shadow
Diocese de Dili > NOTÍCIAS > OPINIÃO > OHO NO SOE BEBÉ: Ita Hotu Nia Responsabilidade

OHO NO SOE BEBÉ: Ita Hotu Nia Responsabilidade

Pe. Miguel Arcanjo da Costa*

 

               Iha fulan tolu tutuir-malu (Agosto, Setembro no Outubro) tinan ida ne’e (2018), ita hotu acompanha liu housi mídia electronica : televisão, rádio, internet no jornais iha ne’ebe sociedade tomak preocupa ho kazu oho no soe bebé. Lós duni katak kazu sira hanesan ne’e laós foin mosu tinan ne’e. Tinan barak ba kotuk mós aconteçe buat ne’ebé hanesan. Sociedade tomak, entidades hotu preocupa no condena atitude ida be oho no soe bebé ne’e. Preocupação hirak ne’e hatudu katak ita hotu iha consciência ida kona ba Dignidade Humana ema ida nian. Dala ruma iha parte balu hatudu-liman ba parte seluk ou instituição ida hatudu liman ba instituição seluk. Buat ne’ebe diak liu mak ita fo-hanoin ba malu hodi hola consciência ida atu prevene kazu ida ne’e labele mosu tan iha loron seluk.

               Artigu ho título hanesan hakerek iha leten ne’e, lee-nain balu bele reagem espontânea iha nia fuan laran dehan hanesan ne’e : “ema seluk mak oho no soe bebé, ha’u mak responsabiliza fali? Conhece deit ema ne’e mós lae! Sá tan husu ha’ú nia responsabilidade? U GRANDE karik diak! Atu U boot ka U ki’ík, Urpri(urusan pribadi) ka Urmes(urusan mes-mesak) ou Urkeke(urusan ketak-ketak), hakarak ka lakohi, simu ka la simu hanesan ema moris, ita hotu iha ‘URUSAN’ duni kona ba assunto refere.  Ita preocupa no condena atitude hirak ne’e laós deit tamba ita Timor-oan, maibe, tamba ita EMA criatura hanesan mós ema seluk iha rai seluk iha mundo raiklararan. Ita hotu, se wainhira sei sente-an hanesan Ema moris ida iha mundo ida ne’e husu ba ita ida-idak nia-an, ita nia contribuição saida? Ita nia resposabilidade saida? Ita nia obrigação saida? Ita nia preocupação ba sociedade Timor Leste ne’e saida? Pergunta hirak ne’e bele reflete hahú iha família(inan-aman ho oan sira)/uma-kain idak-idak, eskola(professores no educadores, estudantes) hahú housi nível pré-primária to’o institutos superiores no universitários, confissões religiosas hotu, organizações(NGO) nacionais no internacionais, governo-estado, segurança (PNTL no FFDTL), ho lia-fuan badak entidades tomak. Kazu refere bele haré no reflete liu housi dalan-sikun ciência (economia, social, política, psicología, antropología, sociología, ética, moral, lei, filosofia no seluk-seluk tan). Conforme ita hamri’ik iha sikun ciência ida ne’ebe hodi hateke no reflete hodi foti lição ba defende, haburas ita nia dignidade humana no tane aas ita nia identidade hanesan ema Timor-oan.  

