shadow
Diocese de Dili > NOTÍCIAS > HOMILIA DO BISPO > FESTA SÃO MATEUS APÓSTOLO

FESTA SÃO MATEUS APÓSTOLO

Ohin ita comemora festa evangelista São Mateus nian. Mateus nee dehan, “Dado de Deus” presenta ida Maromak ninian, ida nebe Na’i Maromak haruka.

Hau hakarak convida ita boot sira atu reflete kona ba liafuan “Tuir Hau Mai”. Ida nee mak vocação ka chamamento São Mateus ninian. Se ita hare ituan vocação diferente ituan ho apóstolo sira seluk hanesan Pedro, Andre, Tiago no João. Mateus nia profissão nudar cobrador inposto. Servisu ida nebe halo povo barak ladun contente laos tanba ema lakohi atu selu inposto, maibe tanba publicano sira ema considera sira foer, inpuro, colaborador estrutura estatal ida opressiva liu-liu tanba ema considera sira naokten, sira considera ba nia salvação nee inpossível ba Mateus

Tuir Lei ema nebe naoktem que restitui buat nebe nia naok 20%. Oinsa mak cobrador inposto ida bele satisfas condição ida se nia rasik la hatene nia naok hira, nia naok husi se no naok se nian. Ema hanesan nee mak ohin ita hare vocação Mateus ninian Maromak fihir duni ida nebe la soi ba ema, la monu ba ema nia matan. Maibe fatuk nebe badaen sira hewai mak sei nakfilak ba fatuk inan. Wainhira Jesus bolu Mateus ho Jesus nia hateke, ho Jesus nia convite ikus mai consegue dada Mateus ninia atensão.

Maromak nia hare ida nee penetra iha ita ema nia fuan, hateke Maromak nian nebe atrai ema ida, hare ida nebe manan ita nia fuan ho laran, obriga ita atu hela nafatin iha domin ida nee. Ida nee mak sentido celebração ohin ninian. Experiência Domin Maromak nian nebe sira hetan tiha ona no lakohi lakon tan. Wainhira convite Jesus ninian to’o nia tilun nia hamrik kedas hanesan paralítico ida. Ohin iha ita nia le’et Diácono César mos hau fiar hatan ba hateke ida ne’e.  Nee mak domin nebe conquista tiha nia nia fuan.

Vocação nee experiência domin ninian, Maromak nebe bolu ema hatan. Laiha domin nebe boot liu selae ida nebe fo nia an ba nia maluk sira. Domin ida nee mak ita nia diácono habadak iha ninia motto dehan, In Ministerium meum In Ministrando katak domin ida ne’e laos hetan iha altar de’it, maibe hetan iha serbi hodi saran an. Ida nee mak durante iha formação diácono consegue atu bele compriende domin ida ne’e nia sentido, domin ida nebe atu serbi.

Ita bele husu ba ita nia an serbi ida oinsa? Ohin loron iha teoria oi-oin, iha modelo barak nebe ema koalia kona ba oinsa ita nia knar nee bele efetivo liu tan, maibe ba ita hotu liu-liu ba amululik no ba ita nia candidato nebe hakat dadauk ba iha amululik nian, ba ita ida deit; Cristo mak sai modelo ba ita. Vocação São Mateus nian manifesta caraterística furak ida nebe Maromak ninian.

Ita nia amu Papa atual ho liafuan nebe ita usa nafatin “Periferia”; laos hadomi deit sira nebe besik, maibe hadomi mos sira nebe dok, sira nebe sente an latama, oinsa ita mos haka’as an atu hakbesik ba sira nebe dok husi Uma Creda dok husi ita. Ida nee mak São Mateus sente mos  iha momento neba nia sente nia an dok teb-tebes, maibe Na’i Maromak besik ba nia hodi bolu sala nain sira  ka ita bolu sala nain ida la significa atu condena, bolu sala nain ida la significa atu haksiak tanba nia comportamento laos atu hamoe, maibe bolu ho atençaõ atu bele cumpre lolos nia dever  no preceito sira liu-liu tem que hatene katak iha banquete ida prepara hela ba sira, atu sira bele sente duni alegria ida husi Maromak nia reino.

Amo Papa nia liafuan dehan nunee; amululik sira lori iha sira nia kabás povo nebe saran ba sira liman. Lori sira ida-idak nia naran hanoin sira iha nia oração. Wainhira o haraik an hatais casula tem que halo ita amululik sente duni iha kabás leten no iha ita nia fuan todan povo nee ninian, povo ninia ksolok, povo ninia fidelidade. Ida nebe Na’i bolu tem que iha duni paixão ba ninia povo.

Diácono César sai amululik ohin loron katak, sai mos Ponte entre Maromak ho nia povo. Ponte nia função atu liga laos atu hari fali muro, ponte atu facilita sarani bele simu graça Maromak ninian, disponibiliza ita nia an atu reza, atu nunee sarani sira bele acesso ba sacramento sira. Dalaruma tendência ita sibuk ba buat barak, maibe sai amululik ne’e oinsa mak ita bele halo ita nia an, atu husi ita graça Na’i Maromak ninian bele continua suli ba iha sarani no sarani sira sente duni Maromak ninian presença iha ita amululik sira.

Amo Papa sempre dehan, Airin tolu nebe mak tane as vida amululik sira nian mak “Oração, Eucaristia, no Maromak nia liafuan”. Husi airin tolu nee hau aumenta tan ida “Confessa”. Sacramento confessa nian mak dalan ida atu continua purifica ita atu bele moris nafatin iha Maromak nia graça.

ita nia celebracão ohin convida ita hotu atu ita hare ba iha apóstolo sira. Apóstolo sira mos maske sira iha desafio no defeitos oin-oin, maibe sira consegue hatan, lao no ohin loron ita hahi Nia tanba Nia hatene reconhece nia an husik Maromak atu transforma nia an. Mai ita hare ba iha ita nia apostolo sira no banati tuir evangelista sira, rona duni espírito lian ida ne’e hodi hakarak oferece ita nia an.

Nee duni mai ita sarani sira hotu liu-liu ba família sira nebe ohin acompanha iha festa ohin nian mai ita hotu lori ita nia oração hodi reza ba ita nia amululik foun atu liu husi tula liman nia loron ba loron hatan nafatin “hau mak ne’e pronto nafatin atu halo tuir Maromak nia hakarak”.

 

Ainaro, 21/09/2018

(D. Virgilio do Carmo da Silva,SDB)

Leave a Reply

Your email address will not be published. Required fields are marked *