shadow
Diocese de Dili > NOTÍCIAS > LETURA DIÁRIA > Domingo, XXVII Tempo Comum (Ano B)

Domingo, XXVII Tempo Comum (Ano B)

Primeira Leitura                  Gén. 2, 18-24

Lia housi livro Génesis:

Halo tiha ema mane, Na’i Maromak lia tun, dehan:“Mane hela mesak la di’ak ida. Ha’u sei fo ba nia maluk ida tau tulun nia”. Hodi rai, halo tiha balada hotu-hotu iha ai-laran, no manu hotu-hotu semo iha leten, Na’i Maromak lori sira hotu ba mane nia oin, atu nia hanaran sira ida-idak: Naran nia fo, naran ne’e mak sei hela ba ida-idak. Mane fo naran ba balada dian sira hotu, fo manu sira hotu no balada fuik sira hotu. Maibé, ba nia, nia la hetan maluk ida hanesan nia. Sei dukur hela Na’i Maromak hasai mane nia knosen ruin ida, hafoin tau hikas isin iha nia fatin. Hodi knosen nia hasai housi mane nia knotak, Na’i Maromak halo feto ida, hafoin fo ba mane. Haré tiha feto ne’e, mane haksolok hodi dehan:“Tebes duni, ida ne’e mak ruin housi ha’u nia ruin, isin housi ha’u nia isin. Nia sei naran “feto”, basá, nia mai hosi mane”. Tanba ne’e, mane sei husik aman inan, atu bele horik hamutuk ho nia feen; sira na’in rua sei sai ema isin ida de’it.

Maromak Futar Lia.

 

Salmo Resposorial                                                                                                                                                                      Sal. 127(128), 1-2. 3. 4-5. 6

Refrão : Na’i haksolok ho ita, iha ita moris tomak!!! Repete-se

  • Rahun di’ak ba ema hamta’uk Maromak,

          Hodi la’o tuir nia dalan. Refrão

 

  • Ó sei han ó kosar-wén,

          Riku-soin no ksolok iha ó liman. Refrão

 

  • Ó nia kaben nu’udar toos di’ak ida,

          Iha ó uma laran. Refrão

 

  • Ó nia oan sira nu’udar ai oliveiras sorun,

          Hale’u ó uman nia mesa. Refrão

 

  • Na’i haraik bensa ba ema hamta’uk Nia,

          Hodi dehan housi sião. Refrão

 

  • Ó hare jerusalém nia di’ak,

          Iha ó moris tomak! Refrão

 

  • Ó haré ó bei-oan sira,

          dame ba Israel. Refrão

 

Segunda Leitura                                                                                                                                                                                                   Heb. 2, 9-11

Lia housi  surat ba Hebreu sira :

Jesus sai kiik liu anjo sira duni, maibé, la kleur, oras ne’e, ita haré Nia sai boot no nabilan liu, hodi Nia terus no Nia mate. Hodi Maromak nia tulun, Jesus mate ba ema hotu-hotu. Maromak, hun ho rohan sasán hotu sira nian, hakarak lori oan barak ba rahun di’ak. Hodi terus, Maromak halo sai kmanek liu ema nebé lori salvação mai ema hotu. Jesus ho ema hotu nebé nia soy, mai hotu husi hun ida de’it. Tan ne’e, mak Jesus la moe bolu ema sira “alin-maun”.

Maromak Futar Lia.

 

Aclamação                                                                                                                                                                                                                 1. Jo. 4, 12

Refrão : Aleluia, Aleluia!! Repete-se

                  Ita hadomi lolós maluk sira karik Maromak horik ho ita,

                  Nia domin mai ita boot tebes duni. Refrão

 

Evangelho                                                                                                                                                                                                               Mc. 10. 2-16

Na’i Jesus Cristo nia Evangelho nu’udar São Marcos haktuir:

Iha tempo nebá, fariseu balu hakbesik ba Jesus, hodi hasae lia ba Nia, dehan: “Mane ruma bele soe nia feen?” sira husu, atu koko de’it Jesus. Jesus simu hodi dehan ba sira: “ Moisés haruka imi atu halo oin sá?” sira hatán: Moisés haruka fo surat soe malu nian, atu haketak tiha malu.” Jesus simu, hodi dehan ba sira: “ Tan imi laran to’os mak Moisés fo ukun-fuan  ida ne’e. Maibé, houri hahu, Maromak halo ema, mane ho feto. Tan ne’e, mane sei husik aman-inan, atu bele horik hamutuk ho nia feen. Sira rua sei sai ema isin ida de’it .Nune’e sira laos ema nain rua ona, maibé ema isin ida de’it. Nune’e, buat nebé Maromak libur hamutuk. Ema ida la bele haketak.” To’o tiha uma, Jesus nia escolante sira husu hikas kona ba lia-fuan hirak ne’e. Jesus lia tun ba sira, dehan:” Ema nebé soe nia feen, hodi hola feto seluk, sala adultéiro hasouru feto uluk. Feto kabe-na’in nebé so’e nia la’en, hodi moris hamutuk ho mane seluk halo adultério.” Iha oras ne’e, ema lori labarik oan sira mai besik Jesus, atu Jesus bele kona sira. Maibé, Jesus nia escolante sira haksi’ak ema sira ne’e. Haré ida ne’e, Jesus hirus hodi hateten ba sira: “ Imi husik labarik sira ne’e mai besik ha’u. Keta kaer netik sira. Tebes, Ha’u dehan ba imi: Ema nebé la simu Maromak nia Reinonhanesan labarik-oan ida, nia sei la tama iha reino Maromak nian.” Hafoin, Jesus simu labarik-oan sira hodi haraik bensa ba sira.

Lia Maksoyn.

Leave a Reply

Your email address will not be published. Required fields are marked *