shadow
Diocese de Dili > NOTÍCIAS > LETURA DIÁRIA > Segunda-Feira, XXI Semana Iha Tempo Comum (ANO B)

Segunda-Feira, XXI Semana Iha Tempo Comum (ANO B)

Primeira Leitura                                            2Tes. 1. 1-5, 11b-12

Lia housi São Paulo nia segunda Surat ba sarani sira iha Tessalónica

Housi Paulo, Silvano no Timóteo, ba Kreda iha Tesalonika nebé iha Aman Maromak no iha Na’i Jesus Cristo, graça no dame ba imi housi Aman Maromak no Na’i Jesus Cristo.

Ami tenki fó agradece nafatin, nu’udar di’ak tebes, ba Maromak tanba imi, maun alin sira; basá imi nia fiar sai boot liu ba daudaun no domin nebé imi iha ba malu sai boot ba nafatin; no iha Maromak nia kreda sira leet ami baga-an liu-liu kona ba imi tan imi nia laran metin no fiar iha susar no terus hot-hotu nebé imi hetan. Ne’e hatudu katak Maromak tesi lia lolós, no buat hotu mosu atu ema bele hetan katak imi soi Maromak nia reino; nebé tan nia imi terus dau-daun.

Tan ne’e, ami hamulak bei-beik ba imi atu ita nia Maromak halo imi soi imi nia vocação, no ho nia kbiit, halo lolós imi nia hakarak atu sai ema di’ak no buat hotu nebé imi halo daudaun tanba fiar; basá nune’e, ita Na’i Jesus Cristo nia naran sei hetan naran boot iha imi no imi iha Nia, housi ita nia Maromak no Na’i Jesus Cristo nia graça.

Maromak Futar Lia.

 

Salmo Responsorial                                                                                                                                                      Sal. 95(96). 1-2ª, 2b-3, 4ª e 5 (R. 3)

Refrão : Haklaken ba povo hotu Na’i Nia kmanek!!! Repete-se

 

  • Hananu ba Na’i knananuk foun ida,

          Hananu ba Na’i, rai-klaran tomak.

          Hananu ba Na’i, hawélok Nia naran. Refrão

 

  • Haklaken loron ba loron, Nia maksoyn.

          Haklaken Nia glória ba reino tomak;

          No ba povo hot-hotu, Ninia kmanek. Refrão

 

  • Tanba Na’i mak boot liu tomak no so’i ema hahi,

          Maromak falso sira la liu ilas folin laek.

          Na’i mak halo lalehan. Refrão

 

Aclamação                                                                                                                                                                                                                   Jo. 10. 27

Refrão : Aleluia, Aleluia! Repete-se

                  Ha’u nia bibi sira rona Ha’u lian,

                  Na’i lia tun: Ha’u hatene sira, sira mai. Refrão

 

Evangelho                                                                                                                                                                                                             Mt. 23. 13-22

Na’i Jesus Cristo nia Evangelho nu’udar São Mateus haktuir:

Iha tempo neba, Jesus hateten nune’e: “Susar boot ba imi, escriba no fariseu sira, laran makerek, basá imi taka reino lalehan nian ba ema sira; imi la tama, no mós la husik ema seluk nebé hakarak atu tama.

Susar boot ba imi, escriba no fariseu sira, laran makerek. Imi han mohu feto faluk sira nia uma hodi lohi sira ho imi nia orasaun nar-naruk; tan ne’e iha loron justiça nian, imi sei hetan kastigu todan.

Susar boot ba imi, escriba no fariseu sira, laran makerek. Imi hakur tasi la’o lemo rai hodi dada ema hotu tuir imi nia fiar no wainhira ida monu iha imi nia liman, imi halo nia sai inferno nia oan dala rua áat liu fali imi. Susar boot ba imi, matadalan sira nebé matan delek! Imi dehan: ‘Ema jura karik hodi templo, ne’e la folin buat ida; maibé ema jura karik hodi osan mean templo nian, nia tenki halo tuir’. Beikten no matan delek sira! Ida nebé mak folin liu: osan mean, ka templo nebé halo santo osan mean? 18Imi dehan tan: ‘Ema ruma jura karik hodi altar, ne’e la folin buat ida; maibé nia jura karik hodi buat karan nebé iha altar leten, nia tenki halo tuir’. Matan delek sira! Ida nebé mak folin liu; buat karan, ka altar nebé halo santo buat karan? Ne’e duni, se jura hodi altar, jura hodi no ba buat nebé iha nia leten. Ema nebé jura hodi templo, jura hodi templo no mós ba Ida nebé hôrik iha nia. Ema nebé jura hodi lalehan, jura hodi Maromak nia tur fatin no mós hodi Ida nebé tur iha nia”.

Lia Maksoyn.

Leave a Reply

Your email address will not be published. Required fields are marked *