shadow
Diocese de Dili > NOTÍCIAS > REFLEXÃO > Servi no halibur hanesan JESUS

Servi no halibur hanesan JESUS

Primeira Leitura              Sab. 2, 12ª. 17-20

Lia Housi Livro Sabedoria:

Ema aat sira dehan: “Ita tau to’ok hany ba ema di’ak, basá, nia hasusar ita: nia la kohi tuir ita nia hahalok; nia haksi’ak ita, tan ita la halo tuir Ukun-fuan; nia dun salan mai ita, tan ita la halo tuir ita nia lisan. Nun’e, ita haré to’ok nia lia-fuan lós eh la lós; ita haré to’ok buat ba nia sei hetan iha oras atu mate. Basá, ema di’ak ne’e Maromak nia oan karik, Maromak sei haré nia, hodi hasai nia housi nia funu-balu sira liman. Ita sei koko to’ok nia, tolok nia, fo terus nia, atu hatene nia laran maus, atu sukat nia paciência. Ita sei lori nia ba mate aat, basá, nia hateten katak Maromak sei tulun nia.”

Maromak Futar Lia.

 

Salmo Responsorial                                                                                                                                                                          Sal. 55(56), 3. 4. 5. 6. 8

Refrão : Na’i simu ha’u moris!!! Repete-se

  • Na’i sadia ha’u hodi Ita boot naran.

          Tulun ha’u ho Ita boot kbiit. Refrão

 

  • Na’i rona ha’u oração;

          Simu ha’u nia harohan. Refrão

 

  • Ema loko an hamriik hasouru ha’u;

          Ema aat duni, fo terus ha’u. Refrão

 

  • Maibé Na’i ha’u Maksoyn,

          Nia tahan ha’u moris. Refrão

 

  • Ha’u hakarak hasa’e sacrificio ida ba Ita

          Hodi fo agradece ba Ita naran, basá, Ita di’ak. Refrão

 

Segunda Leitura                                                                                                                                                                                                   Tg. 3, 164, 3

Lia husi São Tiago nia surat:

Maun-alin sira: Iha fatin nebé ema laran moras no hirus malu, iha fatin ne’e ema sei laran susar sei iha hahalok aat oin-oin. Maibé, matenek na’in tun mai housi leten, uluk liu, Nia sei mai ho laran mos; hafoin, Nia sei mai ho dame, ho laran di’ak, ho laran mamar no laran luak, sei mai ho tulun; Nia sei mai ho oin ida de’it ba ema tomak; Nia sei mai la ho laran makerek. Iha tempo hakmatek mak justiça sei mosu ba sira nebé buka dame malu. Funu mai housi nebé? Hirus malu mai houi nebé? Ne’e laós mai housi imi nia laran aat? Imi nia laran aat mak halo imi hatuda malu iha imi nia laran. Imi buka atu sai riku, maibé imi ki’ak nafatin. Tan ne’e mak imi oho malu. Imi laran moras malu, maibé, imi la manan buat ida. Imi haksesuk, imi funu malu. Imi kuran buat hotu, tan imi la husu. Imi husu, maibé la simu, tan imi husu la lós. Basá, imi husu de’it buat atu soran imi nia laran aat.

Maromak Futar Lia.

 

Aclamação                                                                                                                                                                                                                2 Tes. 2. 14

Refrão : Aleluia, Aleluia!! Repete-se

                 Hodi Evangelho Na’i Maromak bolu ita,

                  Atu hetan ita Na’in Jesus Cristo nia glória. Refrão

 

Evangelho                                                                                                                                                                                                              Mc. 9, 30-37

Na’i Jesus Cristo nia Evangelho Nu’udar São Marcos haktuir:

Iha tempo nebá, Jesus ho nia Escolante sira hakat liu ba Galileia sorin. Nia la kohi atu ema ruma hatene, basá, Nia hakarak hanourin nia Escolante sira. Nia lia tun ba sira dehan: “Ema sei saran Mane Maksoyn ba ema aat sira liman. Ema aat sira sei oho tiha Nia; maibé, Nia mate tiha, liu loron tolu Nia moris hías!” Jesus nia Escolante sira la hatene lia hirak ne’e katak sá, maibé, sira ta’uk hela atu husu Nia. To’o tiha Cafarnaum, tama tiha iha uma laran, Jesus husu ba sira: “Imi haksesuk malu kona ba sá ida, iha dalan?” Maibé, sira nonok tiha, basá, sira haksesuk kona ba sira ida nebé mak boot liu. Nune’e, Jesus tur tiha, bolu sira na’in sanulu resin rua hodi dehan ba sira: “Sê hakarak boot liu sira seluk, nia sei sai ikus liu hotu, sei sai hotu-hotu nia atan.” Jesus kaer tiha labarik-oan ida, tau tiha nia iha sira nia klaran, hako’ak tiha nia hodi dehan ba sira: “Ema nebé simu labarik-oan ida hanesan ida ne’e hodi Ha’u nia naran, nia simu Ha’u an rasik. Ema nebé simu Ha’u, nia la simu Ha’u, maibé, simu Ida nebé haruka Ha’u mai.”

