shadow
Diocese de Dili > NOTÍCIAS > Notícias > “HA’U LORI IHA HA’U NIA ISIN JESUS CRISTO NIA MARCA”

“HA’U LORI IHA HA’U NIA ISIN JESUS CRISTO NIA MARCA”

DCDD, iha loron 4 Outubro tinan-tinan, Santa Creda comemora Festa São Francisco de Assis. Ho festa São Francisco de Assis nian nee Seminarista Seminário Propedêutico São João Maria Vianney nain 35 composto husi Diocese tolu; Dili hamutuk nain 24, Baucau hamutuk nain 7 no Maliana hamutuk nian 4 simu batina hodi hakat tan passo ida ba iha vida nailulik nian iha ressinto Seminário Propedêutico São João Maria Vianney, Maloa Ailok-Laran.

Dom Basilio do Nacimento bispo de Baucau be preside celebração Eucaristia nee iha ninia reflexão hateten; Ohin imi hirak be simu batina ne’e laos katak atu sai amululik ona, maibe hanesan marca ida. Iha dalan lubuk ida iha imi nia oin, maibe imi hili dalan ida ne’e. Nee duni atu to’o rohan ka la to’o, pelo menos to’o fase ida nee, dalan atu tuir Jesus Cristo nee mak sai possivelmente Amululik. Ba imi seminarista sira ba etapa ida ne’e imi laos sai ona nailulik, maibe etapa ida nee haklean tan passo ida hodi dehan sai nailulik nee folin saida iha imi nia vida. Hakat tan ba oin hodi haklean tan imi nia fiar, hodi haklean imi nia conhecimento kona-ba Jesus Cristo. Tanba ida ne’e mak ita boot sira to’o iha fase ida nee husik buat lubuk ida; la namora, la buka feto foun ba família, seidauk tama ba mundo emprego nian tanba mehi katak dalan ida ne’e ba ita boot sira. Maibe buat sira ne’e ou troca ida nee sei la folin buat ida se ita boot sira haree ba vida Nailulik nian nee hanesan proporção Social ida. Sai amululik iha ita nia sociadade ida nee sai privilêgio ida. Ita fo graça ba Maromak tan ema sei valoriza, ema sei fo folin ba moris ida nee, maibe laos tanba ita, maibe tanba dalan ida nee sai sasin ida kona ba ita nia vida, ita nia fiar iha Jesus Cristo.

Dom Basilio do Nacimento haklean tan, Moris sacerdócio nian ou etapa ida ne’e significa etapa ida ita boot sira haklean ita boot sira nia moris, ita boot sira nia fiar, ita boot sira nia sensibilidade kona-ba Jesus Cristo, buat barak claro iha ita boot sira nia vida ha’u husik ida ne’e hodi manan ida neba, ha’u husik dalan ida nee tanba Jesus Cristo, hau husik privilégio ida ne’e tanba Jesus Cristo. Nee duni Jovem seminarista sira, marca Jesus Cristo nian iha ita boot sira nia vida nee atu haklean liu husi fiar, maibe marca ida ne’e ho consequência. Consequência ida nee hau kaer São Francisco Assis nia liafuan; ser símples, humildes e puros. Nee consequência ba hirak nebe tuir Jesus Cristo laos deit amululik sira, maibe hotu-hotu. Símples nee dala barak ita traduz ba haraikan, laos haraikan ou laos mos la loko an, maibe símples nee katak hau hatene ha’u nia kbiit to’o iha nebe, ha’u moris tuir ida ne’e. Humildes katak ha’u iha ha’u nia direito hau la hasai ema seluk nia direito, maibe ha’u reclama buat nebe ha’u nian. Puros atu resumo deit katak graça ida nebe ita simu iha batismo nee tem que mutin nafatin, halo ita nia vida moos nafatin, halo ita nia klamar mos nafatin to’o mate.

Remata tiha Eucaristia iha discurço Reitor Interdiocesano Pe. Eduardo de Almeida hateten, Seminarista hot-hotu hanesan pre padre ida ne’ebe tem que hatudu liu husi exemplo de fidelidade. Decreto Uma Creda nian dehan, fidelidade ida ne’e hahu husi Amor de Batina ne’ebe ohin imi simu. Imi husik ona Ano propedêutico imi hakat ba disipulado filosofia ninian. exemplo oan sira imi tem que hatudu liu husi fideliadade nian liu husi batina mutin ne’e sai hanesan sinal fase ida, laos deit hatais hena bain-bain. Fase ida nebe ohin halo hotu ho sinal ida nebe simu batina seleção cuidadosa ida ne’e decisão ida nebe imi hola uma vez por toda a vida katak, decisão ohin o hola, o simu ona Batina, o hakat ona ba oin labele hateke ba kotuk por toda a vida laiha tan ona haksuit tun sae. Simu batina laos contente deit, maibe husu atu honestidade, responsabilidade, domin ba o nia decisão. Maromak hadomi o hafutar ona o ho batina mutin. Nee duni Parabens ba imi hakat tan paço ida ba oin, maibe hare ba hena mutin nee lori to’o rohan labele hafoer imi nia batina.

Iha sikun hanesan Salvador Soares aman hosi frater Ronaldo Sousa Almeida hosi quase paróquia Natarbora ho sentimento ksolok haktuir katak, hanesan aman iha esperansa boot tebes tanba buat sira ne’e hotu ha’u halo tuir ha’u nia oan nia hakarak. Hanesan inan aman no família tomak ami acompanha ami nia oan tuir saida mak nia hakarak to’o ohin loron iha ona passu simu batina. Hanesan aman no sarani católica ha’u contente tanba nia bele hakat hamutuk ho nia maluk sira iha ohin loron. Ami nafatin reza ba sira atu forte iha sira nia decisão sira maske enfrenta desafios iha vida. (Reportágem Fidelia Magno)

Leave a Reply

Your email address will not be published. Required fields are marked *