shadow
Diocese de Dili > NOTÍCIAS > LETURA DIÁRIA > Sexta-Feira, XXIV Semana Tempo Comum (ANO B)

Sexta-Feira, XXIV Semana Tempo Comum (ANO B)

Primeira Leitura                   1Cor. 15. 12-20

Lia housi São Paulo nia primeira Surat ba sarani sira iha Corinto.

Maun alin sira: Ema haklaken Cristo nu’udar ida nebe moris hi’as ona housi mate, oin sá imi balun dehan katak ema mate sei la moris hi’as? Ema mate la moris hi’as karik, ne’e duni Cristo mós la moris hi’as. No Cristo la moris hi’as karik, ne’e duni lia nebe ami haklaken mós folin laek; imi fiar mós folin laek. Ne’e duni, ami sai sasin bosok ba Maromak, basá ami sasin kona ba Maromak katak Nia halo Cristo moris hi’as, nebe lolós Nia la halo moris hi’as, tebes duni karik katak mate sira la moris hi’as. Basá mate sira la moris hi’as karik, ne’e katak Cristo mós la moris hi’as. Cristo la moris hi’as karik, imi nia fiar leet de’it; imi sei hela iha imi nia sala. No sira nebe toba tiha iha Cristo lakon tiha hotu. Ita fiar iha Cristo ba moris ida ne’e de’it karik, ita mak povo rahun áat liu ema hot-hotu.

Maibe lolós, Cristo moris hi’as ona housi mate; Nia mak fuan uluk housi sira hotu nebe toba tiha ona.

Maromak Futar Lia.

 

Salmo Responsorial                                                                                                                                                          Sal. 16(17). 1, 6-7, 8b,15 (R.15b)

Refrão : Na’i, ha’u neon sei haksolok tebes, Uainhira Ita glória mosu mai!!! Repete-se

  • Na’i, rona ha’u be justo,

          Rona ha’u nia halerik ba;

          Sée tilun ba ha’u hamulak,

          Ha’u ibun la bosok. Refrão

 

  • Ha’u harohan ba Ita, Maromak, hatan mai ha’u,

          Maromak, rona ha’u lia;

          Hatudu Ita laran-luak kmanek mai ha’u,

          Housi funu baluk sira, Ita soi sira

          Bé subar-an iha Ita sorin kuana. Refrão

 

  • Bali ha’u hanesan Ita futar matan fuan,

          Hatau ha’u iha Ita liras nia mahan;

          Haraik mai ha’u atu fihir Ita futar oin.

          Uainhira ha’u hader,

          Habosu ha’u ho Ita futar ilas! Refrão

 

Aclamação                                                                                                                                                                                                             cf. Mt. 11. 25

Refrão : Aleluia, Aleluia!! Repete-se

                  Rahun di’ak ba Ita, Aman, Na’i lalehan no rai nian,

                  tan Ita hatudu mistério reino lalehan nian ba kiik sira. Refrão

 

Evangelho                                                                                                                                                                                                                     Lc. 8. 1-3

Na’i Jesus Cristo nia Evangelho nu’udar São Lucas haktuir:

Iha tempo neba, Jesus la’o housi cidade ida ba cidade seluk no housi knua ida ba knua seluk, hodi hanourin no haklaken liafuan di’ak kona ba Maromak nia reino. Sira sanulu resin rua la’o hamutuk ho Nia, no mós feto balun nebe hetan di’ak housi moras oi-oin no housi espírito áat sira: Maria nebe ema hanaran Madalena, housi nia diabo hitu sai tiha ona; Joana, Herodes nia atan Cusa nia feen, Susana no feto seluk tan, nebe tulun sira ho sira nia rikusoi.

Lia Maksoyn.

Leave a Reply

Your email address will not be published. Required fields are marked *