shadow
Diocese de Dili > NOTÍCIAS > LETURA DIÁRIA > Segunda-Feira, XXVII Semana Tempo Comum (ANO B)

Segunda-Feira, XXVII Semana Tempo Comum (ANO B)

Primeira Leitura                     Gal. 1. 6-12

Lia housi São Paulo nia Surat ba sarani sira iha Galácia:

Maun alin sira: Ha’u hakfodak kona ba imi! Lalais de’it mak imi husik ida nebé bolu imi housi Cristo nia graça; imi simu fali Evangelho seluk. Lolós, la iha Evangelho seluk, maibé ha’u dehan ne’e basá iha ema balun nebé book imi, hodi buka muda Cristo nia Evangelho. Maibé, maski ami eh anjo ida housi lalehan haklaken ba imi Evangelho ida nebé oin seluk housi buat nebé ami haklaken ona ba imi, malisan ba nia! Ami dehan nanis ona, no ami sei dehan dala ida tan: ema ruma haklaken Evangelho ruma karik nebé oin seluk housi ida nebé imi simu tiha ona, malisan ba nia!

Ha’u buka ema nia laran di’ak, ka Maromak nian? Ha’u buka fó ksolok ba ema ruma? Ha’u buka duni karik, ha’u sei la sai Cristo nia atan.

Husik ha’u fó hatene ba imi, maun alin sira, katak Evangelho nebé ha’u haklaken la mai housi ema ida. Ha’u la simu nia housi ema ruma, eh ema ruma hanourin ha’u. Jesus Cristo rasik mak fó hatene nia mai ha’u.

Maromak Futar Lia.

 

Salmo Responsorial                                                                                                                                        Sal. 110(111). 1-2, 4-5, 7-8, 9-10ac (R. 5b)

Refrão : Na’i sei hanoin hetan nafatin Nia moruk!!! Repete-se

Ou         : Aleluia!

  • Ho laran tomak ha’u hahi Na’i,

          Iha taka mutu ema lós nian no iha assembleia.

          Na’i Nia hahalok kmanek boot tebes,

          Halo nia emar sira hanoin ba nafatin. Refrão

 

  • Nia halo kmanek oi-oin nebé sei la haluha,

          Na’i laran di’ak no laran luak.

          Maromak tahan sira be hamta’uk Nia,

          Hodi hanoin hetan Nia aliança. Refrão

 

  • Na’i nia liman nia hahalok mesa mós no lós,

          Nia lei sira sei la muda,

          Sei metin tinan-ba-tinan,

          Hari metin iha lia lós no justiça. Refrão

 

  • Nia haruka maksoyn ba Nia povo,

          Hametin ho nia moruk ida rohan laek,

          Nia naran santo tebes no soi hana’i,

          Hahi Na’i tinan-ba-tinan. Refrão

 

Aclamação                                                                                                                                                                                                                   Jo. 13. 34

Refrão : Aleluia, Aleluia!! Repete-se

                  Na’i hateten: Ha’u fó ba imi mandamento foun,

                  Imi hadomi malu nu’udar Ha’u hadomi imi. Refrão        

 

Evangelho                                                                                                                                                                                                              Lc. 10. 25-37

Na’i Jesus Cristo nia Evangelho nu’udar São Lucas haktuir:

Iha tempo neba, doutor lei nian ida hamriik atu koko Nia hodi dehan: “Mestre, ha’u sei halo sá atu hetan moris rohan laek?” Jesus dehan ba nia: “Iha ukunfuan hakerek sáida? Ita lê oin sá?” Nia hatan dehan: “Ó sei hadomi Na’i, ó nia Maromak, ho neon ho laran tomak, ho ó nia kbiit tomak, ho ó nia hanoin tomak; no mós ó nia maluk nu’udar ó nia an rasik.” No Jesus dehan ba nia: “Ita hatan lós; halo nune’e, ita sei hetan moris”.

Maibé, tan nia hakarak souri an, nia dehan ba Jesus: “Maibé, se mak ha’u nia maluk?” Jesus hatan hodi dehan: “Ema ida tun housi Jerusalém ba Jericó. Nia monu iha na’okten sira nia liman. Sira hadau nia sasan sira hodi baku tasak nia; hafoin sira halai, hodi husik hela nia besik atu mate. Na’ilulik ida liu housi neba; haré tiha ema ne’e, nia hakat ba dalan nia ninin seluk. Nune’e mós levita ida liu housi neba: hare tiha ema ne’e, nia hakat ba dalan ninin seluk. Maibé, wainhira samaritano ida liu housi neba, haré tiha ema ne’e, nia hanoin nia teb-tebes. Nia hakbesik, tau mina ho tua ba nia kanek sira hodi falun sira, hafoin foti ema ne’e ba nia kuda rasik no lori nia ba uma ida hodi tau matan ba nia. Loron tuir mai, nia hasai osan rua, hodi fó ba uma na’in dehan: ‘Hare nia didi’ak, no buat nebé ita gasta ha’u sei selu wainhira ha’u sei fila mai.’

Tuir ita nia hanoin, sira na’in tolu ne’e, ida nebé mak maluk ba ema nebé monu iha na’okten sira nia liman?” Nia hatan: “Ida nebé hatudu laran luak ba nia.” No Jesus hateten ba nia: “Ba, hodi halo mós nune’e.”

Lia Maksoyn.

Leave a Reply

Your email address will not be published. Required fields are marked *