shadow
Diocese de Dili > NOTÍCIAS > LETURA DIÁRIA > Quinta-Feira, XXVII Semana Tempo Comum (ANO B)

Quinta-Feira, XXVII Semana Tempo Comum (ANO B)

Primeira Leitura                         Gal. 3. 1-5

Lia housi São Paulo nia Surat ba sarani sira iha Galácia

Ema Galácia sira, imi beikten! Se mak tau ai-fekit ba imi? Imi hatene lolós Cristo nia mate iha Cruz! Dehan took buat ida ne’e: imi simu Maromak nia Espírito tanba halo hahalok nebé ukunfuan haruka eh hodi rona Evangelho no ho fiar nia? Oin sá imi bele sai beikten liu! Imi hahu ona ho Maromak nia Espírito, maibé ohin imi hakarak ba oin ho imi rasik nia kbiit? Buat nebe imi koko ona folin laiha? Los duni, iha folin! Maromak fó Espírito ba imi, hodi halo milagre iha imi nia leet tanba imi halo buat nebé ukunfuan haruka halo ka tanba imi rona tiha Evangelho hodi fiar nia?

Maromak Futar Lia.

 

Salmo Responsorial                                                                                                                                         Sal. Lc. 1. 69-70, 71-72, 73-75 (R. Cf. 68)

Refrão : Rahun di’ak ba Na’i, Israel nia Maromak,

                 Be mai haré no soi Nia povo!!! Repete-se

  • Nia haraik mai Ita Maksoyn ida kbiit tebes,

          Iha Nia atan David nia uma;

          Nune’e mak Na’i hakotu ona housi Nia Santo sira ibun,

          Profeta sira be moris iha tempo uluk nian. Refrão

 

  • Katak Nia sei soi ita housi ita nia funu baluk sira,

          Housi ema laran áat sira liman;

          Hatudu laran-luak ba Ita Aman sira,

          Hodi hanoin Nia moruk santo. Refrão

 

  • Tuir juramento nebé halo ona ba Abraão, ita aman,

          Katak graça ne’e sei haraik mai ita:

          Atu loron ida atu serbi Nia ho ta’uk laek,

          Hodi sai housi funu baluk sira ukun,

          Iha santidade no justiça, iha Nia oin,

          Iha loron hot-hotu ita moris nian. Refrão

 

Aclamação                                                                                                                                                                                                          cf. Act. 16. 14b

Refrão : Aleluia, Aleluia!! Repete-se

                  Loke, Na’i, ami fuan atu simu futar

                  liafuan sira housi Ita Oan Mane. Refrão

 

Evangelho                                                                                                                                                                                                                 Lc. 11. 5-13

Na’i Jesus Cristo nia Evangleho nu’udar São Lucas haktuir:

Iha tempo neba, Jesus dehan tan ba Nia escolante sira: “Imi ida iha karik belun ida nebé kalan boot ba hateten ba nia: ‘Belun, fó netik pão fuan tolu mai, basá ha’u nia belun foin to’o mai housi dook no hau laiha buat ida atu fó ba nia’. Belun ne’e bele hatan housi uma laran: ‘Keta hasusar ha’u! Odamatan taka metin ona. Ha’u ho ha’u nia oan sira toba tiha ona. Ha’u la bele hader atu fó buat ruma ba ó’. Ha’u dehan ba imi katak, maski nia sei la hader hodi fó tanba sira belun malu, nia sei fó duni buat hotu nebé nia belun kuran tanba nia husu fila fali. Ne’e duni, Ha’u dehan ba imi: husu ba imi sei simu; buka ba, imi sei hetan; tuku odamatan ba, odamatan sei nakloke ba imi. Basá ema hotu nebé husu, sei simu; ema nebé buka sei hetan; no ba ema nebé tuku odamatan, odamatan sei nakloke ba nia. Iha imi leet, aman ida nebé mak sei fó samea wainhira nia oan husu ikan? Eh sei fó sakunar ida wainhira nia husu manu tolun? Ne’e duni, maski imi ema laran áat hatene fó buat di’ak ba imi nia oan sira, oin sá liu tan mak imi nia Aman iha lalehan sei haraik Espírito Santo ba sira nebé husu ba Nia?”

Lia Maksoyn.

Leave a Reply

Your email address will not be published. Required fields are marked *