shadow
Diocese de Dili > NOTÍCIAS > LETURA DIÁRIA > Terça-Feira, XXII Semana Iha Tempo Comum (ANO B)

Terça-Feira, XXII Semana Iha Tempo Comum (ANO B)

Primeira Leitura               1Cor. 2. 10b-16

Lia housi São Paulo nia primeira Surat ba sarani sira iha Corinto

Maun  alin sira: Espírito Santo koko buat hot-hotu, to’o hatene momós Maromak. Iha ema sira leet, se mak hatene buat nebe iha ema nia laran; ema ne’e nia espírito de’it mak hatene buat nebe iha nia laran. Nune’e mós, ema ida la hatene Maromak nia laran; Maromak nia Espírito de’it mak hatene. Ita la simu mundo nia espírito maibe Espírito nebe mai housi Maromak, atu ita bele hatene lolós presente nebe ita simu housi Maromak hodi la selu buat ida. No ami hato’o buat sira ne’e, la’os ho liafuan nebe ema nia matenek hanourin, maibe ho liafuan nebe Espírito hanourin, hodi hato’o lialos espiritual ho liafuan espírito nian.

Ema nebe la’os espiritual la simu Maromak nai Espírito nia presente, basá ba nia, buat ne’e mesa bulak, no nia la bele compreende nia basá nia bele haré de’it ho espírito. Maibe ema espiritual bele haré buat hot-hotu  no ema ida la bele tesi lia ba nia. Basá, “Se hatene tiha Na’i nia hanoin atu bele hanourin Nia?”  Maibe ita iha Cristo nia hanoin.

Maromak Futar Lia.

 

Salmo Responsorial                                                                                                                      Sal. 144 (145). 8-9, 10-11, 12-13ab, 13cd-14 (R. 17ª)

Refrão : Na’i, justo iha Nia dalan hot-hotu!!! Repete-se

 

  • Na’i laran midar no laran-luak,

          La hatene hirus, laran di’ak nafatin.

          Na’i di’ak ba ema hotu,

          Hanoin Nia criatura tomak. Refrão

 

  • Na’i, ema sira fó agradece ba Ita,

          Ita emar sira hahi Ita.

          Sira haklaken glória Itaboot reino nian,

          Hodi tatoli ba malu buat foun Ita halo. Refrão

 

  • Atu fó hatene ba ema tomak Ita biit,

          No Ita reino nia kmanek ua’in;

          Ita Nia reino, reino ida rohan laek,

          Ita ukun to’o derasaan hot-hotu. Refrão

 

  • Na’i halo tuir duni Nia futar lia,

          La kuran buat ida iha buat hotu be Nia halo.

          Nia tahan  ema sira be atu monu,

          Nia tulun ema sira be ema hanehan. Refrão

 

Aclamação                                                                                                                                                                                                                      Lc. 7. 16

Reftrão : Aleluia, Aleluia!! Repete-se

                    Profeta boot ida mosu tiha iha ita leet;

                    Maromak mai haré tiha nia povo. Reftrão

 

Evangelho                                                                                                                                                                                                                Lc. 4. 31-37

Na’i Jesus Cristo nia Evangelho nu’udar São Lucas haktuir:

Iha tempo neba, Jesus tun ba Cafernaum, cidade ida Galileia nian. Nia hanourin sira iha loron sábado. Ema sira hakfodak ho nia doutrina, basá Nia ko’alia ho biit.

Iha sinagoga laran, ema ida ho espírito fo’er hakilar ho lia maka’as dehan: “Iha sáida iha ami no Ó, Jesus Nazaré? Ó mai atu halo áat ami? Ha’u hatene Ó se lós: Maromak nia santo!” Nia si’ak ema ne’e dehan: “Nonok no sai tiha housi nia!” Soe tiha ema ne’e ba rai iha sira hotu nia oin, diabo sai housi nia, la halo áat ida ba nia. Sira hotu hakfodak no ta’uk, hodi hateten ba malu: “Liafuan ne’e sá lós? Ho biit no ukun, Nia haruka espírito fo’er sira sai, no sira sai duni!” Jesus nia naran boot habelar iha fatin hot-hotu iha rai neba.

Lia Maksoyn.

Leave a Reply

Your email address will not be published. Required fields are marked *