Nia;

          Nia glória hôrik iha ami rain. Refrão

 

  • Laran di’ak no domin sei hasouru malu,

          Dame no justiça sei hako’ak malu.

          Laran di’ak sei tubun housi rai,

          Justiça sei tun mai housi Lalehan. Refrão

 

  • Na’i sei haraik buat nebe di’ak,

          Ita rain sei fó fuan.

          Justiça sei la’o iha Nia oin,

          Dame sei sama tuir Nia ain fatin. Refrão

 

Aclamação                                                                                                                                                                                Mt. 23. 9b, 10b

Refrão : Aleluia, Aleluia! Repete-se

                  Imi Aman ida de’it, Aman Lalehan;

                  Imi nia Mestre ida de’it, Na’i Jesus Cristo. Refrão

 

Evangelho                                                                                                                                                                                       Mt. 23. 1-12

Na’i Jesus Cristo nia Evangelho nuda’ar  São Mateus haktuir:

Iha tempo neba, Jesus ko’alia ba ema lubun boot no ba nia escolante sia dehan: “Escriba no Fariseu sira tur iha Moisés nia kadeira. Ne’e duni, simu ba hodi halo tuir buat hotu nebe sira dehan ba imi; maibe keta tuir sira nia hahalok, basá sira ko’alia maibe la halo. Sira futu naha todan no susar atu foti, hodi tau ba ema sira nia kbás, maibe sira rasik la book nia ho sira nia liman fuan ida. Sira halo buat hotu atu ema haré sira. Nune’e, sira kesi fita boot ida ba sira nia reen tós hodi hanaruk sira nia tais ninin; sira kaan atu tur iha fatin uluk iha festa sira hodi buka tur iha oin iha sinagoga laran; sira hakarak ema cumprimenta sira iha prasa hodi bolu sira ‘Rabbi.’ Imi fali, keta husik ema hanaran imi ‘Rabbi’, basá imi nia Mestre ida de’it, no imi hotu mesak maun alin. Keta bolu ema ida aman iha rai, basá imi nia Aman ida de’it, nebe iha lalehan. Keta husik ema hanaran imi doutor, basá imi nia doutor ida de’it: Cristo. Ida nebe boot liu iha imi leet sei sai imi nia atan. Ida nebe foti an, Na’i sei hatun nia; ida nebe haraik an , Na’i sei hahi nia.”

Lia Maksoyn.

Leave a Reply

Your email address will not be published. Required fields are marked *