shadow
Diocese de Dili > NOTÍCIAS > LETURA DIÁRIA > Sexta-Feira, XXVII Semana Tempo Comum (ANO B)

Sexta-Feira, XXVII Semana Tempo Comum (ANO B)

Primeira Leitura                       Gal. 3. 7-14

Lia housi São Paulo nia Surat ba sarani sira iha Galácia

Maun alin sira: Ne’e duni, imi sei haré katak Abraão nia bei-oan lolós mak sira nebe fiar. Escritura fó sai nanis katak Maromak sei halo gentio sira sai ema lós iha nia futa oin housi fiar. Tan ne’e Escritura fó sai liafuan di’ak ba Abraão: “Housi o, Maromak sei fó bensa ba ema hotu.” Abraão fiar, no nia hetan bensa; ema hotu nebe fiar sei hetan mós bensa hanesan nia.

Sira nebe buka tuir ukunfuan, sira ne’e moris ho malisan, basá Escritura dehan: “Ema nebe la halo tuir buat hotu nebe hakerek iha livro uknfuan nian hetan Maromak nia malisan.” Ohin, ema bele haré momós katak la iha ema nebe sai lós iha Maromak futar oin housi ukunfuan, basá Escritura dehan: “Ema nebe sai lós iha Maromak futar oin housi fiar, ema ne’e de’it mak sei moris.” Maibe ukunfuan nia hun la’os iha fiar. Escritura dehan katak ema nebe halo hotu nebe ukunfuan haruka sei moris tuir ukunfuan.”

Maibe, uainhira Nia sai ema nebe simu malisan tanba ita, Cristo hasai ita housi malisan nebe ukunfuan lori mai; basá Escritura dehan: “Ida nebe ema hedi ona iha ai-moris, ema ne’e simu Maromak nia malisan iha nia an.” Nia halo ida ne’e atu gentio sira mós bele simu bensa nebe Maromak hakotu ba Abraão housi Cristo Jesus; atu housi fiar, ita bele simu espírito nebe Maromak hakotu lia atu fó.

Maromak Futar Lia.

 

Salmo Responsorial                                                                                                                                                       Sal. 110(111). 1-2, 3-4, 5-6 (R. 5b)

Refrão : Na’i sei la haluha Nia aliança ba nafatin!!! Repete-se

  • Ho laran tomak ha’u hahi Na’i,

          Hamutuk ho ema di’ak sira hotu.

          Nia hahalok kmanek tebes,

          Di’ak tebes ba sira be hanoin Nia iha neon laran. Refrão

 

  • Boot no kmanek tebes Nia hahalok sira,

          Nia justiça hela ba nafatin.

          Na’i Nia hahalok sira, ema sei la haluha;

          Na’i laran di’ak no sadi’a. Refrão

 

  • Nia fó han sira be hamta’uk Nia,

          Tan Nia hanoin hetan Nia moruk;

          Hatudu ba Nia povo biit Nia hahalok nian,

          Hodi saran riku soi nação sira nian ba nia. Refrão

 

Aclamação                                                                                                                                                                                                           Jo. 12. 31b, 32

Refrão : Aleluia, Aleluia! Repete-se

                  Ohin liurai mundo ne’e nian sei duni sai ona.

                  Uainhira ema foti Ha’u housi rai, Ha’u sei dada ema hot-hotu mai Ha’u. Refrão

 

Evangelho                                                                                                                                                                                                               Lc. 11. 15-26

† Na’i Jesus Cristo nia Evangelho tuir São Lucas

Iha tempo neba, Jesus duni sai demónio ida; maibe ema balun dehan: “Nia duni sai diabo hodi Belzebu, diabo sira nia ulun, nia naran.” Balun fali husu ba Nia sinal ida housi lalehan, atu koko Nia. Maibe, hatene tiha sira nia hanoin, Nia dehan ba sira: “Reino hotu nebe fahe malu sei sobu rahun, no uma ida sei monu iha uma seluk nia leten. Nune’e mós, Satanas fahe karik nia an ba rua, nia reino sei tahan oin sá lós? Basá imi dehan katak hodi Belzebu mak Ha’u duni sai diabo sira. Ha’u duni sai diabo sira hodi Belzebu nia naran karik, hodi sá nia naran mak imi nia oan sira duni sai sira? Tan ne’e mak sira sei tesi lia ba imi. Maibe Ha’u duni sai diabo sira hodi Maromak nia limanfuan karik, ne’e dehan katak Maromak nia reino to’o ona ba imi. Uainhira ema maka’as ida ho kroat hein nia uma boot, nia rikusoi hela metin hakmatek; maibe uainhira ema ida maka’as liu  nia mosu mai karik hodi manan nia, ema ne’e hadau nia kroat nebe fó laran metin ba nia, hodi fahe nia sasan tomak. Ida nebe la hamutuk ho Ha’u, nia hasouru Ha’u; no ida nebe la halibur ho Ha’u, nia sei namkari.

Uainhira espírito fo’er ida sai housi ema ida, nia la’o lemo rai fuik maran hofi buka hakmatek. La hetan tiha, nia dehan: ‘Ha’u sei fila fali ba uma nebe ha’u husik tiha.’ To’o tiha neba, nia hetan fatin ne’e saar mós tiha no furak. Hafoin nia ba lori tan espírito na’in hitu nebe áat liu fali nia; sira ne’e tama, hodi hôrik iha neba. Ikus mai, ema ne’e nia rohan sai áat liu fali uluk.”

Lia Maksoyn.

Leave a Reply

Your email address will not be published. Required fields are marked *