Lia Maksoyn.

 

 

 

Reflexão :

LORI CRUZ TUIR JESUS

               Manán sá lós, ema nebé dehan katak nia fiar, maibé la moris tuir nia fiar? Basá, ó la buka Maromak nia hakarak, maibé, ó buka de’it ema nia hakarak! ema nebé lakon Nia moris, tamba Ha’u, no tamba lia foun di’ak, ida ne’e sei soy duni nia moris. Se ita hare liu deit, leitura tolu (Primeira-Segunda Leitura & Evangelho) Domingo semana nee (Domingo Comum XXIV-Ano B), hamosu impressão (kesan) negativa no tristeza. Basá, iha Primeira leitura, profeta Isaías hakerek:”Ha’u fo ha’u kotuk laran ba ema sira be hakanek ha’u; ha’u sée oin nafatin ba ema sira nebé fokit ha’u hasa-rahun, fo oin ba sira nebé tolok no tafui ha’u. Maibé, Na’i Maromak mai tulun duni ha’u, tan ne’e, mak ha’u la moe”. Tuir fali, Tiago Apóstolo iha ninia carta hakerek:” Ne’e duni, fiar tanan de’it, hahalok la’ek, fiar ne’e, fiar maten ida”. Ikus liu, Evangelho, São Marcos relata:” Ema ruma hakarak karik tuir Ha’u, sei hakribit nia sala rasik, sei simu nia cruz hodi la’o tuir Ha’u”. Haré tiha nota prévia husi leitura tolu nee, liu-liu Evangelho, ita halo resumo badak ida hodi tenik katak; ita compreende didiak katak: critério atu tuir Jesus nebe aparentemente negativa nee, tuir lolos nudar critério absoluto hodi tuir Jesus hodi hatudu moris sarani nebe autêntico no optimismo.

Iha citação (kutipan) Evangelho nebe apresenta iha leten, antes nee evangelista Marcos mos haktuir katak; Jesus mos duni sai diabo, cura ema monok no diuk, fo han ema rihun hat. Wainhira Jesus nia escolante sira assite tiha lalaok milagrosa hirak nee, ikus mai Jesus husu ba sira:”Be imi dehan Ha’u sée?//Menurut kamu, siapakah Aku ini?//Quem vocês dizem que eu sou?”.

Afinal liu husi relato Evangelho, ita descobre katak; escolante sira nebe sempre horik hamutuk ho Jesus mos fo resposta diferente acerca Jesus nia personalidade relaciona ho pergunta:”Be imi dehan Ha’u sée?”. Pedro ikus mai representa sira seluk hatan ba Jesus tenik:” Ita boot mak Messias”. Jesus bandu kedas sira hodi konta tutan assunto nee ba ema seluk basá, situação socio-política no conceito kona ba Messias entre ema judeu iha altura neba la hanesan. Cada grupo define figura Messias tuir ida-idak nia interece. Iha balu hanoin katak; Messias nebe atu mai, mosi mai ho figura liurai ho kbiit makás, balu dehan Messias mai hanesan profeta ida, seluk fali dehan Messias mai hanesan libertador ida hodi haré situação política. Em contra partida, Jesus justifica katak Nia mak Oan Mane nebe sei simu terus too mate maibé, sei simu hikas glória moris hias nian.

Jesus nia lia bandu nee tuir lolos atu hanorin no bolu atenção ba escolante sira hodi prepara-an didiak no aten brani hodi simu mos terus (sacrifício) ho laran kmaan maske consequência disponibilidade nee todan. Jesus motiva eh sunu ita nia aten brani hodi barani simu terus ba ksolok loron ikus nian. Maibé, Jesus nia escolante sira (inclui mos ita sarani ohin loron nian), mesak ema simples, la dun hatene buat barak kona ba vizaun sira iha Antigo Testamento nian relaciona ho Messias nudar hakerek iha livro profeta Isaías nian. Escolante sira mos barak inclui mos ita sarani ohin loron nebe seidauk compreende kona ba moris hias. Pior liu tan  ita sira ohin loron sei dúvida ho moris hias.

