shadow
Diocese de Dili > NOTÍCIAS > LETURA DIÁRIA > Sabádo, XXVI Tempo Comum (ANO B)

Sabádo, XXVI Tempo Comum (ANO B)

Primeira Leitura      Job. 42. 1-3, 5-6, 12-16

Lia houisi livro Job nian:

Job hasa’e lia ba Na’i nune’e: “Ha’u hatene katak Ita bele halo buat hotu-hotu, basá, ba Ita, buat ida la susar. Sé mak bele teri netik Ita hanoin ho liafuan mamuk sira be folin laek? Tebes duni, ha’u ko’alia kona ba matenek sira be liu fali ha’u nia matenek nebe ha’u la hatene. Ha’u hatene de’it Ita tan rona ko’alia kona ba Ita, maibe oras ne’e ha’u matan haré ona Ita. Tan ne’e, ha’u halo tuir ha’u nia liafuan hodi hader-an iha rai-rahun no iha ahi kdesan”.

Na’I fó bensa ba Job nia moris foun liu fali nia moris uluk nian. Nia iha fali bibi malae rihun sanulu resin háat, camelo rihun neen, karau vaka par rihun ida no kuda buro rihun ida. Nia iha fali oan mane na’in hitu no oan feto na’in tolu. Oan feto boot nia naran Pomba, oan feto ida klaran nia naran Cássia, oan feto ida be ikun nia naran Azeviche. Iha rai tomak la iha feto sira kmo’ok liu Job nia oan feto sira. Sira nia aman fó ba sira riku-soi sorin housi maun sira. Liu tiha ne’e, Job moris tan tinan atus ida háat nulu; nia haré nia oan sira no bei-oan sira to’o otas háat. Ikus mai Job mate nu’udar katuas ho moris naruk.

Maromak Futar Lia.

 

Salmo Responsorial                                                                                                                                    Sal. 118(119). 66, 71, 91, 125, 130 (R. 135ª)

Refrão :  Na’i, halo nabilan mai ami Ita futar oin roman!!! Repete-se  

  • Na’i, hanourin ha’u matenek no descernimento,

          Basá, ha’u fiar iha Ita ukunfuan.

          Ema hasara ha’u sai di’ak mai ha’u,

          Atu buka hatene Ita ukunfuan Refrão

 

  • Ha’u hatene katak Ita Nia tesi lia, lós tebes,

          No Ita neon lós mak koko ha’u.

          Tuir Ita hakaran, Ita tahan buat hotu to’o loron ne’e,

          Tanba buat hotu tuir Ita ukun. Refrão

 

  • Na’i, haraik matenek mai ha’u, Ita atan,

          Atu hatene Fita hanourin.

          Na’i, Ita Nia liafuan mak roman,

          No matenek ba ema haraik-an sira. Refrão

 

Aclamação                                                                                                                                                                                                             cf. Mt. 11. 25

Refrão : Aleluia, Aleluia!! Repete-se

                  Rahun di’ak ba Ita, Aman, Na’i lalehan no rai nian,

                  tan Ita hatudu mistério reino lalehan nian ba kiik sira. Refrão

 

Evangelho                                                                                                                                                                                                              Lc. 10. 17-24

Na’i Jesus Cristo nia Evangelho nu’udar São Lucas haktuir:

Iha tempo neba, escolante na’in hitu nulu resin rua ne’e fila fali hodi haksolok dehan: “Na’i, diabo sira mós tuir ami hodi Ita nia naran.” Nia hatan ba sira: “Ha’u foin haré Satanás monu housi lalehan hanesan rai lakan. Los duni, Ha’u haraik tiha biit ba imi atu sama samea no sakunar sira, hodi manan funu baluk nia biit tomak; la iha buat ida nebe bele halo áat imi. Maski nune’e, keta haksolok tanba espírito sira tuir imi; haksolok de’it tanba imi nia naran hakerek tiha ona iha lalehan.”

Iha oras neba Nia haksolok teb-tebes ho Espírito Santo dehan: “Ha’u hahi Ita, Aman, lalehan no rai nia Na’in, basá Ita subar tiha buat sira ne’e housi ema matenek sira hodi fó hatene fali ba sira nebe kiik. Tebes, Aman, Ita hakarak duni nune’e. Ha’u nia Aman saran tiha buat hotu mai Ha’u. Ema ida la hatene se mak Oan, Aman de’it mak hatene; no ema ida la hatene se mak Aman, Oan de’it mak hatene, no ida nebe Oan Mane hakarak fó hatene ba nia.”

Hafoin, haketak tiha nia escolante sira housi sira seluk, Nia dehan: “Ksolok ba matan sira nebe haré buat nebe imi haré, Basá Ha’u dehan ba imi katak profeta no liurai sira barak uluk nian hakarak haré buat nebe imi haré, maibe sira la haré; no rona buat nebe imi rona, maibe sira la rona.”

Lia Maksoyn.

Leave a Reply

Your email address will not be published. Required fields are marked *