shadow
Diocese de Dili > NOTÍCIAS > LETURA DIÁRIA > Sábado, XXII Semana Tempo Comum (ANO B)

Sábado, XXII Semana Tempo Comum (ANO B)

Primeira Leitura                   1Cor.  4.  6b-15

Lia housi São Paulo nia primeira  Surat ba sarani sira iha Corinto

Maun alin sira: “Ha’u dehan mós sira ne’e ba ha’u nia an no ba Apolo ba imi nia di’ak, atu imi bele hanourin an  housi ami atu la bele ba liu fali buat nebe hakerek nanis, atu la iha ema ida housi imi leet nebe sei nakonu ho laran loko an kona ba ema ida liu fali ema seluk. Se mak fó kmanek liu ba imi? Imi iha buat sáida nebe imi la simu uluk? Maibe imi simu tiha karik, tansá imi loko an hanesan imi la simu nia? Imi haksolok ona; imi sai riku ona; imi sai tiha liurai maski ami la iha! Tebes, ha’u hakarak katak imi sai liurai, atu ami mós bele ukun hamutuk ho imi.

Basá nu’udar ha’u haré, Maromak hatudu ami apóstolo sira nu’udar ikus liu ema  hot-hotu, hanesan ema nebe atu saran ona ba mate, basá ami sai tiha hanesan buat áat ida nebe mundo, anjo no ema sira hotu bele haré. Ami bulak tanba Cristo, maibe imi matenek iha Cristo; ami biit laek, maibe imi maka’as; ema haré di’ak imi, maibe ema haré áat ami. To’o oras ne’e kedas ami hamlaha no hamrook, hatais uitoan de’it no ema trata áat ami, ami la’o  ba la’o mai hanesan ema nebe uma la iha. No ami serbisu ho ami nia liman rasik. Uanhira ema hasara ami, ami hateten di’ak ba sira; uanhira ema fó terus, ami tahan de’it; uanhira ema konta ami nia vida, ami hatan ho laran maus. Ami sai tiha hanesan buat fo’er mundo ne’e nian, ema hotu nia fo’er to’o oras ne’e.

Ha’u hakerek ida ne’e ba imi la’os atu hamoe imi, maibe atu hanourin imi nu’udar ha’u nia oan doben sira. Basá maski imi iha matadalan barak ba Cristo, imi nia aman la barak, basá ha’u sai tiha imi nia aman iha Cristo Jesus housi Evangelho.

Maromak Futar Lia.

 

Salmo Responsorial                                                                                                                                            Sal. 144(145). 17-18, 19-20, 21 (R. 18ª)

Refrão : Na’i Maromak besik ba sira be harohan!!! Repete-se

 

  • Na’i Nia hanoin lós tebes,

          Laran di’ak ba sasan tomak Nia halo;

          Besik ba sira nebe harohan,

          Ba sira nebe harohan tebes. Refrão

 

  • Ba sira be hamta’uk, Nia haraik sira nia hakaran,

          Rona sira lian susar no soi sira.

          Na’i tau matan ba sira nebe hadomi Nia,

          Maibe, halakon ema áat sira. Refrão

 

  • Ha’u ibun sei hananu hodi hahi Na’i.

          Buat moris hotu haliban ba nafatin,

          Nia naran santo. Refrão

 

Aclamação                                                                                                                                                                                                                     Jo. 14. 6

Reftrão : Aleluia, Aleluia!! Repete-se

                    Ha’u ne’e dalan, lialós no moris hun, Na’i lia tun dehan;

                    ema ida la liu karik housi Ha’u, nia la bele ba Aman Maromak. Reftrão

             

Evangelho                                                                                                                                                                                                                     Lc. 6. 1-5

Na’i Jesus Cristo nia Evangelho nu’udar São Lucas haktuir:

Iha tempo neba,  iha sábado ida, uanhira Jesus la’o housi to’os batar nian, nia escolante sira hahu silu no dulas batar iha sira nia liman hodi han. Fariseu sira dehan: “Tansa imi halo buat nebe bandu iha loron sábado?” Jesus hatan ba sira: “Imi la lê buat nebe David halo uanhira nia ho nia maluk sira hamlaha, katak nia tama iha Maromak nia Uma, hola pão sacrifício nian hodi han no fahe ba sira, pão nebe na’ilulik sira de’it mak bele han?” Nia dehan tan ba sira: “Oan Mane mak sábado nia Na’i.”

Lia Maksoyn.

Leave a Reply

Your email address will not be published. Required fields are marked *