shadow
Diocese de Dili > NOTÍCIAS > LETURA DIÁRIA > Sexta-Feira, XX Semana Tempo Comum

Sexta-Feira, XX Semana Tempo Comum

Ano B

 

Primeira Leitura                                                                      Ez. 37. 1-14

Lia housi Profecia Ezequiel nian.

iha loron hirak neba, Na’i Nia liman tau iha ha’u leten, hodi Nia espírito lori ha’u ba hatur iha rai kle’an boot ida nebe ruin sira de’it mak nakonu. Nia lori ha’u ba- mai iha ruin sira ne’e nia leet; ruin sira ne’e ua’in tebes iha rai kle’an ne’e, nebe maran hotu tiha ona. Na’i dehan mai ha’u: ”Emar nia oan, ruin sira ne’e sei bele moris hi’as? Ha’u hatan:”Na’i Maromak, Itaboot mak hatene!” Nune’e, dehan hikas mai ha’u: “Ó hanourin kona ba ruin hirak ne’e, hodi dehan ba sira: ‘Ruin maran sira, imi rona Na’i Nia liafuan ba. Na’i Maromak lia tun ba ruin sira ne’e, nune’e: Ha’u sei haruka iis moris nian ida ba imi, imi sei moris hi’as fali. Ha’u sei taka imi ho uat. Hakonu imi ho isin, no hafalun fali imi ho kulit. Ha’u sei huu iha imi iis moris nian ida, halo imi moris fali. Nune’e, imi sei hatene lós katak Ha’u mak Na’i.”’ Ha’u hanourin tuir duni ordem nebe nebe ha’u simu. Uanhira ha’u sei hanourin hela, rona tarutu boot ida hodi halo rai nakdoko; ruin sira ne’e hahu hakbesik-an ba malu. Ha’u fihir hodi haré katak uat sira taka ona iha ruin leten. Maibe, laiha iis moris nian. Na’i dehan mai ha’u: “Ó dehan ba espírito, ó dehan ba: emar nia oan no ó ko’alia nune’e ba espírito: Na’i Maromak dehan: Mai housi lidun háat ba, ó espírito, mai huu iha mate sira ne’e nia leten atu sir abele moris hi’as fali”. Ha’u hateten tiha nu’udar Na’i fó ordem mai ha’u, espírito tama tiha kedas iha mate sira ne’e; sira moris fila fali kedas, hahu hamriik. Sira ne’e soldado lubun boot ida.

Hafoin, Na’i dehan mai ha’u: “Emar nia oan, ruin sira ne’e hotu mesak housi uma-kain Israel nian. Sira haktuir ba sira nia an: ‘Ami nia ruin sira maran hotu ona, ami nia hakaran ami la hetan ona, ami lakon ona’. Di’ak! Dehan ba sira: ‘Na’i Maromak dehan nune’e: Ha’u ba loke imi nia rate sira; housi sira ha’u sei halo imi moris hi’as fali, Ha’u Nia povo, atu lori fila fali imi ba rai Israel. Imi sei hatene lolós katak Ha’u mak Na’i, uanhira ha’u loke imi nia rate sira, housi sira Ha’u halo imi  moris hi’as, Ha’u povo. Ha’u sei tau Ha’u Nia espírito iha imi; imi sei hetan moris, Ha’u sei hametin imi iha imi rain, imi sei hatene lolós katak Ha’u mak Na’i, Ha’u ko’alia sai, Ha’u halo tuir duni. Ha’u,  Na’i mak ko’alia.

Maromak Futar Lia.

 

Salmo Responsorial                                                                                                                                           Sal. 106 (107). 2-9 (R. 1)

Refrão : Hananu ba Na’i, basá, Nia domin rohan laek!!! Repete-se

 

  • Dehan ba sira nebe Na’i soi ona,

          Sira nebe Nia soi ona housi ema áat sira liman;

          Sira nebe Nia halibur ona housi rai lidun hotu,

          Housi Tasi-Feto no Tasi-Mane,

          Housi Loro-Sae no Loro-Monu. Refrão

 

  • Sira la’o lakon iha rai fuik maran,

          La hetan fatin ida atu hôrik ba;

          Sai hamlaha boot no hamo’ok,

          Senti atu mate mohu ona. Refrão

 

  • Iha terus no susar laran sira hahu bolu Na’i,

          Na’i soi duni sira housi terus no susar,

          Lori sira tuir dalan di’ak

          No halo sira hetan hôrik fatin ida. Refrão

 

  • Ita agradece ba Na’i, tan Nia laran-luak,

          Tan Nia halo kmanek oi-oin ba ema sira;

          Tan Nia fó hemu ba sira be hamro’ok,

          No habosu sira be hamlaha. Refrão

 

Aclamação                                                                                                                                                                          Sal 24 (25). 4b, 5ª

Refrão : Aleluia, Aleluia! Repete-se

                  Hatudu Ita dalan mai ha’u,

                  halo ha’u tuir Ita lialós. Refrão

 

Evangelho                                                                                                                                                                                   Mt. 22. 34-40

  Na’i Jesus Cristo nia Evangelho tuir São Mateus

Iha tempo neba, ema fariseu sia rona katak Jesus halo saduceu sira sai nonok, sira halibur an hamutuk. Sira ida, doutor ukunfuan nian, husu koko Nia: “Mestre, ukunfuan ida nebe mak boot liu?” Jesus hatan ba nia: “Ó sei hadomi Na’i, ó nia Maromak ho neon ho laran, ho ó nia klamar tomak. Ida ne’e mak ukunfuan uluk no boot  liu hotu. Ida tuir mai hanesan nia:’Ó sei hadomi ema seluk hanesan ó nia an rasik.’ Ukunfuan rua ne’e, ukunfuan sira hotu no profeta sira nia hun.”

Lia Maksoyn.

Leave a Reply

Your email address will not be published. Required fields are marked *