shadow
Diocese de Dili > NOTÍCIAS > LETURA DIÁRIA > Quarta-Feira, XXII Semana Tempo Comun (Ano B)

Quarta-Feira, XXII Semana Tempo Comun (Ano B)

Primeira Leitura                          1Cor. 3. 1-9

Lia housi São Paulo nia primeira Surat ba sarani sira iha Corinto

Maun alin sira, ha’u la bele ko’alia ho imi nu’udar ema nebe espiritual ona, maibe nu’udar ema isin nian, nu’udar labarik kiik iha Cristo. Ha’u fó tiha susuben ba imi, la’os aihan tós, basá imi seidauk hadi’a an ba nia. Tebes duni, oras ne’e mós imi seidauk bele han nia, basá imi sei ema isin nian. Basá uanhira sei iha laran moras no buka oin iha imi leet, imi la’os ema isin nian, hodi moris hanesan ema bai-bain? Uanhira ema ida dehan, “Ha’u Paulo nian,” no ema seluk “Ha’u Apolo nian,” imi la’os ema bai-bain de’it?

Apolo ne’e se no Paulo ne’e se? Atan sira nebe tan sira imi hahu fiar, nu’udar Na’i foti ida-idak. Ha’u kuda, Apolo rega, maibe Maromak mak halo moris. Ne’e duni, ida nebe kuda eh ida nebe rega la folin ida; Maromak de’it mak halo moris. Ida nebe kuda no ida nebe rega hanesan de’it, no ida-idak sei simu nia kolen tuir nia serbisu. Basá ami maluk nu’udar Maromak nia serbisu na’in, imi Maromak nia to’os, Maromak nia uma andar.

Maromak Futar Lia.

 

Salmo Responsorial                                                                                                                                           Sal. 32(33). 12-13, 14-15, 20-21 (R.12b)

Refrão : Ksolok ba povo nebe Na’i hili nu’udar Nia lima-rohan!!! Repete-se

 

  • Rahun di’ak ba povo nebe hili Na’i ba nia Maromak,

          Povo be Nia hili nu’udar Nia lima-rohan.

          Housi áas Lalehan Na’i hanoin,

          No haré ema hot-hotu. Refrão

 

  • Housi nia hôrik fatin,

          Nia hanoin ema hot-hotu iha rai;

          Nia mak halo ema ida-idak nia fuan,

          Nia tau matan ba sira nia serbisu. Refrão

 

  • Ita klamar hein iha Maromak,

          Nia mak ita biit no ita mahein;

          Iha Nia, ita fuan haksolok,

          Ita tau laran metin iha Nia naran santo. Refrão

 

Aclamação                                                                                                                                                                                                                      Lc. 7. 16

Reftrão : Aleluia, Aleluia!! Repete-se

                    Na’i Nia Espírito hôrik iha Ha’u. Nia haruka Ha’u haklaken

                    Lia-foun ba kiak sira no fó liberdade ba dadur sira. Reftrão

 

Evangelho                                                                                                                                                                                                               Lc. 4. 38-44

Na’i Jesus Cristo nia Evangelho nu’udar São Lucas haktuir:

Iha tempo neba, husik tiha sinagoga, Jesus ba Simão nia uma. Simão nia banin feto moras boot, isin manas. Sira husu Jesus atu tulun nia. Hakru’uk tiha ba nia, Jesus duni sai isin manas, nebe sai kedas housi nia. Hafoin nia hamriik hodi serbi sira.

Uanhira loron atu monu ona, sira hotu nebe iha ema ho moras oi-oin lori sira ba Jesus. Nia tula liman ba sira ida-idak, hodi fó isin di’ak ba sira. Diabu sira sai housi ema barak, hodi hakilar dehan: ”Ó Maromak nia Oan Mane!”  Maibe Nia haruka hodi la husik sira ko’alia, basá sira hatene katak Nia mak Cristo. Iha dadersan, Nia sai hodi la’o ba fatin fuik ida. Ema lubun boot buka Nia. Hetan tiha Nia, sira hakarak katak Nia la bele husik sira. Maibe Nia dehan ba sira: “Ha’u sei haklaken mós liafoun di’ak  Maromak nia reino nian ba rai selu-seluk; tan ne’e mak Ha’u mai.” Ne’e duni, Nia la’o ba oin hodi hanourin iha sinagoga sira rai Judeia nian.

Lia Maksoyn.

Leave a Reply

Your email address will not be published. Required fields are marked *