shadow
Diocese de Dili > NOTÍCIAS > REFLEXÃO > “IHA IMI LEET EMA SE HAKARAK SAI BOOT LIU, NIA TEM QUE SAI IKUS LIU HOTU HODI SERVI EMA HOTU” Mark 9,30-37

“IHA IMI LEET EMA SE HAKARAK SAI BOOT LIU, NIA TEM QUE SAI IKUS LIU HOTU HODI SERVI EMA HOTU” Mark 9,30-37

Maun alin sarani doben sira, buat nebe Jesus dehan ne’e los duni. Los duni katak ema atu sai boot liu uluk nanain nia tem que sai kiik liu, no sai servidor ema hotu nian.

Sai boot ne’e naturalmente nundar ema moris hakarak ida nebe ita hotu hotu iha, iha moris social nian ne’e direito ida be garante ba ita hotu.

Baibain kolia kona ba ema boot ne’e ita koalia kona ba kbiit sira be liga ba iha ukun nain sira rai ne’e ninian, laos Lalehan ninian. Ema sira be iha kbiit atu ukun moris nundar nação no iha kbiit atu ukun nundar ema riku. Iha sorin seluk ema boot mos mak ema sira nebe sira nia naran sai boot tamba prestação nebe sira iha.

Nune’e leitura sira be ohin ita foin mak rona hamutuk dadaun be koalia kona ba ema boot ne’e ema boot ida oinsa? Ema boot ida hanesan ho ita nia experiência ita hare no ita koko iha moris loro-loron nian ne’e ka ema boot ida oinseluk husi sira ne’e?

Atu comprende kona ba ida ne’e ita tem que hahu husi buka comprende Cristo ninia liafuan rasik nebe dehan “SE HAKARAK SAI BOOT LIU, NIA TEM QUE SAI IKUS LIU HOTU HODI SERVI EMA HOTU”. Ida ne’e katak sa los? Iha ne’e Nai Jesus dehan buat rua nebe fo sentido ba malu, ida labele haketak fali husi ida seluk, basa haketak ida husi ida seluk sei halakon buat nebe Jesus hakarak dehan. Jesus dehan liafuan fundamental rua. Ida ba dahuluk mak EMA BE HAKARAK SAI BOOT no ida segundo mak EMA NEBE SERVI. SERVI EMA SELUK MAK HALO EMA IDA SAI BOOT oinseluk nia laos ema boot, nune’e EMA BOOT ne’e katak EMA NEBE HATENE FO NINIA-AN hodi SERVI EMA SIRA SELUK. Sai ema boot laos katak ema seluk mak servi fali nia maibe nia mak tem que servi uluk ema seluk. Ne’e mak carateristica ema boot sira nian.

 

 tamba sa leitura sira domingo ohin nian koalia kona ba realidade ida ne’e? Leitura sira koalia kona ba ne’e tamba ita moris nundar Maromak nia povo ne’e moris hamutuk iha libur ida deit nebe fo mos bibian mai ita atu bele sai boot, atu bele sai ukun nain hodi lori Maromak ninia povo lao iha dalan Maromak nian, dalan ba Lalehan. Leitura sira koalia kona ba boot ne’e tamba realidade ne’e lolos ne kbiit ida be mai husi Maromak fo ba ita ema sira atu ita bele servi diak liu tan Maromak ninia povo no servi diak liu tan Maromak nebe ita fiar ba ne’e.

Hanoin tuir buat nebe Jesus dehan ba apostolo sira kona ba boot ka ema boot ne’e ita descobre katak BOOT-EMA BOOT, KBIIT- PODER ne’e katak SERVI, katak SAI ATAN BA EMA SELUK, Katak sai instrumento ida atu servi ema hotu hotu hodi halo ema hotu hotu hetan moris ida diak no merese lolos nundar Maromak ninia oan. BA SAI BOOT ida hanesan ne’e mak ema sarani sira hotu tem que lao to’o ba no temque hatudu nafatin. Nudar sarani ita nia vocação dahuluk mak SERVI. Hodi servi lolos mak halo o sei sai ema boot iha Maromak no iha povo sira nia oin. Ita ba nati tuir nafatin mestre nia hahalok be mai atu servi ema laos atu ema servi nia.

