shadow
Diocese de Dili > NOTÍCIAS > REFLEXÃO > HAFOUN FALI RELAÇÃO HO MAROMAK LIU HOUSI NAIN FETO RAMELAU

HAFOUN FALI RELAÇÃO HO MAROMAK LIU HOUSI NAIN FETO RAMELAU

Sarani tomak Diocese Dili ninian, inclui mos Diocese Baucau no Maliana nebe hamutuk halo Peregrinação iha fatin ida nee, ita mai atu hafoun ita nia relação ida nebe Maromak iha ho ema no relação ida nebe ema iha ho Maromak. Relação ida nee mak ita mai iha Ramelau atu hafoun.

Maria mak Feto ida nebe hatene iha relação ida ho Maromak metin. Tanba ne’e Nia kous Jesus Cristo. No tanba ne’e mak ita hahi nia hanesan Feto ida kmook liu, kmanek liu Feto hot-hotu, sai hanesan modelo ema sarani ninian atu oinsa mak bele halo relação ida ne’e ba Maromak ba nafatin.

Iha livro Génesis hateten katak Maromak hakiak feto ho mane iha jardim ida. Jardim ida ne’e sai fatin importante ida ba ema bele besik ba Na’i Maromak. Nunee ita mos mai hamutuk iha ne’e atu halo fatin ida sai mos hanesan Jardim oan ida atu ita mai hafoun fali ita nia relação ho Maromak iha fatin ida nee.

Ita mai iha Santuário ida nee laos mai atu halo festa, maibe ita mai halo peregrinação ida nee lori ita iha buat rua; Penitência no converção. Ita koko malirin, hamlaha, kole nee sai hanesan dalan kikoan ida atu lori ita ba converção, halo ita sai tiha labarik kikoan, halo ita depende ba natureza ida nee ninian, ambiente halo ita depende ba Maromak ida nebe hakiak buat hotu-hotu.

Ita mai iha fatin ida nee laos atu buka ksolok, atu halo festa, maibe mai iha fatin ida nee atu hakribit ita nia sala, hakribit ita nia hahalok at sira liu-liu hasoru relação ida entre Ema ho Maromak.

Ita hotu hatene katak fulan haat nia laran santuário ida nee taka tiha maske ema barak hakarak mai visita. Fatin nee taka tanba iha fulan hirak liu ba hotu-hotu hare iha televisão, iha media social katak ita nia maun-alin balu nebe mai ho intenção diak maibe hatudu buat ida nebe ita dehan katak relação laos ona normal, halo ema sararni barak terus, halo ema sarani barak la gosta, halo ema sarani barak iha sentimento ida nebe antipático. Tan nee Uma Creda liu-liu Diocese Dili hamutuk ho ministério lubuk ida Turismo, Ambiente, Estatal hadia fali fatin ida nee, halo regras balun atu oinsa mak ita bele conserva Jardim ida nee sai nafatin fatin lulik ida nebe ita mai hasoru malu ho Maromak iha Maria nia Futar Oin, liu husi Maria nia harohan daet, liu husi Nia moris, Nia hahalok.

Ita mai iha fatin ida nee atu escola laos ita mai atu lori fali ita nia gosto sira. Ita mai iha nee hamutuk ho Maria ita bele hatene oinsa bele liga ho Maromak. Liga ho Maromak nee mak hetan benção ba ita nia relação sira nebe naksobu dadauk, família sira começa naksobu e sira la hanoin katak sira sai instrumento Maromak ninian hodi halo Maromka moris iha sira nia le’et. Atu nunee sira bele iha kbiit hodi bele halo buat ho-hotu nebe Maromak saran ba sira nia moris hanesan saran ba Adão ho Eva.

Fatin ida nee mos hanesan fatin sacrifício ninian, ema mai atu educa ninia an iha sacrifício ninia laran atu bele hetan benção Maromak ninian liu husi Nain Feto nia harohan daet. Mai ita hotu ho neon ho laran agradece Maromak ba Inan Santa, Inan Sala laek ida nee nia presença iha ita nia le’et atu ita bele hetan benção ida nebe ita hakarak. Hau hein katak peregrino sira nebe mai iha fatin nee sei la fila ho liman mamuk, maibe imi nia penitência no imi nia converção nee imi halo liu husi Maria nia exemplo.

Mai ita hot-hotu ho neon ho laran hahu ida nee ba oin katak consedera fatin ida nee Jardim ida nebe ita bele hasoru malu fali ho Maromak, atu nunee ita bele lori ita nia moras, ita nia mataben, ita nia kolen, ita nia rain ninia problema, buat barak nebe ita dalaruma hodi ita nia kbiit mesak labele resolve atu ita hodi mai iha fatim lulik ida nee atu ho Maromak ita bele.

Loron ida ohin ita celebra Nossa senhora do Rosário nian nee katak, loron ida nebe uluk liu wainhira ema Muculmano sira invade Eropa atu domina Eropa tomak. Iha neba maka devoção ba Nain Feto nee hahu, ema halo Penitência, ema halo oração ba nain Feto do Rosário atu bele manan funu ida nee. Husi devoção ba Nain Feto do Rosário ida nee mak Amo Papa Pio V consagra loron 7 Fulan Outobro ba Nossa Senhora do Rosário tanba vitória ida nebe Maromak haraik liu husi husi Nain Feto ninia harohan daet. Ida nee mak ita consagra mos fatin ida nee “Ramelau” tinan-tinan dia 7 de Outobro ita mai iha fatin ida nee atu harohan nafatin katak se funu maluk, buat matan la hare ninian, buat sita tama mai sobu ita nia relação diak iha rai ida nee nia laran, sobu família sira, organização Internacional sira nebe mai iha nee lori hanourin, lori doutrina, lori ideologia sira nebe contra ema sarani ninia vida, contra doutrina Uma Creda ninian ita precisa funu hasoru buat hirak nee atu labele halo família naksobu basá família naksobu Igreja naksobu nação mos naksobu.

Ita precisa conpromete iha fatin ida nee ba oin katak Nee “RAMELAU” fatin lulik ida nebe ita mai hafoun ita nia hahalok sira, família sira be mai nee mos atu husu Nain Feto bali hela sira nia moris. Tan nee mai ita hotu hafoun ita nia relação ida nee ho Maromak liu husi ita Nain Jesus Cristo ho Nain Feto Ramelau ninia tulun ita bele hatene oinsa mak tama iha relação ida nebe íntimo ho Jesus Cristo.

Leave a Reply

Your email address will not be published. Required fields are marked *