shadow
Diocese de Dili > NOTÍCIAS > LETURA DIÁRIA > Terça-Feira, XXIV Semana Tempo Comum (ANO B)

Terça-Feira, XXIV Semana Tempo Comum (ANO B)

Primeira Leitura     1Cor. 12. 12-14, 27-31ª

Lia housi São Paulo nia primeira Surat ba sarani sira iha Corinto.

Maun alin sira: hanesan isin lolon ida de’it, maibé liman ain barak, no liman ain ida-idak, maski barak halo isin lolon ida de’it, nune’e mós Cristo. Basá iha Espírito ida de’it ita hotu simu baptismo ba isin lolonn ida de’it, biar ema judeu ka ema gregu, atan ka la atan, no ita hotu bele hemu housi Espírito ida de’it. Basá, isin lolon la’os liman ain ida de’it, maibé barak.

Imi Cristo nia isin lolon, no imi ida-idak Cristo nia liman ain. Maromak tau ema iha Kreda atu sai, uluk knanain apóstolo sira, hafoin profeta sira, tuir mai mestre sira; ikus mai, sira nebé iha kbiit atu halo hahalok kmanek sira; tuir fali mak sira nebé iha kbiit atu fó isin di’ak ba moras, sira nebé atu fó tulun, sira nebé atu ukun, sira nebé atu ko’alia oi-oin. Sira ne’e hotu apóstolo? Sira ne’e hotu profeta? Sira hotu mestre? Sira hotu halo milagre? Sira hotu iha kbiit atu fó isin di’ak ba ema moras? Sira hotu ko’alia oi-oin? Sira hotu bele hatene lia oi-oin ne’e katak sá? Buka man-manas kmanek Espírito nian nebé boot liu.

Maromak Futar Lia.

 

Salmo Responsorial                                                                                                                                                          Sal. 99(100). 2, 3, 4, 5 (R. cf. 3c)

Refrão : Ita, povo Maromak nian, bibi sira Nia luhan nian!!! Repete-se

  • Rai tomak hahi Na’i ba,

          Serbí Na’i ho ksolok,

          Mai to’o Nia ho knananuk ksolok nian. Refrão

 

  • Hatene ba katak Na’i mak Maromak!

          Nia hakiak ita, ita Ninian.

          Ita, Nia povo, bibi sira Nia luhan nian. Refrão

 

  • Tama housi odamatan hodi agradece,

          Tama ba Nia kadunan ho knananuk hahi nian.

          Haliban Nia, hana’i Nia naran. Refrão

 

  • Tanba Na’i di’ak tebes!

          Nia laran-luak rohan laek;

          Nia fidelidade sei to’o bei-oan sira hotu. Refrão

 

Aclamação                                                                                                                                                                                                                      Lc. 7. 16

Refrão : Aleluia, Aleluia!! Repete-se

                  Profeta boot ida mosu tiha iha ita nia leet;

                  Maromak mai hare tiha Nia povo. Refrão

 

Evangelho                                                                                                                                                                                                               Lc. 7. 11-17

Na’i Jesus Cristo nia Evangelho nu’udar São Lucas haktuir:

Iha tempo neba, Jesus ba cidade ida naran Naim. Nia escolante sira no ema lubun boot tuir Nia. Wainhira Nia besik ona cidade nia odamatan, ema lori atu hakoi ema mate ida, feto faluk ida nia oan mane mesak. Ema barak housi cidade ba hamutuk ho feto ne’e. Haré tiha nia, Na’i hakbesik, hodi kona caixão. Sira nebé lori nia hamriik tiha. Hafoin nia dehan: “Klosan, Ha’u dehan ba ó, hamriik ba!” Ema mate ne’e tur no hahu ko’alia. Jesus saran nia ba nia inan. Ema hotu hakfodak hodi hahi Na’i Maromak dehan: “Profeta ida mosu tiha iha ita nia leet; Maromak mai hare tiha Nia povo!” Lia kona ba Nia naklekar ba Judeia tomak no ba rai hot-hotu besik neba.

Lia Maksoyn.

Leave a Reply

Your email address will not be published. Required fields are marked *