shadow
Diocese de Dili > NOTÍCIAS > Notícias > PEREGRINAÇÃO NINIA FINALIDADE ATU HETAN BENÇÃO

PEREGRINAÇÃO NINIA FINALIDADE ATU HETAN BENÇÃO

DCDD – RAMELAU, Hafoin halo tiha ação monu ain (Ato desagravo) ba Nain Feto iha Santuário Ramelau iha Domingo loron 7 fulan Outubro tinan 2018, Pe. Vigário Episcopal ba Assunto Pastoral, Pe. Jovito do Rêgo de Jesus Araujo husik hela ninia mensagem ba peregrino sira katak, Ita mai halo peregrinação iha ninia finalidade ida deit atu hetan benção ba ita nia an rasik, ba ita nia família, ba ita nia serviço no ba ita nia rain. Peregrinação laos ita mai halo fatin ida ne’e sai fali hanesan fatin sira festa nian hodi passa tenpo anima ne’e lae. Ita mai ho neon no laran halo viagem klamar ninian, viagem espírito nian, hodi hasouro malu ho Maromak liu husi Nain Feto iha Santuário ida ne’e atu bele hetan bencão.

Pe. Vigário Episcopal ba Assunto Pastoral, Pe. Jovito do Rêgo de Jesus Araujo mos recomenda katak, Husu ba maluk peregrino sira hotu quando mai visita Santuário ida nee mai ho intensaun sira klamar ninian, laos intenção isin ninian. Ita mai iha Santuário ida nee laos atu mai koko buat ksolok isin nian. Maibe mai iha nee haterus isin hodi haboot klamar, halo riku klamar, halo klamar hetan kbiit, hetan graça, hetan benção iha peregrinasaun ninian.

Ato de penitência ita halo ho intenção atu converte. Penitência la lori ita ba converção nee katak penitência nee saugate deit. Tanba nee Penitência tem que lori ita ba vida Conversão nian katak transforma ita nia vida, fuan, neon no klamar ninian, atu lori transformação ba mundo, ba sociedade no lori transformação ba povo ida nee ho ita nia atitude. Ne’e katak esforço pessoal ema ida-idak nian. Maibe ninia bênção nee ba comunidade tomak. Nee duni ita precisa hadia intenção peregrinação ninian, atu nune’e ita fila lori bênção Maromak nian liu husi Inan doben Nia harohan daet.

Pe. Vigário Episcopal ba Assunto Pastoral, Pe. Jovito do Rêgo de Jesus Araujo reforsa tan katak, Santuário Ramelau nee hanesan Jardim Eden nebe uluk Maromak tau Adão ho Eva hodi koko Maromak nia benção. Tan nee, ita Timoroan sira bele mai iha ne’e hanesan fatin ida nebe ita mai atu husu Maromak nia benção, fatin nebe ita mai troka ita nia kiak, ita ninia sala ho Maromak nia graça, ho Maromak nia benção.

Pe. Vigário Episcopal ba Assunto Pastoral, Pe. Jovito do Rêgo de Jesus Araujo husu ba peregrino tomak atu hot-hotu hakas an cumpre regras, cumpre normas sira nebe iha atu conserva nafatin fatin ida nee sai digno liu tan. Tan nee precisa servisu hamutuk atu nunee ema seluk nebe halo peregrino mai iha fatin nee mos bele aprende buat ruma iha Santuário nee no bele mai reza mos iha fatin nee. Laos mai atu haree deit natureza, maibe sira bele koko influência Espiritual ida nebe sarani sira mai hamutuk ho Nain Feto husik iha fatin ida ne’e atu ema hot-hotu nebe sama fatin ida ne’e bele senti fatin ida ne’e iha miliagre, milagre ida ne’e Maromak bele halo liu husi ita nia colaboração. (Reportágem Fidelia Magno)

Leave a Reply

Your email address will not be published. Required fields are marked *