shadow
Diocese de Dili > NOTÍCIAS > LETURA DIÁRIA > Segunda-Feira, XXIV Semana Tempo Comum (ANO B)

Segunda-Feira, XXIV Semana Tempo Comum (ANO B)

Primeira Leitura         1Cor. 11. 17-26, 33

Lia housi São Paulo nia primeira Surat ba sarani sira iha Corinto:

Maun alin sira. Wainhira ha’u hateten lia menon ne’e, ha’u la hahi katak imi nia halibur malu halo áat liu fali di’ak. Uluk knana’in, ha’u rona katak wainhira imi halibur malu nu’udar kreda iha haketak malu iha imi leet, no ha’u fiar uitoan buat ne’e. Imi tenki haketak malu iha imi leet atu ema bele hatene sira nebé di’ak. Ne’e duni, wainhira imi halibur malu iha fatin ida, laos atu han Na’i nia han kalan nian, basá wainhira imi han, ema ida-idak ba oin ho nia aihan rasik, no ema ida hamlaha wainhira ema seluk hemu to’o lanu. Imi la iha uma iha nebé imi bele han no hemu? Ka imi hatudu imi nia laran áat ba Maromak nia Kreda hodi hamoe sira nebé aihan la iha? Ha’u sei dehan sáida ba imi? Ha’u sei hahi imi? Iha buat ida ne’e ha’u la bele hahi imi.

Basá ha’u simu housi Na’i buat nebé ha’u mós saran ba imi, katak Na’i Jesus, iha kalan nebé ema saran Nia, káer pão, no fó tiha agradece, Nia silu pão hodi dehan: “Ne’e Ha’u nia isin nebé saran ba imi. Halo ida ne’e hodi hanoin Ha’u.” Nune’e mós, wainhira han kalan hotu tiha Nia káer cálice hodi dehan: “Cálice ne’e mak aliança foun iha Ha’u nia ran. Halo ida ne’e, wainhira imi hemu nia, hodi hanoin Ha’u.” Basá wainhira imi han pão ida ne’e no hemu cálice ida ne’e, imi haklaken Na’i nia mate to’o wainhira Nia hi’it-An mai.

Ne’e duni, maun alin sira, wainhira imi halibur malu atu han, hein malu lai.

Maromak Futar Lia.

 

Salmo Responsorial                                                                                                                           Sal. 39(40). 7-8ª, 8b-9, 10, 17 (R. 1Cor. 11. 26b)

Refrão : Imi haklaken Na’i Nia mate, to’o Nia fila hikas mai!!! Repete-se

  • Ita boot lakohi sacrifício no buat-karan,

          Maibé loke ha’u tilun.

          Ita la husu buat-karan eh na’an maten,

          Tan ne’e ha’u dehan: “Ha’u mak ne’e!” Refrão

 

  • Iha livro Lei, hakerek nanis ona,

          Sáida ha’u atu halo tuir.

          Ida ne’e mak ha’u hakarak, ha’u Maromak,

          Ita ukunfuan hela iha ha’u fuan laran. Refrão

 

  • Ha’u sei haklaken Ita justiça,

          Ba ema lubun boot.

          Na’i, Ita hatene katak

          Ha’u la taka ha’u ibun. Refrão

           

  • Haksolok boot iha Ita,

          Sira hotu nebé buka Ita.

          Dehan ba nafatin, “Na’i mak Boot liu tomak”,

          Sira be hakarak Ita Maksoyn. Refrão

 

Aclamação                                                                                                                                                                                                                      Jo. 3. 16

Refrão : Aleluia, Aleluia!! Repete-se

                  Maromak hadomi tebes mundo, Nia fó Nia Oan-Mane-Mesak ba nia.

                  Ema hotu nebé fiar Nia, hetan moris rohan laek. Refrão

 

Evangelho                                                                                                                                                                                                                   Lc. 7. 1-10

Na’i Jesus Cristo nia Evangelho    Nu’udar São Lucas haktuir:

Iha tempo neba, Wainhira Jesus hato’o tiha liafuan hirak ne’e hotu ba povo sira nia tilun, Nia tama iha Cafarnaum. Centurião ida nia atan nebé hadomi teb-tebes moras todan, besik atu mate. Rona tiha kona ba Jesus, nia haruka katuas Judeu sira nian atu husu Nia mai fó isin di’ak ba nia atan ne’e. To’o tiha ba Jesus, sira husu namanas ba Nia dehan: “Nia so’i atu Ita haraik buat ne’e ba nia, basá nia hadomi ita nia povo; nia rasik hari ami nia sinagoga.” Jesus ba hamutuk ho sira. Wainhira sira besik ona uma, centurião haruka nia belun sira atu hateten ba Nia: “Na’i, keta hakole an, basá ha’u la soi atu Ita tama iha ha’u nia uma. Tan ne’e mak ha’u la barani atu mai hasouru Ita. Dehan de’it liafuan ida, no ha’u atan sei hetan fali isin di’ak. Basá ha’u, nebé halo tuir ema boot liu, iha mós soldado sira nebé halo tuir ha’u.

Ha’u dehan ba ida: ‘Ba’, nia ba; ba ida seluk: ‘Mai’, nia mai; ba ha’u nia atan: ‘Halo ne’e’, nia halo.” Rona tiha liafuan hirak ne’e, Jesus hakfodak, hodi fila oin ba ema lubun boot nebé tuir Nia dehan: “Tebes, Ha’u dehan ba imi katak iha Israel mós ha’u la hetan fiar hanesan ne’e.”

Wainhira manuain sira to’o uma, sira hetan atan isin di’ak fali ona.

Lia Maksoyn.

Leave a Reply

Your email address will not be published. Required fields are marked *