               Atu bele tulun ita nia reflexão ba pergunta hirak temi ona iha leten ne’e, hakerek-nain hakarak bolu ita nia atenção ba lia-fuan oan rua ne’ebé ita temi bai-bain iha ita nia koalia ba malu loron-loron. Lia-fuan rua ne’e mak : Liberdade no Responsabilidade iha no ho óculo filosofia moral. Tema liberdade ne’e sai tópico classico no rohan laek ba debate filosófico to’o ohin loron. Matenek-nain barak tebes mak debate lia-fuan liberdade ne’e ho conceito oi-oin tebes, modelo mós oi-oin deit, iha história do pensamento humana. Iha ita nia sociedade Timor, lia-fuan liberdade ema hotu badinas koalia barak liu do que lia-fuan responsabilidade. Ema barak koalia liberdade maibé, haluha tiha nia responsabilidade. Halo buat hotu no halo saida deit maibé la hatudu nia resposabilidade. Adora tiha liberdade hanesan Maromak. Falun-an tiha ho liberdade hodi halo saida deit conforme hakarak no áat liu tan mak la respeita no la hatene hun no rohan housi ema seluk nia liberdade. Housi ki’ík-oan to’o boot koalia liberdade ne’e sai tiha ‘’makanan pokok” no bai-bain tiha deit. Liberdade nia hun no rohan iha ne’ebé la importa. Saida mak ita sei halo ho ita nia liberdade ne’e mós la pusing. Ita barak mak tama tiha ona iha ‘bairro la pusing’! Koalia lia-fuan liberdade hodi justifica ita nia lia-fuan no hakarak. Exemplo, foin-se sira ohin loron iha uma, inan-aman bandu keta ba tanaat ema nia festa iha vizinho to’o kalan boot ou to’o dader,  sira hatán : “para tiha radio aat sira ne’e. Ohin loron tempu moderno ona. Ida-idak halo tuir nia liberdade”. Housi resposta ida ne’e ita bele si’ik saida mak iha foin-sae ida ne’e nia ulun. Primeiro, foin-se sira ohin loron ne’e concidera inan-aman nia lia-fuan la vale ona ba sira iha tempo ohin loron, prazo liu ona, siin ona, áat ona, alias “expire”. Ne’e duni la precisa rona. Segundo, tempo ohin loron ne’e moderno, maske foin-se sira rasik lahatene saida mak moderno no saida mak tempo. Sira halo hanesan tiha deit buat ida liberdade ho moderno ou aat liu tan sira nia conceito kona ba tempo no espaço seidauk tasak no klean. Sira moris tuir ritmo deit. Terceiro, ida-idak halo tuir nia hakarak. Hakarak halo buat hotu. Lahatene ona halo definição ba atitude ida nia objetivo no efeito ba nia-an rasik  ho ema seluk. Atitude ida hanesan ne’e halo ema monu ba egoismo no individualismo. Conceito humano mihis.

               Relaciona ho kazu oho no soe bebé ne’e, ita hotu preocupa no condena duni. Moralmente zero tolerância ba kazu refere. Ita preocupa no condena tamba razão humana.

               Bandu oho ema ne’e ukun-fuan universal. Sá tan, oho no soe ou bebé moris mai buti-mate kedas hafoin soe tan iha lixo, baleta-kuak, ai-hun, hudi-hun, uma kotuk, cemitério no seluk-seluk tan. Ne’e mukit tebes. Se hanesan ne’e, ita ema nia dignidade, direito, liberdade no responsabilidade iha ne’ebe no to’o ba iha ida ne’ebe? Iha filosofia moral hanorin ita katak ema ida foin bele husu nia responsabilidade ba hahalok ida se wainhira nia iha situação livre no moris iha liberdade. La iha pressão física ou psíquica, la iha ameaça física ou psíquica, la iha impedimento housi ema ou instituição saida deit iha mundu ne’e. Ita ema livre halo saida deit iha sociedade ida nia le’et maibé iha tempu ne’ebé hanesan exige mós ita nia responsabilidade. Tamba koalia kona ba ita nia liberdade, responsabilidade mós haksumik hela iha neba. Liberdade no responsabilidade sempre temi hamutuk. Labele koalia ida haluha ida seluk. Halo ida, halai housi ida seluk. Ou adora ida hewai ida seluk. Humanamente Ita livre katak ita iha capacidade hodi determina rasik ba acto ida bele ou labele halo. Tan ne’e, iha pensamento filosofia moral hanorin mai ita katak ita ema iha liberdade rua.  

