shadow
Diocese de Dili > NOTÍCIAS > LETURA DIÁRIA > Quinta-Feira, XXIV Semana Tempo Comum (ANO B)

Quinta-Feira, XXIV Semana Tempo Comum (ANO B)

Primeira Leitura                    1Cor. 15.1-11

Lia housi São Paulo nia primeira Surat ba sarani sira iha Corinto.

Maun alin sira: Oras ne’e ha’u halo imi hanoin fali, maun alin sira, evangelho nebe ha’u haklaken tiha ba imi, nebe imi simu tiha ona no iha nebe imi hamriik metin. Housi nia imi hetan maksoin, imi laran metin karik ba liafuan nebe ha’u haklaken tiha ba imi, ka imi fiar leet de’it karik.

Basá ha’u saran ba imi nu’udar buat nebe folin boot liu buat hot-hotu nebe ha’u mós simu tiha: katak Cristo mate tan ita nia sala sira tuir Escritura; katak ema hakaoi Nia; katak liu tiha loron tolu, Nia moris hias tuir Escritura; katak Nia mosu ba Pedro, tuir mai ba sira sanulu resin rua. Ne’e hotu tiha, Nia mosu ba maun alin na’in atus lima resin ida tempo ida de’it, no sira ne’e barak sei moris daudaun, maski balun toba tiha. Tuir mai, Nia mosu ba Tiago, hafoin ba apóstolo sira hotu. Ikus mai, hanesan ba ema nebe moris mai iha tempo seidauk to’o, Nia mosu mai ha’u.

Basá iha apóstolo sira leet, ha’u mak kiik liu, la soi atu hanaran an apóstolo, basá ha’u fó terus ba Maromak nia Kreda. Maibe, tan Maromak nia graça, ha’u sai buat nebe ha’u daudaun, no Na’i nia graça iha ha’u laran. Ne’e duni, biar ha’u ka sira, nune’e ami haklaken no nune’e imi fiar.

Maromak Futar Lia.

 

Salmo Responsorial                                                                                                                                            Sal. 117(118). 1-2, 16ab-17, 28-29 (R. 1)

Refrão : Agradece ba Na’i, tan Nia di’ak, Basá Nia laran luak rohan laek.!!! Repete-se

  • Agradece ba Na’i, tan Nia di’ak tebes,

          Basá Nia domin rohan laek.

          Israel uma dehan ba:

          Nia domin rohan laek! Refrão

 

  • Nia futar liman halo buat foun,

          Na’i futar liman foti ha’u;

          Ha’u sei la mate maibe sei moris,

          Hodi haklaken buat hirak Na’i halo. Refrão

 

  • Ita mak ha’u Maromak, ha’u agradece Ita,

          Ita mak ha’u Maromak, ha’u hahi Ita.

          Fó agradece ba Na’i tan Nia di’ak,

          Basá Nia domin rohan laek. Refrão

 

Aclamação                                                                                                                                                                                                                   Mt. 11. 28

Refrão : Aleluia, Aleluia!! Repete-se

                  Imi sira hotu nebe kole no terus, mai buka Ha’u.

                  Ha’u sei kasu imi todan, Na’i dehan. Refrão

 

Evangelho                                                                                                                                                                                                                Lc. 7. 36-50

Na’i Jesus Cristo nia Evangelho nu’udar São Lucas haktuir:

Iha tempo neba, Fariseu ida convida Jesus atu han hamutuk ho nia. Tama tiha iha nia uma, Nia tur iha mesa. Tuir mai, feto áat ida housi cidade, uainhira nia hatene katak Jesus mai han iha fariseu nia uma, mai lori botil ida ho mina morin, hodi tur iha Jesus nia kotuk, nia hahu fase Nia ain ho mataben, hodi hamaran ho nia fuuk, rei no kose ho mina morin. Haré tiha buat ne’e, fariseu nebe convida Nia hateten ba nia an dehan: “Ema ne’e profeta ida karik, nia sei hatene feto se no sá lós mak kona Nia ne’e, basá nia feto áat ida.”

Jesus hatan, hodi dehan ba nia: “Simão, Ha’u hakarak hato’o buat ruma ba ita.” Nia dehan: “Ko’alia ba, Mestre.” “Ema ida impresta osan ba ema na’in rua: ida halo tusan osa mean atus lima, ida seluk lima nulu. Tanba sira na’in rua la bele selu fali, nia kasu tiha sira nia tusan. Ne’e duni, ida nebe mak sei hadomi nia liu tan?” Simão hatan dehan: Ha’u hanoin katak ida nebe nia kasu tusan boot liu.” No Jesus dehan: “Ita hanoin lós!” Hafoin Nia fila oin ba feto, hodi dehan ba Simão: “Ita haré feto ne’e? Ha’u tama iha ita nia uma, ita la fó be atu fase Ha’u nia ain; maibe nia fali habokon Ha’u nia ain ho nia mataben hodi hamaran ho nia fuuk. Ita la rei Ha’u, maibe hahu Ha’u tama mai, nia la para rei Ha’u nia ain. Ita la kose mina ba Ha’u nia ulun, maibe nia kose Ha’u nia ain ho mina morin. Tan ne’e, Ha’u dehan ba ita: nia sala barak kasu tiha ona, basá nia hadomi makaas liu. Ema nebe hetan perdua ba sala uitoan de’it, nia mós hadomi uitoan de’it.” Tuir mai, Nia dehan ba feto: “O nia sala sira kasu tiha ona.” Sira nebe tur hamutuk ho Nia iha mesa hahu hanoin: “Ema ne’e se lós atu kasu ema nia sala?” Nia dehan ba feto: “Ó nia fiar mak soi tiha ó; la’o ba iha dame laran.”

Lia Maksoyn.

Leave a Reply

Your email address will not be published. Required fields are marked *