shadow
Diocese de Dili > NOTÍCIAS > LETURA DIÁRIA > Terça-Feira, XX Semana Tempo Comum

Terça-Feira, XX Semana Tempo Comum

ANO B

 

Primeira Leitura                                                                     Ez. 28. 1-10

Lia housi Profecia Ezequiel nian

Na’i lia tun mai ha’u nune’e: “Emar nia oan, dehan ba liurai Tiro nian: ‘Na’i Maromak ko’alia nune’e:  Ó nia fuan nakonu ho loko-an hodi dehan: Ha’u maromak ida, haaa’u tur iha nia trono maromak nian iha tasi klaran. Maibe, ó la liu ema ida, ó la’os maromak, ó hakarak foti ó fuan hanesan Maromak nian! Nune’e, ó mak matenek liu Daniel no lia sumik ruma la taka ba ó. Tan ó nia badaen no matenek, ó hetan riku-soi sai ua’in, halibur osan mean no osan mutin iha ó nia ai-balun. Ó badinas tebes halo contrato, tan ne’e, ó riku-soi sai ua’in liu tan, Ó nia fuan sai nakunu ho ksolok loko-an nian, ho riku-soi hirak ne’e. Tan ne’e mak Na’i Maromak ko’alia nune’e: Tan ó hakarak sai hanesan Maromak, Ha’u halo atu ema rai seluk nian, be siak liu iha povo sira leet, mai hafunu hasouru ó. Sira sei lere ho surik hasouro ó nia badinas; sira sei halo áat ba ó ia moris di’ak. Sira sei soe ó iha rai kuak ida, ó sei mate ho kro’at no iha tasi klaran. Ó sei dehan: ‘Ha’u maromak ida’, ó sei mate ho kro’at no iha tasi klaran. Ó sei mate hanesan ema fiar laek housi liman sira ema rai seluk nian, tan Ha’u ko’alia tiha ona, Na’i Maromak dehan”.

Maromak Futar Lia.

 

Salmo Responsorial                                                                                         Deut. 32. 26-27ab, 27cd-28, 30, 35cd-36ab (R. 39c)

Refrão : Ha’u mak Na’i, moris no mate nian!!! Repete-se

 

  • Na’i dehan, Ha’u sei harahun sira,

          Sei halakon sira housi ema sira hanoin,

          Maibé, Ha’u la ta’uk funu baluk sira nia loko-an,

          Funu baluk sira, Nia heuuai. Refrão

 

  • Tan sira dehan: “Ami nia biit manan,

          Nia Maromak la tahan ami biit!”

          Tan sira derasaan ema beik nian ida,

          Matenek laek. Refrão

 

  • Oinsá ema ida de’it bele duni tuir ema rihun ida,

          no na’in rua bele duni sai ema rihun ida,

          nia Tulun-Na’in la husik hela sira karik;

          Na’i la haraik karik sira ba nia liman? Refrão

 

  • Loron mohu nian besik daudaun ona,

          Nia destino besik ona,

          Tan Na’i sei hatau Nia povo,

          Sei sadi’a Nia atan sira. Refrão

 

Aclamação                                                                                                                        2Cor. 8. 9

Refrão : Aleluia, Aleluia! Repete-se

                  Na’i Jesus Cristo be riku, halo an kiak tan imi,

                  atu imi bele sai riku hodi Nia kiak. Refrão

 

Evangelho                                                                                                                                                                                    Mt. 19. 23-30

Na’i Jesus Cristo nia Evangelho nu’udar São Mateus haktuir:

Iha tempo neba, Jesus hateten nune’e ba escolante sira: “Tebes, Ha’u dehan ba imi: ema riku ida atu tama iha reino lalehan susar. Tebes, Ha’u dehan ba imi: lalais liu ba kuda kamelu ida tama iha daum nia kuak liu fali ema riku ida tama iha reino lalehan.” Uainhira escolante sira rona lia ne’e, sira hakfodak hodi dehan: “Nune’e se lós  mak bele soi an?” Jesus fihir sira hodi dehan : “Ba ema sira, ne’e la bele; maibe ba Maromak buat hotu bele de’it.” Tuir mai Pedro hasa’e lia dehan: “Be ami nebe husik tiha buat hotu hodi tuir Ita boot: ba ami ne’e saída?” Jesus dehan ba sira: “Tebes, Ha’u dehan ba imi: imi sira nebe tuir Ha’u, iha mundo foun, uainhira Oan Mane tur iha nia trono glória nian, imi sei tur mós iha trono sanulu resin rua hodi tesi lia ba suku sanulu resin rua Israel nian. Ema hotu nebe husik uma, maun alin, feton, aman, inan, oan sira ka rai, tan Ha’u nia naran, sei simu dala atus ida liu tan hodi simu mós nu’udar liman rohan moris rohan laek. Barak nebe uluk, sei ikus fali; no sira nebe ikus, sei uluk fali.”

Lia Maksoyn.

Leave a Reply

Your email address will not be published. Required fields are marked *