shadow
Diocese de Dili > NOTÍCIAS > LETURA DIÁRIA > Segunda-Feira, XXII Semana Tempo Comum (ANO B)

Segunda-Feira, XXII Semana Tempo Comum (ANO B)

Primeira Leitura                       1Cor. 2. 1-5

Lia housi São Paulo nia primeira Surat ba sarani sira iha Corinto

Maun alin sira: Uainhira ha’u to’o ba imi hodi haklaken Maromak Nia mistério, ha’u la mai ho lia sasin kmanek sira ka ho matenek. Basá ha’u decide atu la bele hatene buat seluk iha imi leet; ha’u hatene de’it Cristo Jesus no Nia nebe ema hedi iha Cruz. Uainhira ha’u iha imi leet, ha’u biit laek, hodi ta’uk no nakdedar tebes, no ha’u ko’alia no haklaken, la’os hodi lia maka’as matenek nian, maibe hodi biit Espírito Santo nian, nune’e imi nia fiar bele hari metin, la’os iha ema nia matenek maibe iha Maromak nia biit.

Maromak Futar Lia.

 

Salmo Responsorial                                                                                                                           Sal. 118 (119). 97, 98, 99, 100, 101-102 (R. 97ª)

Refrão : Na’i, ha’u hadomi tebes Ita lei!!! Repete-se

 

  • Na’i, ha’u hadomi tebes Ita lei,

          Loron tomak ha’u hanoin nia.

          Ha’u matenek liu ha’u funu baluk sira,

          Tan ha’u hamutuk nafatin ho Ita lei. Refrão

 

  • Ha’u matenek liu ha’u mestre sira,

          Tan ha’u hanoin Ita lei.

          Laran mós liu fali katuas sira,

          Tan ha’u halo tuir Ita ukunfuan. Refrão

 

  • Ha’u hadook an housi dalan áat,

          Atu moris tuir Ita ukunfuan.

          Ha’u la hadook-an housi Ita hanourin,

          Tan Ita rasik mak hanourin ha’u. Refrão

 

Aclamação                                                                                                                                                                                                               cf. Lc. 4. 18

Reftrão : Aleluia, Aleluia!! Repete-se

                    Na’i Nia Espírito hôrik iha Ha’u. Nia haruka Ha’u

                    haklaken Lia-foun ba kiak sira. Reftrão

 

Evangelho                                                                                                                                                                                                                Lc. 4. 16-30

Na’i Jesus Cristo nia Evangelho nu’udar São Lucas haktuir:

Iha tempo neba, Jesus mai iha Nazaré, iha neba Nia sai boot. Tuir Nia lisan, Nia tama iha sinagoga iha loron sábado. Nia hamriik atu lê. Sira fó ba Nia livro profeta Isaías nian. Loke tiha livro ne’e, Nia hetan fatin ida nebe hakerek nune’e:

“Na’i nia Espírito iha Ha’u, basá Nia foti tiha Ha’u atu haklaken liafoun di’ak ba kiak sira; Nia haruka Ha’u atu haklaken maksoin ba dadur sira no halo matan delek sia haré; atu soi sira nebe ema hanehan, hodi haklaken Na’i nia tinan rahun kmanek nian.”

Hafoin, taka tiha livro, Jesus fó fali nia ba knaar na’in. Nia tur tiha. Ema hot-hotu iha sinagoga laran hateke ba Nia. Tuir mai, Nia hahu ko’alia ba sira dehan: “Ohin halo tuir lós duni liafuan Escritura nian nebe imi foin rona.” Sira hotu ko’alia di’ak kona ba Nia; hodi hakfodak, tan liafuan kmook nebe sai housi nia ibun. Sira dehan: “Ida ne’e la’os Jose nia oan?” Nia hatan ba sira: “Tebes duni, imi sei hateten mai Ha’u aiknanoik ida ne’e: ‘Doutor, fó isin di’ak ba ó nia isin rasik ba. Buat hotu nebe ami rona O halo iha Kafarnaum, halo mós iha ne’e,  iha O nia rai.’” Nia dehan teni ba sira: “Tebes, Ha’u dehan ba imi katak ema la simu profeta iha nia rai rasik. Ha’u dehan lolós ba imi: iha Elias nia loron, iha feto faluk barak iha Israel, uanhira lalehan taka metin ba tinan tolu no fulan neen nia laran; rai tomak hamlaha boot; maibe Maromak la haruka Elias ba feto faluk sira ne’e ida. Nia haruka de’it ba feto faluk iha Sarepta, iha rai Sidonia. Iha Eliseu nia loron mós, iha ema moras lepra barak iha Israel, maibe sira ida de’it mak hetan isin di’ak, katak Naaman housi rai Siria.” Rona tiha liafuan hirak ne’e, ema hotu iha sinagoga laran, laran nakali teb-tebes. Sira hamriik hodi duni sai Nia housi cidade; hodi lori Nia to’o rai tatinis iha foho leten, iha neba sira nia cidade hamriik hela, atu soe tun Nia housi neba. Maibe Jesus liu housi sira leet, la’o  tuir nia dalan.

Lia Maksoyn.

Leave a Reply

Your email address will not be published. Required fields are marked *