shadow
Diocese de Dili > NOTÍCIAS > LETURA DIÁRIA > DOMINGO, XXV Tempo Comum (ANO B)

DOMINGO, XXV Tempo Comum (ANO B)

Primeira Leitura              Sab. 2, 12ª. 17-20

Lia Housi Livro Sabedoria:

Ema aat sira dehan: “Ita tau to’ok hany ba ema di’ak, basá, nia hasusar ita: nia la kohi tuir ita nia hahalok; nia haksi’ak ita, tan ita la halo tuir Ukun-fuan; nia dun salan mai ita, tan ita la halo tuir ita nia lisan. Nun’e, ita haré to’ok nia lia-fuan lós eh la lós; ita haré to’ok buat ba nia sei hetan iha oras atu mate. Basá, ema di’ak ne’e Maromak nia oan karik, Maromak sei haré nia, hodi hasai nia housi nia funu-balu sira liman. Ita sei koko to’ok nia, tolok nia, fo terus nia, atu hatene nia laran maus, atu sukat nia paciência. Ita sei lori nia ba mate aat, basá, nia hateten katak Maromak sei tulun nia.”

Maromak Futar Lia.

 

Salmo Responsorial                                                                                                                                                                          Sal. 55(56), 3. 4. 5. 6. 8

Refrão : Na’i simu ha’u moris!!! Repete-se

  • Na’i sadia ha’u hodi Ita boot naran.

          Tulun ha’u ho Ita boot kbiit. Refrão

 

  • Na’i rona ha’u oração;

          Simu ha’u nia harohan. Refrão

 

  • Ema loko an hamriik hasouru ha’u;

          Ema aat duni, fo terus ha’u. Refrão

 

  • Maibé Na’i ha’u Maksoyn,

          Nia tahan ha’u moris. Refrão

 

  • Ha’u hakarak hasa’e sacrificio ida ba Ita

          Hodi fo agradece ba Ita naran, basá, Ita di’ak. Refrão.

 

Segunda Leitura                                                                                                                                                                                                   Tg. 3, 164, 3

Lia husi São Tiago nia surat:

Maun-alin sira: Iha fatin nebé ema laran moras no hirus malu, iha fatin ne’e ema sei laran susar sei iha hahalok aat oin-oin. Maibé, matenek na’in tun mai housi leten, uluk liu, Nia sei mai ho laran mos; hafoin, Nia sei mai ho dame, ho laran di’ak, ho laran mamar no laran luak, sei mai ho tulun; Nia sei mai ho oin ida de’it ba ema tomak; Nia sei mai la ho laran makerek. Iha tempo hakmatek mak justiça sei mosu ba sira nebé buka dame malu. Funu mai housi nebé? Hirus malu mai houi nebé? Ne’e laós mai housi imi nia laran aat? Imi nia laran aat mak halo imi hatuda malu iha imi nia laran. Imi buka atu sai riku, maibé imi ki’ak nafatin. Tan ne’e mak imi oho malu. Imi laran moras malu, maibé, imi la manan buat ida. Imi haksesuk, imi funu malu. Imi kuran buat hotu, tan imi la husu. Imi husu, maibé la simu, tan imi husu la lós. Basá, imi husu de’it buat atu soran imi nia laran aat.

Maromak Futar Lia.

 

Aclamação                                                                                                                                                                                                                2 Tes. 2. 14

Refrão : Aleluia, Aleluia!! Repete-se

                 Hodi Evangelho Na’i Maromak bolu ita,

                  Atu hetan ita Na’in Jesus Cristo nia glória. Refrão

 

Evangelho                                                                                                                                                                                                              Mc. 9, 30-37

Na’i Jesus Cristo nia Evangelho Nu’udar São Marcos haktuir:

Iha tempo nebá, Jesus ho nia Escolante sira hakat liu ba Galileia sorin. Nia la kohi atu ema ruma hatene, basá, Nia hakarak hanourin nia Escolante sira. Nia lia tun ba sira dehan: “Ema sei saran Mane Maksoyn ba ema aat sira liman. Ema aat sira sei oho tiha Nia; maibé, Nia mate tiha, liu loron tolu Nia moris hías!” Jesus nia Escolante sira la hatene lia hirak ne’e katak sá, maibé, sira ta’uk hela atu husu Nia. To’o tiha Cafarnaum, tama tiha iha uma laran, Jesus husu ba sira: “Imi haksesuk malu kona ba sá ida, iha dalan?” Maibé, sira nonok tiha, basá, sira haksesuk kona ba sira ida nebé mak boot liu. Nune’e, Jesus tur tiha, bolu sira na’in sanulu resin rua hodi dehan ba sira: “Sê hakarak boot liu sira seluk, nia sei sai ikus liu hotu, sei sai hotu-hotu nia atan.” Jesus kaer tiha labarik-oan ida, tau tiha nia iha sira nia klaran, hako’ak tiha nia hodi dehan ba sira: “Ema nebé simu labarik-oan ida hanesan ida ne’e hodi Ha’u nia naran, nia simu Ha’u an rasik. Ema nebé simu Ha’u, nia la simu Ha’u, maibé, simu Ida nebé haruka Ha’u mai.”

Lia Maksoyn.

Leave a Reply

Your email address will not be published. Required fields are marked *