shadow
Diocese de Dili > NOTÍCIAS > REFLEXÃO > LORI CRUZ TUIR JESUS DOMINGO COMUM XXIV/Ano B/2018 (Is 50,5-9a Tg 2,14-18 Mc 8,27-35)

LORI CRUZ TUIR JESUS DOMINGO COMUM XXIV/Ano B/2018 (Is 50,5-9a Tg 2,14-18 Mc 8,27-35)

Primeira Leitura                        Is. 50, 5-9ª

Lia Husi Livro profeta Isaías:

Na’i Maromak loke ha’u tilun; ha’u husik de’it, ha’u la hakiduk. Ha’u fo ha’u kotuk laran ba ema sira be hakanek ha’u; ha’u sée oin nafatin ba ema sira nebé fokit ha’u hasa-rahun, fo oin ba sira nebé tolok no tafui ha’u. Maibé, Na’i Maromak mai tulun duni ha’u, tan ne’e, mak ha’u la moe. Ha’u hato’os hela ha’u oin hanesan fatuk ida, basá, ha’u hatene katak ha’u sei la moe lerek. Ema ida nebé tahan netik ha’u, nia besik hela ha’u. sée lós mak bele barani hasouru ha’u? Nia hamrik to’ok, ami koko malu. Sée lós mak ha’u nia funu-baluk? Nia mosu mai tok ba! Na’i Maromak mak mai tulun ha’u. sée lós mak barani fo ha’u ba susar?

Maromak Futar Lia.

 

Salmo Resposorial                                                                                                                                                                        Sal. 114(115), 1-2. 3-4. 5-6

Refrão : Ha’u la’o nafatin Na’i Maromak futar oin

                 Iha rai ema moris sira nian!!! Repete-se

  •  Ha’u hadomi Maromak,

           Tan rona ha’u lia no ha’u bolu;

           Tan sée tilun mai ha’u,

           Iha loron nebé ha’u bolu. Refrão

 

  • Dadur metin, ha’u mate nia laran,

          Ha’u susar laran taridu,

          Ha’u temi Maromak nia naran

          Na’i mai tulun ha’u ata. Refrão

 

  • Na’i laran di’ak no mós,

          Ita na’in laran luak;

          Na’i Maromak tulun ema kiik

          Ha’u kole no ha’u susar, Nia fo tulun. Refrão

 

  • Nia soy ha’u klamar housi mate laran,

          Ha’u  matan, huis ha’u matan wén,

          Ha’u atu keta monu ba ko’ak.

          Ha’u la’o nafatin Na’i Maromak futar oin,

          Iha rai ema moris sira nian. Refrão

 

Segunda Leitura                                                                                                                                                                                                    Tg.2, 14-18

Lia husi São Tiago nia surat:

Maun alin sira: Manán sá lós, ema nebé dehan katak nia fiar, maibé la moris tuir nia fiar? Fiar ida hanesan ne’e, oin sá bele soy nia? Maun alin eh féton-náan ruma, la iha karik hena eh kuran ai-han loron-loron nian, imi ruma bele dehan ba nia:” Imi ba ona. Taka isin halo didi’ak, han buat nebé imi hakarak. Imi la fo karik buat nebé nia kuran, imi nia lia-fuan sira folin sá lós? Ne’e duni, fiar tanan de’it, hahalok la’ek, fiar ne’e, fiar maten ida. Ema ruma bele dehan: “ Ó iha fiar, ha’u iha hahalok. Ó hatudu mai ha’u, ó nia fiar hahalok la’ek; ha’u fali, hodi ha’u nia hahalok, ha’u hatudu ha’u nia fiar ba ó.”

Maromak Futar Lia.

 

Aclamação                                                                                                                                                                                                                   Gal. 6, 14

Refrão : Aleluia, Aleluia!! Repete-se

                  Ha’u folin hodi Na’i nia Cruz;

                  Hodi Nia manán mundo. Refrão

 

Evangelho                                                                                                                                                                                                              Mc. 8, 27-35

Na’i Jesus Cristo nia Evangelho Nu’udar São Marcos haktuir:

Iha tempo nebá, Jesus ho nia escolante sira la’o ba knua-knua Cesareia, Filipe nian. Tuir dalan, Jesus husu ba nia Escolante sira: “Ema sira dehan katak Ha’u sée?” Escolante sira dehan: “João Baptista; balun dehan Elias, seluk dehan fali katak ita ema Duína ida.” Jesus husu ba sira:”Be imi dehan ha’u sée?” Pedro simu kedas hodi dehan:”Ita boot mak Messias.” Jesus bandu sira, atu la bele hateten sai ba ema ida. Tuir mai Jesus hanourin sira katak Mane Maksoyn sei terus barak, katak, ema katuas sira, sacerdote ulun sira no escriba sira, sei hakribit Nia, sei oho Nia. Maibé, liu loron tolu, Nia sei moris hias. Jesus fo hatene sai ida ne’e momós kedas ba sira. Pedro ba do’ok tiha witoan ho Jesus, hahu haksi’ak Jesus. Maibé, Jesus fila kotuk, haré nia escolante sira, Nia haksi’ak Pedro, hodi dehan:” Satanás, dook tiha housi Ha’u nia oin! Basá, ó la buka Maromak nia hakarak, maibé, ó buka de’it ema nia hakarak!” Hafoin, Jesus bolu fali ema lubun ho Nia escolante sira, hodi dehan ba sira:” Ema ruma hakarak karik tuir Ha’u, sei hakribit nia sala rasik, sei simu nia cruz hodi la’o tuir Ha’u. Basá, ema nebé hakarak soy nia moris, nia sei lakon moris ne’e. Maibé, ema nebé lakon Nia moris, tamba Ha’u, no tamba lia foun di’ak, ida ne’e sei soy duni nia moris.”

Lia Maksoyn.

 

Reflexão :

LORI CRUZ TUIR JESUS

 

          Manán sá lós, ema nebé dehan katak nia fiar, maibé la moris tuir nia fiar? Basá, ó la buka Maromak nia hakarak, maibé, ó buka de’it ema nia hakarak! ema nebé lakon Nia moris, tamba Ha’u, no tamba lia foun di’ak, ida ne’e sei soy duni nia moris. Se ita hare liu deit, leitura tolu (Primeira-Segunda Leitura & Evangelho) Domingo semana nee (Domingo Comum XXIV-Ano B), hamosu impressão (kesan) negativa no tristeza. Basá, iha Primeira leitura, profeta Isaías hakerek:”Ha’u fo ha’u kotuk laran ba ema sira be hakanek ha’u; ha’u sée oin nafatin ba ema sira nebé fokit ha’u hasa-rahun, fo oin ba sira nebé tolok no tafui ha’u. Maibé, Na’i Maromak mai tulun duni ha’u, tan ne’e, mak ha’u la moe”. Tuir fali, Tiago Apóstolo iha ninia carta hakerek:” Ne’e duni, fiar tanan de’it, hahalok la’ek, fiar ne’e, fiar maten ida”. Ikus liu, Evangelho, São Marcos relata:” Ema ruma hakarak karik tuir Ha’u, sei hakribit nia sala rasik, sei simu nia cruz hodi la’o tuir Ha’u”. Haré tiha nota prévia husi leitura tolu nee, liu-liu Evangelho, ita halo resumo badak ida hodi tenik katak; ita compreende didiak katak: critério atu tuir Jesus nebe aparentemente negativa nee, tuir lolos nudar critério absoluto hodi tuir Jesus hodi hatudu moris sarani nebe autêntico no optimismo.

          Iha citação (kutipan) Evangelho nebe apresenta iha leten, antes nee evangelista Marcos mos haktuir katak; Jesus mos duni sai diabo, cura ema monok no diuk, fo han ema rihun hat. Wainhira Jesus nia escolante sira assite tiha lalaok milagrosa hirak nee, ikus mai Jesus husu ba sira:”Be imi dehan Ha’u sée?//Menurut kamu, siapakah Aku ini?//Quem vocês dizem que eu sou?”.

          Afinal liu husi relato Evangelho, ita descobre katak; escolante sira nebe sempre horik hamutuk ho Jesus mos fo resposta diferente acerca Jesus nia personalidade relaciona ho pergunta:”Be imi dehan Ha’u sée?”. Pedro ikus mai representa sira seluk hatan ba Jesus tenik:” Ita boot mak Messias”. Jesus bandu kedas sira hodi konta tutan assunto nee ba ema seluk basá, situação socio-política no conceito kona ba Messias entre ema judeu iha altura neba la hanesan. Cada grupo define figura Messias tuir ida-idak nia interece. Iha balu hanoin katak; Messias nebe atu mai, mosi mai ho figura liurai ho kbiit makás, balu dehan Messias mai hanesan profeta ida, seluk fali dehan Messias mai hanesan libertador ida hodi haré situação política. Em contra partida, Jesus justifica katak Nia mak Oan Mane nebe sei simu terus too mate maibé, sei simu hikas glória moris hias nian.

          Jesus nia lia bandu nee tuir lolos atu hanorin no bolu atenção ba escolante sira hodi prepara-an didiak no aten brani hodi simu mos terus (sacrifício) ho laran kmaan maske consequência disponibilidade nee todan. Jesus motiva eh sunu ita nia aten brani hodi barani simu terus ba ksolok loron ikus nian. Maibé, Jesus nia escolante sira (inclui mos ita sarani ohin loron nian), mesak ema simples, la dun hatene buat barak kona ba vizaun sira iha Antigo Testamento nian relaciona ho Messias nudar hakerek iha livro profeta Isaías nian. Escolante sira mos barak inclui mos ita sarani ohin loron nebe seidauk compreende kona ba moris hias. Pior liu tan  ita sira ohin loron sei dúvida ho moris hias.