               Ida, liberdade existencial. Ho liberdade existencial katak ita ema iha capacidade hodi determina kona ba ita nia acto ou hahalok rasik ho carater positivo. Ne’e katak liberdade ida ne’ebé la acrescenta aspeto livre housi saida, maibé livre ba saida. Ita bele determina ita nia klalaok rasik. Maibé, laós atividade hot-hotu be ita ema halo, ne’e ita considera ona hanesan acto ida. Exemplo : ‘ita dada iis”. Ne’e laós acto, tamba dada iis ne’e lao automáticamente no laós finji dada iis. Foin hetan problema ho dada iss se wainhira físcamente ita nia pulmão la funciona ho diak tamba kona mear, moras asma ou ita Timor dehan mear-busa mak kona. Acto mak hahalok ida ne’ebé halo ho carater finji. Hatene hela katak labele halo, maibé nia halo. Acto, halo ho objetivo no metas ruma ho consciência depende ba ita rasik acto ne’e ita halo ou lae. Animal sira labele halo acto hanesan ita ema. Animal sira halo ida ne’e ou ida nebá tuir instinto deit. Exemplo : “Asu, kuandu hetan kois naan manu kelen ida, asu lahanoin dehan ohh…rai lai, sei buka tan manu nia kelen sorin hetan completo ba mak han dala ida par hodi bosu to’o ‘puas’. Oin seluk ho ita ema. Maske nia hamlaha no iha naan manu kelen iha meja leten, nia sempre hanoin bele han agora ou sei hein lai ou nia la han tamba nia halo hela jejum. Ema bele foti medidas wainhira hasoru-malu ho nia instinto rasik. Tamba ne’e mak ita dehan ema iha capacidade hodi determina nia atitude no nia acto rasik. Capacidade ida ne’e, hetan abut iha ema nia capacidade rasik hodi hanoin no hakarak ne’ebé hatudu-an iha acto ida. Acto ne’e sai ida deit ona ho ha’u nia-an. Iha acto ha’u nia-an rasik mak halo ação konkreto ida. No iha contexto ida ne’e mak ita dehan ema ne’e iha liberdade existencial. Inconsciêntemente, ita moris hela iha liberdade. Wainhira ema seluk tau ona limite ba ita mak foin hatene-as katak agora ha’u la livre ona. Tan ne’e, ita nia liberdade foin bele comprende lolós se wainhira moris no hasoru malu ho ema seluk ou moris hamutuk iha sociedade ida.

               Rua, liberdade social. Liberdade social ita simu housi sociedade be ita horik ba. Ho liberdade social katak situação iha ne’ebé  ita nia possibilidade atu halo buat ida la iha impedimento housi ema seluk. Impedimento katak ema seluk tau limite ba ita nia liberdade.  Tan limitação ne’e, ita la livre ona. Oinsá mak ema seluk bele limite ita nia liberdade social? Iha dalan tolu atu limite ema ida nia liberdade. Ida, liberdade física. Ema seluk bele limite ita nia isin-lolon liu housi pressão física. Exemplo, ema futu tiha ita nia liman-ain halo ita labele book-an ba mai. Ne’e katak ema seluk uza sira nia kbiit física halo fraku ita nia kbiit ou hamenus no halakon tiha ita nia kbiit. Rua, liberdade psíquica. Ema seluk bele limite ita nia liberdade psíquica liu housi, hatauk, ameaça, obriga no pressão. Ida ne’e halo ita la livre no labele hanoin mesak hodi determina buat ruma. Pressão psíquica bele sobu-rahun tiha ita ema nia personalidade no halo ita la iha kbiit hanesan pessoa. Tolu, ordem no bandu. Sociedade bele tau hela obrigação ou bandu ruma ba ita nia kbaas. Ordem katak iha obrigação halo tuir. Bandu katak labele halo. Iha parte ida ne’e, ita nia capacidade iha, maibé ita nia direito mak lakon tamba ita la bele halo seluk, selae ida be ema haruka.

               Atu remata, kazu oho no soe bebé ita preocupa no condena. Housi reflexão badak ida ne’e, ita bele dehan katak ita ema livre maibé exige mós responsabilidade humana. Ita laós moris tuir deit ita nia dignidade no identidade, maibé mós aprende nafatin ita nia dignidade no identidade. Atu aprende dignidade humana no identidade Timor-oan precisa kadi halo kroat ita nia CONSCIÊNCIA MORAL

 

*Pe. Miguel Arcanjo da Costa, Nailulik Diocesana de Dili. Opinião pessoal. Hela iha Maloa!

Leave a Reply

Your email address will not be published. Required fields are marked *