shadow
Diocese de Dili > NOTÍCIAS > LETURA DIÁRIA > Sábado, XXI Semana Tempo Comum (ANO B)

Sábado, XXI Semana Tempo Comum (ANO B)

Primeira Leitura                                                                                                                                                                                               1Cor. 1. 26-31

Lia housi São Paulo nia segunda Surat ba sarani sira iha Corinto

Maun-alin sira: Hanoin didi’ak katak Maromak bolu imi ona. Iha imi leet, ema matenek tuir ema nia hanoin la barak; ema biit na’in la barak, ema ran liurai la barak, maibe Maromak hili buat nebe ema hanoin katak beik atu halo bilan ema matenek sira; no Maromak hili buat nebe ema hanoin katak biit laek atu halo moe ida nebe maka’as; Maromak hili buat nebe kiak no ema hakribi iha mundo: sira nebe folin laek, atu halo lakon tiha sira nebe iha folin. Nune’e ema ida la bele foti an iha Maromak futar oin. Tan Nia mak imi hela iha Cristo Jesus, nebe sai Maromak nia  matenek, no mós justiça, moris santo no maksoin mai ita. Nune’e, nu’udar hakerek nanis, “Ema nebe hahi an, sei hahi an iha Na’i”.

Maromak Futar Lia.

 

Salmo Resposorial                                                                                                                                                          Sal. 32(33). 12-13, 18-21 (R. 12b)

Refrão : Ksolok ba povo nebe Na’i hili nu’udar Nia lima-rohan!!! Repete-se

 

  • Ksolok ba povo nebe hili Na’i ba nia Maromak,

          Reino nebe Maromak hili ba Nia lima-rohan.

          Housi Lalehan Na’i hanoin,

          Nia hateke ba ema hot-hotu. Refrão

 

  • Maromak tau matan ba sira be hamta’uk Nia,

          Ba sira be hein Nia laran di’ak,

          Atu soi sira klamar housi mate,

          No haraik ba sira aihan iha tempo hamlaha. Refrão

 

  • Ita neon hein Maromak,

          Nia, ita biit, ita mahein.

          Na’i mak ksolok ita fuan nian,

          Ita laran metin iha Nia naran santo. Refrão

 

Aclamação                                                                                                                                                                                                                   Jo. 13. 34

Refrão : Aleluia, Aleluia! Repete-se

                  Na’i hateten, Ha’u fó ba imi mandamento foun:

                  Imi sei hadomi malu nu’udar Ha’u hadomi imi. Refrão

 

Evangelho                                                                                                                                                                                                             Mt. 25. 14-30

† Na’i Jesus Cristo nia Evangelho tuir  São Mateus:

Iha tempo neba, Jesus dehan ba Nia escolante sira aiknanoik ida ne’e: “Ema ida, molok atu ba la’o rai, bolu nia atan sira hodi husik nia rikusoi ba sira. Ba ida, nia fó osan talenta lima, ba ida seluk nia fó rua, ba ida seluk tan nia fó ida;  tuir ida-idak nia biit. Hafoin nia la’o tiha. Ida nebe simu talenta lima ne’e, fila liman kedas ho sira hodi manan tan lima. Nune’e mós, ida nebe simu rua, manan tan rua. Maibe, ida nebe simu de’it ida, ba ke’e rai kuak hodi hakoi subar nia na’i nia osan.

Kleur tiha, atan sira ne’e nia na’in fila mai hodi husu sira kona ba nia osan. Ida nebe simu talenta lima hakbesik hodi fó fali lima tan ba nia dehan: ‘Na’i, ita fó talenta lima mai ha’u, talenta lima tan nebe ha’u manan mak ne’e’. Na’i dehan ba nia: ‘Di’ak lós, atan di’ak no laran lós; tan ó hatudu laran lós iha buat nebe uitoan, ha’u sei fó buat barak ba ó atu tau matan. Tama ba ó na’i nia ksolok’. Tuir mai ida nebe simu talenta rua hakbesik dehan: ‘Na’i, ita fó mai ha’u talenta rua; rua seluk nebe ha’u manan mak ne’e’. Na’i hatan ba nia: ‘Di’ak lós, atan di’ak no laran lós; tan ó hatudu laran lós iha buat nebe ki’ik, ha’u sei fó ba ó buat barak atu tau matan. Tama ba ó na’i nia ksolok’.

Ikus liu ida nebe simu talenta ida, mosu mai dehan: ‘Ha’u hatene itaboot ema maka’as nebe ku’u iha nebe ita la kuda, halibur iha nebe ita la lekar. Tan ne’e ho ta’uk ha’u ba subar tiha ita nia osan iha rai; buat nebe ita nian mak ne’e’. Na’i hatan ba nia: ‘Atan áat no barukten! Ó hatene katak ha’u ku’u iha nebe ha’u la kuda, ha’u halibur iha nebe ha’u la lekar. Ne’e duni, tuir lolós ó sei lori ha’u nia osan ba banco; nune’e, fila tiha mai, ha’u bele foti ha’u nia osan ho funan. Ne’e duni, imi hasai tiha talenta housi nia hodi fó ba ida nebe iha sanulu. Basá ida nebe iha ona sei fó tan hodi hetan barak liu; maibe ba ida nebe la iha, uitoan nebe nia iha sei hasai tan housi nia. Kona ba atan folin laek ne’e, imi soe tiha nia ba nakukun iha liur, iha nebe iha tanis no ruun nehan.”’

Lia Maksoyn.

Leave a Reply

Your email address will not be published. Required fields are marked *