Durante tinan tolu nia laran, sira rona ona Jesus nia hanorin sira, sai sasin ba milagre sira be Jesus halo, maibé, afinal sira seidauk bele compreende didiak saida mak Jesus hatete no halo. Jesus hatete fila-fila ba sira katak Nia sei sei terus too mate (Cf Mc 9,9-10; 10, 32-34). Até Jesus nia mate iha Cruz tutun, sira hotu halai lakon, único João deit mak la halai.

Los duni, difícil tebes ba ita ema hodi muda-an iha buat hotu-hotu. Susar mos ba ita hodi soe dook ita nia conceito no convicção (keyakinan) kona ba saida no se mak Messias nee. Dala barak ita temi Jesus mak Messias, Jesus mak Maromak, Jesus mak salvador. Pergunta mak nee, lia temi hirak nee tanba ita compreende duni ka keta ita temi tanba ema barak mos temi lia nee loro-loron? Ita nia conceito la hanesan, até contradis ho Bíblia Sagrada tanba motivo eh interece la hanesan. Hanesan mos sociedade ohin loron, considera ukun nain sira (governante) tuir ita nia gosto, tuir cor partido, tuir cor grupo. Tanba nee mak ita nia compreensão kona ba Messias mos tuir deit ita nia vontade até que contradis ho Bíblia Sagrada.

Até nação boot no desenvolvido sira mos ohin loron hasoru dificuldade kona ba fiar. Pior liu tan, ema hobur liu mak artista sira nia imagem, pintura ka fotografia maibé, sira alergia wainhira haré imagem ka estátua Jesus Cristo, Nain Feto ho Santo sira, inclui Papa nia imagem. Balu até que dehan Jesus nia doutrina la relevante ona ho mea ohin loron nia moris. Maibé keta haluha Jesus nia lia nebe tenik: Se mak la reconhece Hau, Hau mos sei la reconhece nia iha Aman Maromak nia futar oin. Iha fatin barak. Liu-liu nação sira nebe população maioria Cristão, hahu moris sabraut hodi legaliza ona casamento feto ho feto, mane ho mane, legaliza aborto, legaliza droga nst.

Oinsa ita Católico Timor Leste nia compreensão kona ba Messias? Tuir los progresso tecnologia-informatica ohin loron, facilita ita compreende diak liu tan Messias ba ita nia moris sarani nian. Ita simu no fiar diak liu tan Jesus nebe mate no moris hias tiha ona. Maske nunee, qualidade ita nia fiar nudar Cristão Católico quase que pior liu fali ema sira tempo uluk nian. Progresso nebe tuir los halo ita nia fiar abut metin liu tan mak, halo ita hakiduk demais fali ba kotuk. Hakat passo ida ba oin maibé, sempre hakiduk passo rua ba kotuk.

Nee tan deit ita nia compreensão ba Messias tuir ritmo mundo nian hanesan; política, social, economia, segurança. Ita haré Cristo nia kmanek liu husi construção Igreja nebe luxo, capela nebe furak, uma laku nebe tradicional. Hirak nee hotu aspecto físico deit, basá, aspecto espiritual eh moris diak klamar nian mak sai sasukat lolos ba qualidade sarani ohin loron. Tanba nee mak São Tiago hakerek iha Segunda Leitura katak; Fiar nebe la hatudu iha hahalok, fiar nee mamuk.

Jesus sunu ita nia fiar hodi hanorin katak;”Ema ruma hakarak karik tuir Ha’u, sei hakribit nia sala rasik, sei simu nia cruz hodi la’o tuir Ha’u”. Ita nia Cruz lolos nebe ita precisa lori hodi tuir Jesus mak, ita nia vontade livre hodi husik ita nia compreensão kloot kona ba figura Messias. Precisa deit ita sacrifica-an hodi confessa katak; Jesus mak Messias Maromak Oan, nudar Pedro declara iha relato Evangelho. Jesus hatudu dalan terus atu ita mos hatene simu terus molok hetan diak. Ohin loron sarani balu moris diak la tuir dalan nebe los, funcionário blau riku derepente liu husi corrupção, negociante balu manipula folin hodi hasae rendimentu. Oinsa ita bele hatudu hahalok sarani se ita nebe Catolico mak comete uluk hahalok hirak nebe Jesus nudar Messias bandu? Oinsa ita bele lori rasik ita nia Cruz se hahalok kiik hirak nee ita la consegue hadook. Wainhira ita ita brani sacrifica buat kiik, buat nebe boot ita sei hetan. Cruz (sacrifício) mak dalan salvação-Jesus Cristo mak Messias. ema nebé lakon Nia moris, tamba Ha’u, no tamba lia foun di’ak, ida ne’e sei soy duni nia moris.  Assim Seja (Ignas).

Leave a Reply

Your email address will not be published. Required fields are marked *