shadow
Diocese de Dili > NOTÍCIAS > LETURA DIÁRIA > Domingo, XXII Semana Tempo Comum (ANO B)

Domingo, XXII Semana Tempo Comum (ANO B)

Primeira Leitura             Deut. 4, 1-2. 6-8

Lia housi livro Deuteronómio:

Iha loron hirak nebá, Moisés ko’alia ba povo, dehan: “Israel oan sira: oras ne’e imi sei rona lia-fuan no ukun-fuan nebé ohin ha’u hanorin ba imi. Imi sei halo tuir lia-fuan no ukun-fuan hirak ne’e, atu imi bele la’o to’o ba rai nebé imi nia bei-ala sira nia Maromak, sei haraik ba imi. Imi la bele tau tan buat ida ba lia hirak nebé ha’u fo sai ba imi; lia oan ida mos imi la bele hasai; imi sei halo tuir lolós Na’i, imi nia Maromak. Nia ukun-fuan, nu’udar ha’u fo hatene sai ona. Imi sei haré, imi sei halo tuir ukun fuan hirak ne’e, basá, nune’e, imi hatudu imi nia matenek, imi nia ulun mamar ba nação sira seluk. Nação hirak ne’e, rona tiha ukun-fuan hirak ne’e, sei hateten: ‘Tebes nação boot ne’e matenek no ulun mamar liu’. lós duni, la iha nação ida mak iha Maromak hanesan NA’i, ita nia Maromak; ita nia Maromak rona nafatin ita, wainhira ita harohan ba Nia. Nação boot ne’e mak iha lia-fuan no ukun fuan lós tebes, hanesan ukun-fuan lós tebes, hanesan ukun-fuan ida ne’e, nebé ohin ha’u fo sai ba imi?”

Maromak Futar Lia.

 

Salmo Responsorial                                                                                                                                                                                Sal. 14 (15), 2. 3. 4.5

Refrão : Na’i ema sée horik iha Ita uman? Repete-se

 

  • Horik iha Maromak uman

          Ema nebé buka moris di’ak,

          Nia hahalok la’o tuir justiça,

          Nia neon hanoin lialós. Refrão

 

  • Ema nebé la duun- matak,

          La fo terus nia maun-alin,

          La halo áat nia maluk. Refrão

 

  • Ema nebé haksi’ak ema aat,

          Hahí ema nebé hamta’uk Maromak,

          La haluhan nia juramento. Refrão

 

  • Ema nebé empresta nia osan la ho funan

          La simu atu halo áat ema nebé la sala

          Ema ne’e sei la hetan susar. Refrão

 

Segunda Leitura                                                                                                                                                                               Tg. 1, 17-18. 21b-22. 27

Lia housi São Tiago Nia Surat:

Maun-alin sira: Buat ksolok no kmanek tomak mai housi leten, tun mai housi naroman hun, mai housi Ida nebé laós ohin oin ida, aban oin seluk; ita la hetan iha Nia, buat ida la metin. Tan Nia rasik hakarak, mak Nia haki’ak ita hodi lialós, atu ita sai Nia buat moris tomak nia ulun. Ne’e duni, ho laran maus, simu lia-fuan moris nian iha imi laran. Lia-fuan ida ne’e mak bele soy imi klamar. Imi bukaa moris tuir lia-fuan, keta rona de’it, hodi bosok imi-an rasik. Religião lolós nian, fo’er laek, iha ita Aman Maromak futar oin, mak ida ne’e: ‘tau matan ba oan-ki’ak sira no feto faluk sira iha sira nia susar laran, la fo laran ba mundo nia áat.

Maromak Futar Lia.

 

Aclamação                                                                                                                                                                                                                      Tg. 1, 18

Reftrão : Aleluia, Aleluia!! Repete-se

                    Hodi lialós, Aman Maromak hakarak haraik moris mai ita,

                    atu ita sai nia criatura tomak ulun. Refrão

 

Evangelho                                                                                                                                                                                        Mc. 7, 1-8ª. 14-16. 21-23

Na’i Jesus Cristo nia Evangelho nu’udar São Marcos haktuir:

Iha tempo nebá, ema escriba no fariseu balun, mai housi Jerusalém, hale’u hela Jesus. Sira haré katak Jesus nia Escolante sira, barak han ho liman fo’er, katak la dauk fase. Tebes, ema fariseu no judeu sira hotu la bele han, wainhira sira la dauk fase didi’ak sira liman, tuir lisan bein sira nian. Sira fila tiha mai uma, la tur  atu han, wainhira sira la fase-an tiha, tuir sira lisan. Sira moris  tuir tan, lisan fariseu, tan de’it lisan bein sira nian, hanesan: fase copu, fase buli, solur sanan riti… Tan ne’e, fariseu no escriba sira, husu ba Jesus, “Tan sá Ó nia Escolante sira la tuir bein sira nia lisan, maibé, sira han ho liman fo’er?” Jesus lia tun ba sira: “Imi mesak laran makerek tanan-tanan. Profeta Isaías ko’alia lós duni kona ba imi, wainhira nia hakerek , dehan: ‘Povo ida ne’e hana’i Ha’u ho de’it ibun tutun, maibé, nia laran do’ok lós housi Ha’u! Sira hahi Ha’u leet de’it. Doutrina sira hanourin, mesak ema nia lia-fuan de’it.’ Imi la tuir liu Maromak nia Lia-fuan”. Jesus bolu hikas fali povo, hodi dehan: “Imi se’e tilun mai, atu rona hodi hatene didi’ak:  La iha buat ida iha liur nebé tama hodi halo fo’er ema laran. Buat nebé sai housi ema laran mak hafo’er ema. Basá, housi ema nia laran mak sai hanoin áat: katak, sala fo’er, na’ok, liman mean, soe biti kluni, hakarak buat hotu ba an rasik, laran áat, laran makerek, laran metan, laran moras, ibun fo’er, loko-an, la hamta’uk Maromak! Toman áat sira ne’e, mak hafo’er ema”.

Lia Maksoyn.

Leave a Reply

Your email address will not be published. Required fields are marked *