shadow
Diocese de Dili > NOTÍCIAS > LETURA DIÁRIA > Segunda-Feira, XXIII Semana Tempo Comum (ANO B)

Segunda-Feira, XXIII Semana Tempo Comum (ANO B)

Primeira Leitura                     1Cor. 5. 1-8

Lia housi São Paulo nia primeira Surat ba sarani sira iha Corinto

Maun alin sira: Ema dehan katak iha sala fo’er iha imi leet, no sala fo’er nebe la hetan mós iha gentio sira leet; mane ida nebe moris hamutuk ho nia aman nia fen. No imi gaba an hodi foti an tan. Imi laran susar karik la’os di’ak liu? Imi tenki hadook ema nebe halo hahalok ne’e housi imi leet. Iha Na’i Jesus nia naran, ha’u rasik, maski la hela ho imi iha isin maibe hamutuk ho imi iha laran, tesi tiha lia ba ida nebe halo hahalok ne’e hanesan ha’u hela iha neba iha isin. Uanhira imi halibur an hamutuk no ha’u, ho neon, hela hamutuk ho imi ho Na’i Jesus nia biit, imi sei saran ema ne’e ba diabo atu halo áat nia isin, atu nia espírito bele hetan maksoin iha Na’i Jesus nia loron.

Imi nia gaba an ne’e la lós. Imi la hatene katak fermento uitoan de’it mak halo masa tomak sa’e? Ne’e duni, soe tiha fermento tuan, atu imi bele sai masa foun, basá imi pão nebe fermento la iha. Basá ema saran tiha ona ba mate Cristo, ita nia bibi oan Páscoa nian. Tan ne’e, ita sei halo festa la ho fermento tuan, katak fermento laran áat no hakarak áat nian, maibe ho pão nebe fermento la iha, katak, pão laran lós no lialos nian.

Maromak Futar Lia.

 

Salmo Responsorial                                                                                                                                                                        Sal. 5. 5-6ª, 7, 12 (R. 9ª)

Refrão : Na’i, lori ha’u tuir Ita justiça!!! Repete-se

 

  • Ita la’os Maromak ida be hadomi áat,

          Ema áat la hetan fatin iha Ita;

          Nia sei la hela metin iha Ita futar oin,

          Basá, Ita hakribi sala. Refrão

 

  • Ita hirus ema áat sira,

          Ita hamohu sira be fiar iha bosok;

          Ema falso no ema áat,

          Na’i hakribi. Refrão

 

  • Na’i, sira be laran metin iha Ita,

          Haksolok ho hananu nafatin.

          Ita tulun sira no haraik ksolok

          Ba sira be hadomi Ita naran. Refrão

 

Aclamação                                                                                                                                                                                                                   Jo. 10. 27

Reftrão : Aleluia, Aleluia!! Repete-se

                    Ha’u Nia bibi sira rona Ha’u lian, Na’i lia tun;

                    Ha’u hatene sira, sira mai tuir Ha’u. Reftrão

 

Evangelho                                                                                                                                                                                                                   Lc. 6. 6-11

Na’i Jesus Cristo nia Evangelho nu’udar São Lucas haktuir:

Iha tempo neba, iha loron sábado ida Jesus tama iha sinagoga hodi hanourin. Iha neba iha ema ida ho liman lós mate. Escriba no fariseu sira hateke hela ba Nia atu haré Nia sei fó isin dia’k iha loron sábado ka lae, atu nune’e sira bele hetan lia ruma hasouru Nia. Maibe, tan hatene ona sira nia hanoin, Nia dehan ba ema liman lós mate ne’e: “Hamriik ba, mai iha klaran!” Nia mai hamriik duni. Tuir mai Jesus dehan ba sira: “Ha’u husu imi: iha loron sábado, bele halo halo di’ak eh halo áat, soi ema nia moris ka halo áat nia?” Hafoin, hateke hale’u ba sira hotu, Nia dehan ba ema ne’e: “Lolo ó nia liman ba!” Nia lolo duni, nia liman sai di’ak fali. Sira laran nakali, hodi ko’alia ba malu atu halo oin sá lós ho Jesus.

Lia Maksoyn.

Leave a Reply

Your email address will not be published. Required fields are marked *