          Durante tinan tolu nia laran, sira rona ona Jesus nia hanorin sira, sai sasin ba milagre sira be Jesus halo, maibé, afinal sira seidauk bele compreende didiak saida mak Jesus hatete no halo. Jesus hatete fila-fila ba sira katak Nia sei sei terus too mate (Cf Mc 9,9-10; 10, 32-34). Até Jesus nia mate iha Cruz tutun, sira hotu halai lakon, único João deit mak la halai.

          Los duni, difícil tebes ba ita ema hodi muda-an iha buat hotu-hotu. Susar mos ba ita hodi soe dook ita nia conceito no convicção (keyakinan) kona ba saida no se mak Messias nee. Dala barak ita temi Jesus mak Messias, Jesus mak Maromak, Jesus mak salvador. Pergunta mak nee, lia temi hirak nee tanba ita compreende duni ka keta ita temi tanba ema barak mos temi lia nee loro-loron? Ita nia conceito la hanesan, até contradis ho Bíblia Sagrada tanba motivo eh interece la hanesan. Hanesan mos sociedade ohin loron, considera ukun nain sira (governante) tuir ita nia gosto, tuir cor partido, tuir cor grupo. Tanba nee mak ita nia compreensão kona ba Messias mos tuir deit ita nia vontade até que contradis ho Bíblia Sagrada.  

          Até nação boot no desenvolvido sira mos ohin loron hasoru dificuldade kona ba fiar. Pior liu tan, ema hobur liu mak artista sira nia imagem, pintura ka fotografia maibé, sira alergia wainhira haré imagem ka estátua Jesus Cristo, Nain Feto ho Santo sira, inclui Papa nia imagem. Balu até que dehan Jesus nia doutrina la relevante ona ho mea ohin loron nia moris. Maibé keta haluha Jesus nia lia nebe tenik: Se mak la reconhece Hau, Hau mos sei la reconhece nia iha Aman Maromak nia futar oin. Iha fatin barak. Liu-liu nação sira nebe população maioria Cristão, hahu moris sabraut hodi legaliza ona casamento feto ho feto, mane ho mane, legaliza aborto, legaliza droga nst.

          Oinsa ita Católico Timor Leste nia compreensão kona ba Messias? Tuir los progresso tecnologia-informatica ohin loron, facilita ita compreende diak liu tan Messias ba ita nia moris sarani nian. Ita simu no fiar diak liu tan Jesus nebe mate no moris hias tiha ona. Maske nunee, qualidade ita nia fiar nudar Cristão Católico quase que pior liu fali ema sira tempo uluk nian. Progresso nebe tuir los halo ita nia fiar abut metin liu tan mak, halo ita hakiduk demais fali ba kotuk. Hakat passo ida ba oin maibé, sempre hakiduk passo rua ba kotuk.

          Nee tan deit ita nia compreensão ba Messias tuir ritmo mundo nian hanesan; política, social, economia, segurança. Ita haré Cristo nia kmanek liu husi construção Igreja nebe luxo, capela nebe furak, uma laku nebe tradicional. Hirak nee hotu aspecto físico deit, basá, aspecto espiritual eh moris diak klamar nian mak sai sasukat lolos ba qualidade sarani ohin loron. Tanba nee mak São Tiago hakerek iha Segunda Leitura katak; Fiar nebe la hatudu iha hahalok, fiar nee mamuk.

          Jesus sunu ita nia fiar hodi hanorin katak;”Ema ruma hakarak karik tuir Ha’u, sei hakribit nia sala rasik, sei simu nia cruz hodi la’o tuir Ha’u”. Ita nia Cruz lolos nebe ita precisa lori hodi tuir Jesus mak, ita nia vontade livre hodi husik ita nia compreensão kloot kona ba figura Messias. Precisa deit ita sacrifica-an hodi confessa katak; Jesus mak Messias Maromak Oan, nudar Pedro declara iha relato Evangelho. Jesus hatudu dalan terus atu ita mos hatene simu terus molok hetan diak. Ohin loron sarani balu moris diak la tuir dalan nebe los, funcionário blau riku derepente liu husi corrupção, negociante balu manipula folin hodi hasae rendimentu. Oinsa ita bele hatudu hahalok sarani se ita nebe Catolico mak comete uluk hahalok hirak nebe Jesus nudar Messias bandu? Oinsa ita bele lori rasik ita nia Cruz se hahalok kiik hirak nee ita la consegue hadook. Wainhira ita ita brani sacrifica buat kiik, buat nebe boot ita sei hetan. Cruz (sacrifício) mak dalan salvação-Jesus Cristo mak Messias. ema nebé lakon Nia moris, tamba Ha’u, no tamba lia foun di’ak, ida ne’e sei soy duni nia moris.  Assim Seja (ignas) 

Leave a Reply

Your email address will not be published. Required fields are marked *