shadow
Diocese de Dili > NOTÍCIAS > LETURA DIÁRIA > Quinta-Feira, XXII Semana Tempo Comun (Ano B)

Quinta-Feira, XXII Semana Tempo Comun (Ano B)

Primeira Leitura                1Cor. 3. 18-23

Lia housi São Paulo nia primeira Surat ba sarani sira iha Corinto

Maun alin sira: Keta bosok imi an. Imi ruma hanoin karik katak nia matenek tuir mundo nia hanoin, ema ne’e buka atu sai beik atu sai matenek. Basá matenek mundo ne’e nian hanesan buat beik iha Maromak futar oin; basá hakerek nanis ona: “Nia toman ema matenek sira iha sira nia lia bobar,” no tan: “Na’i hatene katak ema matenek sira nia hanoin la folin buat ida.” Ne’e duni, imi keta gaba an koba ba ema, basá buat hotu imi nian: Paulo ka Apolo ka Pedro, ka mundo ka moris ka mate, ohin loron ka aban bainrua: buat hotu imi nian, no imi Cristo nian, no Cristo Maromak nian.

Maromak Futar Lia.

 

Salmo Responsorial                                                                                                                                                            Sal. 23(24). 1-2, 3-4ab, 5-6 (R. 1)

Refrão : Rai no buat hotu be iha rai, Maromak nian!!! Repete-se

             

  • Rai no buat hotu nebe iha nia, Na’i Nian;

          Mundo no buat tomak hôrik iha nia.

          Maromak hatur rai iha tasi leten,

          Hametin rai iha laloran leten. Refrão

 

  • Sé mak bele sa’e ba Maromak Nia foho,

          Sé mak bele hôrik iha Nia kadunan santo?

          Ema nebe laran mós no liman la sala,

          Ema nebe la jura falso, la bosok. Refrão

 

  • Ema ne’e sei simu Na’i Nia bensa,

          Nia sei hetan kolen housi Maromak, nia Maksoi.

          Ema otas ne’e mak buka Na’i,

          Be buka Jacob nia Maromak Nia futar oin. Refrão

                                                                 

Aclamação                                                                                                                                                                                                                     Mt. 4. 19

Reftrão : Aleluia, Aleluia!! Repete-se

                    Imi tuir Ha’u mai; Na’i lia tun,

                    Ha’u sei halo imi sai hakail na’in ema nian. Reftrão

 

Evangelho                                                                                                                                                                                                               Lc. 4. 38-44

Na’i Jesus Cristo nia Evangelho nu’udar São Lucas haktuir:

Iha tempo neba, ema lubun boot ida hale’u Jesus atu rona Maromak Nia liafuan. Nia hamriik iha tasi Genesaré nia ibun. Nia haré ro rua kesi hela iha tasi ibun. Husik tiha ro, pescador sira fase hela dai. Sa’e tiha ba Simão nia ro, Jesus husu ba nia atu hadook ro uitoan housi tasi ibun. Hafoin, Nia tur tiha iha ro laran, hodi hanourin ema sira.

Ko’alia hotu tiha, Nia dehan ba Simão: “Tama liu ba tasi laran no soe dai ba!” Simão hatan, “Mestre, ami serbisu tiha kalan tomak, la káer buat ida. Maibe, tan Ita mak dehan, ha’u sei soe duni dai.” Uanhira sira halo nune’e, sira káer ikan barak teb-tebes, dai besik atu nakles. Sira leok liman hodi bolu maluk sira iha ro seluk atu mai tulun sira. Sira mai duni, hodi halo ro rua nakonu didi’ak besik atu mouut.

Haré tiha ne’e, Simão Pedro monu ain ba Jesus, hodi dehan: “Na’i hadook An housi ha’u, tan ha’u ema maksalak ida!” Tebes duni, nia ho nia maluk sira seluk hakfodak tanba ikan barak nebe sira káer. Simão nia maluk sira, katak João no Tiago, Zebedeu nia oan sira, mós hakfodak. Jesus dehan ba Simão: “Keta ta’uk; houri ohin ba oin ó sei káer ema.” Dada tiha ro ba tasi ibun, sira husik buat hotu hodi la’o tuir Jesus.

Lia Maksoyn.

Leave a Reply

Your email address will not be published. Required fields are marked *