Concretamente iha ita nia moris loro-loron ita bele reflete tuir linha boot rua ne’e moris nundar ema ida nebe hatene servi no moris nundar ema boot ida be cristão ne’e. Ita servi malu ka lae? Hahu kedas husi ita nia moris iha ita ida idak ninia familia mak sai mai ema sira seluk. Ita servi ita nia alin sira be percisa, ita nia inan aman be percisa? Servi malu hatudu moris tuir justiça no sevi malu lori paz ka hakmatek ba ita nia uma, lori ksolok ba ita nia uma. Ida ne’e ita hotu experiemnta furak oinsa ne’e. Ita mos experimenta la furak oinsa ne’e wainhira ita la servi malu hodi hamosu fali situação nebe la favoravel ba ita nia moris, situação nebe hatudu ita nia fila kotuk ba Maromak hodi lao dook los husi Maromak to’o lao lakon tiha deit.

Dalan servi nian mos mak sai odamatan inan ba ema boot ka ukun nain ida atu bele sai ukun nain ou ema boot lolos be Maromak hakarak. Boot ida precisa kahur ninia moris ho povo kiik sira nodi servi povo ne’e, laos povo ne’e mak servi fali boot sira wainhira povo ida ne’e mos moris naton hela ho ninia miseria be nia hasoru hela dadaun. Ne’e buat nebe jeralmente ita hare, maibe ita mos percisa reconhece katak iha ema kiik ka povo kiik sira nia le’et mos dala balun la hatudu dalan moris servi malu nian ne’e ida. Iha liafuan badak ita bele dehan ita kuran tebes moris iha espirito servi malu nia laran. Nune susar tebes mos mai ita atu bele buras sai boot iha ita maun alin no iha Maromak nia leet. Wainhira espirito ida ne’e kuran husi ita espirito moris ida buka fo satisfação ba deit ita nia an ne’e mak domina. Espirito ida nebe halo ita kaan ba kbiit no naran boot hanesan apostolo sira descute malu atu hetan. Wainhira kaan liu ba poder halo ema sira pratica facilmente buat sira hotu nebe relaciona ho poder ka kbiit ka boot ne’e nebe ohin Santo Apostolo Tiago alista mai ita, ita nia nia hahalok at sira be hatudu an iha; hamosu funu, oho malu, halo at ba malu, rai odio ba malu no hakarak at ba malu. Nune’e ita halakon justiça no paz husi ita le’et automaticamente.

 

Maun alin sira, Nai Jesus Cristo ohin bolu fali ita atu fila ba dalan los ka dalan justiça nian, dalan paz nian. Dalan ne’e hahu iha moris ida be hakonu an ho espirito servi malu lolos iha buat hotu, ema kiik e ema boot haraik an ba malu no servi malu nafatin nundar Maromak nia oan hodi bele lori moris ida digno nakonu ho ksolok, dame no domin ba ita hotu.

 

Maun alin doben sira,

Ita ema sarani sira so sai boot deit wainhira iha ita nia moris ita hatene haraik an sai kiik hodi servi ema seluk. Ita nia hahalok sira mak tem que sai boot laos ita nia naran sira mak sai boot, ita nia hahalok sira sai boot tuir Maromak nia futar liafuan ohin nian hetan iha;

-fiar metin ba Maromak nafatin

-La laran moras no la halo at hasoru ema sira seluk

-Moris iha paz no justiça nia laran

-haraik-an hodi servi ema sira seluk.

 

Ita bele moris hanesan ne’e iha tempo ohin loron nian? Com certeza bele wainhira ita hamutuk ho Maromak. Amen.

Leave a Reply

Your email address will not be published. Required fields are marked *